អង្គការសុខភាពពិភពលោកនិងអាមេរិកកំពុងតាមដានមេរោគកូវីដបំប្លែងខ្លួនថ្មី
អង្គការសុខភាពពិភពលោកនិងអាជ្ញាធរសុខភាពអាមេរិកបានប្រកាសនៅថ្ងៃសុក្រទី ១៨សីហា ដាក់មេរោគកូវីដ១៩បំប្លែងខ្លួនថ្មីមួយទៀត ឱ្យស្ថិតនៅក្រោមការតាមដានយ៉ាងប្រុងប្រយ័ត្នបំផុត។ គិតមកទល់នឹងពេលនេះ គេនៅមិនទាន់ដឹងអំពីសក្តានុពលនៃមេរោគបំប្លែងខ្លួនថ្មី BA.2.86នេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ដោយហេតុតែមេរោគកូវីដ១៩ថ្មីនេះបានបំប្លែងហ្សែននៃប្រូតេអ៊ីនSpikeច្រើនខ្លាំងពេក (លើសពី៣០) ទើបអង្គការសុខភាពពិភពលោកសម្រេចចាត់បញ្ចូលមេរោគកូវីដ១៩បំប្លែងខ្លួនថ្មី ក្នុងចង្កោមមេរោគត្រូវតាមដានយ៉ាងប្រុងប្រយ័ត្ន។ នេះបើតាមសំណេររបស់អង្គការនៅក្នុងព្រឹត្តិប័ត្រស្តីពីកូវីដ១៩ដែលមានចេញផ្សាយនៅយប់ថ្ងៃព្រហស្បតិ៍ឆ្លងមកថ្ងៃសុក្រទី១៨សីហា២០២៣។ មេរោគកូវីដបំប្លែងខ្លួនថ្មី មានលេចឡើងនៅក្នុងប្រទេសអ៊ីស្រាអែល ដាណឺម៉ាក និងសហរដ្ឋអាមេរិកដែលក៏សម្រេចតាមដានមេរោគកូវីដ១៩បំប្លែងខ្លួនថ្មីជាពិសេសដែរ។
គឺប្រូតេអ៊ីនSpikeនេះហើយដែលជាអ្នកនាំមេរោគកូវីដSars-Cov-2 ឱ្យជ្រៀតចូលក្នុងកោសិការបស់មនុស្សយើង។ ប៉ុន្តែអង្គការសុខភាពពិភពលោកបានបញ្ជាក់ថា មកទល់ពេលនេះគេនៅមិនទាន់ស្គាល់មេរោគបំប្លែងខ្លួនថ្មីច្បាស់លាស់នៅឡើយទេ និងកំពុងសិក្សាវាយតម្លៃអំពីសក្តានុពលរបស់វាឱ្យបានល្អិតល្អន់។ សម្រាប់អង្គការ គេចាំបាច់ត្រូវតែបន្តតាមដាន កត់ត្រានិងផ្តល់ទិន្នន័យឱ្យអាជ្ញាធរមានសមត្ថកិច្ច ដើម្បីសម្រេចទស្សនៈវិស័យនិងក្តោបស្ថានភាពរបស់ជំងឺរាតត្បាតកូវីដ១៩បានច្បាស់លាស់និងទាំងស្រុង។ បច្ចុប្បន្ននេះ អង្គការសុខភាពពិភពលោកកំពុងចាប់អារម្មណ៍តាមមើលមេរោគកូវីដ១៩បំប្លែងខ្លួនថ្មីចំនួនបី និងបញ្ចូលមេរោគបំប្លែងខ្លួន៧ផ្សេងទៀតក្នុងបញ្ជីមេរោគត្រូវតាមដាន។
ថ្វីបើអង្គការសុខភាពពិភពលោកបានប្រកាសលែងចាត់ទុកកូវីដ១៩ជាហានិភ័យសុខភាពបន្ទាន់របស់ភពផែនដីក៏ដោយ ក៏អង្គការបានឆ្លៀតបន្តបរិហារនិងអំពាវនាវឱ្យគ្រប់ប្រទេសកុំទម្លាក់ដៃ តែត្រូវបន្តតាមដាន និងវិភាគមេរោគកូវីដ១៩ ព្រោះមេរោគនៅតែសកម្មនិងបន្តចម្លងមនុស្ស ក្នុងគ្រប់ប្រទេសហើយបន្តបំប្លែងខ្លួនឥតឈប់ ធ្វើឱ្យមានអ្នកឈឺនិងអ្នកស្លាប់ជារដឹក។ នៅក្នុងតួលេខចុះផ្សាយដោយព្រឹត្តប័ត្ររបស់អង្គការ ពីថ្ងៃទី១៧កក្កដាដល់ថ្ងៃទី១៣សីហា២០២៣ មានមនុស្សឆ្លងកូវីដ១៩ចំនួន១,៤លានករណីថ្មី និងជាង២៣០០នាក់បានស្លាប់។ ជាកំណើនចម្លង៦៣% តែអត្រាអ្នកស្លាប់បានថយចុះ៥៦%បើប្រៀបទៅនឹង២៨ថ្ងៃមុន។
គិតត្រឹមថ្ងៃទី ១៣សីហា ពិភពលោករាប់ឃើញមានអ្នកកើតកូវីដ១៩សរុប៧៦៩លាននាក់ និងជាង៦,៩លាននាក់ស្លាប់ នៅលើពិភពលោក។ ប៉ុន្តែតុល្យការនេះទាបជាងការពិតឆ្ងាយណាស់ ព្រោះមានករណីកូវីដមិនចុះបញ្ជីច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ