អង្គការសុខភាពពិភពលោកបិទបញ្ចប់ ការប្រកាសអាសន្នកូវីដ១៩
ជាងបីឆ្នាំក្រោយពីបានរាតត្បាត និងសម្លាប់ជីវិតមនុស្សជិត២០លាននាក់មក ពេលនេះ ពិភពលោក អាចឃុំគ្រងជំងឺកូវីដ១៩ បានសមល្មមនឹងប្រកាសលើកភាពអាសន្នអតិបរិមាបានហើយ។ នេះជាសេចក្តីសម្រេច ជាផ្លូវការរបស់អង្គការសុខភាពពិភពលោក នៅថ្ងៃម្សិលមិញ ដោយឆ្លៀតរំឮកថា ភាពអាសន្នសុខាភិបាលអន្តរជាតិត្រូវបានបញ្ចប់មែន ប៉ុន្តែកូវីដ១៩ មិនទៅណាទេ។ វានៅតែបន្តចម្លងមនុស្ស ជាច្រើននិងយូរឆ្នាំទៀតណាស់។
ចុះផ្សាយនៅថ្ងៃ៖
ស្តាប់ - ០២:០៧
នៅថ្ងៃទី ៣០មករា២០២០ អង្គការសុខភាពពិភពលោកបានប្រកាសអាសន្នកំរិតអតិបរិមាប្រឈមនឹងជំងឺផ្លូវដង្ហើមបង្កឡើងមេរោគកូរ៉ូណា ដែលលេចឡើងដំបូងគេនៅក្នុងប្រទេសចិន និងដែលពុំទាន់មានថ្នាំព្យាបាលនៅពេលនោះ។ គេត្រូវរង់ចាំដល់ខែមីនា២០២០ ទើបប្រធានអង្គការសុខភាពពិភពលោកចាប់ផ្តើមនិយាយពីជំងឺរាតត្បាតសកល ហើយប្រជាពលរដ្ឋពិភពលោកចាប់យល់ពីស្ថានភាពធ្ងន់ធ្ងរនៃជំងឺ និងចាត់វិធានាការបិទខ្ទប់ប្រទេសអស់ជាច្រើនខែ។
ប៉ុន្តែបើតាមយោបល់អ្នកជំនាញ ទោះបីជានៅមានភាពមិនជាក់លាក់ខ្លះជុំវិញការវិវឌ្ឍរបស់វីរុសក្តី ក៏ដល់វេលាដែលត្រូវមានចំណាត់ការលើជំងឺកូវីដ១៩ សម្រាប់អនាគតដ៏វែងហើយ។
ហេតុដូច្នេះហើយបានជាលោកនាយកអង្គការសុខភាពពិភពលោក តេដ្រូស បានប្រកាស នៅថ្ងៃសុក្រទី ៥ឧសភា បិទបញ្ចប់ភាពអាសន្នកូវីដ១៩ជាផ្លូវការ ដូចអ្វីដែលលោកធ្លាប់សង្ឃឹមកន្លងមក។
លោកវេជ្ជបណ្ឌិត តេដ្រូស ៖
“តាំងពីជាងមួយឆ្នាំមកនេះ ការរាតត្បាតចាប់ថយ។ ភាពស៊ាំនឹងមេរោគបានឡើងខ្ពស់។ អត្រាមរណៈបានធ្លាក់ចុះ ហើយសម្ពាធលើប្រព័ន្ធសុខាភិបាលក៏រួមតូច។ ជាមួយនឹងក្តីសង្ឃឹមដ៏ធំ ខ្ញុំសូមប្រកាសថា កូវីដ១៩លែងជាភាពអាសន្នសុខភាពកំរិតពិភពលោកទៀតហើយ។ ប៉ុន្តែភាពអំណររីករាយនៅមានកំរិត ព្រោះវីរុសកូវីដ១៩ នៅជាមួយយើងជានិច្ច នៅបន្តចម្លង បន្តសម្លាប់ និងបំប្លែងខ្លួន។ បើកូវីដចាប់គំរាមពិភពលោកទៀត ខ្ញុំមិនរារែកនឹងកោះប្រជុំគណៈកម្មការបន្ទាន់ជាថ្មីឡើយ។”
ថ្វីបើចំនួនអ្នកស្លាប់បានធ្លាក់ចុះអស់៩៥%តាំងពីខែមករាមកមែន ប៉ុន្តែក្នុងពេលមួយខែមុននេះ កូវីដ១៩ បានឆ្លងលើមនុស្សជាង២លាន៨សែននាក់ និងបន្តឆក់យកជីវិតអស់១៧០០០នាក់ទៀត។ ជាចំនួនដ៏ច្រើន មិនតិចទេ។
សម្រាប់លោកនាយកអង្គការសុខភាពពិភពលោក ជាងបីឆ្នាំកន្លងមកនេះ ជំងឺរាតត្បាតសកលកូវីដ១៩ បានសម្លាប់ជីវិតមនុស្សអស់ជិត២០លាននាក់ ពោលគឺបីដងច្រើនជាងតួលេខផ្លូវការមុន។ តួលេខផ្លូវការថ្ងៃទី៣ឧសភា២០២៣ រាប់ឃើញមានអ្នកស្លាប់ដោយកូវីដ១៩ជា ជិត៧លាននាក់ និងអ្នកឆ្លងកូវីដ៧៦៥លាននាក់។
សូមបញ្ជាក់ថាសេចក្តីសម្រេចបិទបញ្ចប់ ភាពអាសន្នកូវីដ១៩ ជាផ្លូវការនេះ មិនបានប្តូរផ្លាស់អ្វីក្នុងការអនុវត្តជាក់ស្តែងទេ ដ្បិតគ្រប់ប្រទេសបានលុបបម្រាម និងលើកវិធានការប្រឆាំងកូវីដស្ទើរអស់រលីងទៅហើយ នៅឡើយតែសេចក្តីអំពាវនាវឱ្យបន្តការប្រុងប្រយ័ត្ន ទៀត ព្រោះវីរុសនៅតែសកម្មនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ