គ្រោះថ្នាក់ធ្លាក់យន្តហោះដែលសម្លាប់អ្នកប្រឆាំងលោកពូទីន ជាឧប្បត្តិហេតុ ឬការសងសឹក?
ថ្នាក់ដឹកនាំជាន់ខ្ពស់របស់ក្រុមហ៊ុនទាហានស៊ីឈ្នួលវ៉ាក់ណែ ដែលនៅក្នុងនោះ មានទាំងលោកអេវហ្គីនី ព្រីហ្គោហ្ស៊ីន ស្ថិតក្នុងចំណោមមនុស្ស១០នាក់ ដែលស្លាប់នៅក្នុងគ្រោះថ្នាក់ធ្លាក់យន្តហោះឯកជន កាលពីថ្ងៃពុធទី ២៤សីហា នៅភាគខាងជើងរដ្ឋធានីម៉ូស្គូ។ ខណៈពេលដែលអាជ្ញាធរអាកាសចរណ៍ស៊ីវិលរុស្ស៊ីប្រកាសបង្កើតគណៈកម្មាធិការស៊ើបអង្កេតព្រហ្មទណ្ឌលើហេតុការណ៍កាលពីថ្ងៃពុធ សំណួរជាច្រើនបានផុសឡើង។ តើគ្រោះថ្នាក់ធ្លាក់យន្តហោះដែលដឹកថ្នាក់ដឹកនាំសំខាន់ៗរបស់ក្រុមទាហានស៊ីឈ្នួលវ៉ាក់ណែរ ជាឧប្បត្តិហេតុ ឬជាការសងសឹក? តើអ្នកណាជាអ្នកនៅពីក្រោយគ្រោះថ្នាក់ធ្លាក់យន្តហោះឯកជនដែលដឹកមេក្រុមទាហានស៊ីឈ្នួលវ៉ាក់ណែរ? តើអនាគតរបស់ក្រុមទាហានស៊ីឈ្នួលវ៉ាក់ណែរនឹងទៅជាយ៉ាងណា?
ចុះផ្សាយនៅថ្ងៃ៖
វិបសៃតិ៍តាមដានទិន្នន័យការហោះហើរ(Flight Tracking Data) បង្ហាញថា យន្តហោះ Embraer 135របស់ក្រុមហ៊ុនវ៉ាក់ណែ ដែលហោះចេញពីម៉ូស្គូ សំដៅ ទីក្រុងSaint Petersburg ដែលមានទីស្នាក់ការរបស់ក្រុមហ៊ុនវ៉ាក់ណែរ មិនបានបង្ហាញសញ្ញាថា មានបញ្ហានៅមុនធ្លាក់ចុះយ៉ាងគំហុកមកលើដី។ ប៉ុន្តែ អ្នកភូមិរុស្ស៊ី ដែលរស់នៅក្បែរកន្លែងធ្លាក់យន្តហោះនិយាយប្រាប់អ្នកកាសែតថា ពួកគេលឺសំឡេងផ្ទុះនៅលើមេឃ បន្ទាប់មកគេឃើញយន្តហោះធ្លាក់ចុះលឿនស្លេវ ដូចជាស្លឹកឈើ និងផ្ទុះឆេះនៅលើដី។
គេនៅមិនទាន់ដឹងពីមូលហេតុពិតប្រាកដដែលធ្វើឲ្យយន្តហោះឯកជន ដែលដឹកលោកព្រីហ្គោហ្ស៊ីន មេក្រុមទាហានស៊ីឈ្នួលជួបគ្រោះថ្នាក់ធ្លាក់ផ្ទុះឆេះនៅឡើយទេ។ ប៉ុន្តែ មានព័ត៌មាន២ដែលគេត្រូវដឹង។ ទី១ តាមអ្នកជំនាញខាងអាកាសចរណ៍ស៊ីវិល យន្តហោះដឹកមេក្រុមទាហានស៊ីឈ្នួលវ៉ាក់ណែ ឃើញមានស្លាបតែម្ខាង នៅពេលធ្លាក់ចុះមកលើដី។ គេអាចគិតថា យន្តហោះដឹកលោកព្រីហ្គោហ្ស៊ីនអាចមានបញ្ហាផ្ទុះពីខាងក្នុង ឬអាចប៉ះទង្គិចនឹងអ្វីម្យ៉ាងពីខាងក្រៅ។
នៅល្ងាចថ្ងៃពុធ នៅប៉ុន្មាននាទីក្រោយអាកាសចរណ៍ស៊ីវិលរុស្ស៊ីប្រកាសថា លោកព្រីហ្គោហ្ស៊ីន មេទាហានវ៉ាក់ណែរ ស្ថិតក្នុងបញ្ជីឈ្មោះ អ្នកដំណើរដែលឡើងជិះយន្តហោះ គណនីរបស់ទាហានវ៉ាក់ណែរ ឈ្មោះ Grey Zone សរសេរថា យន្តហោះដឹកលោកមេក្រុមវ៉ាក់ណែរ រងការវាយប្រហារពីប្រព័ន្ធខែលមីស៊ីល។ តាម គណនីតេឡេក្រាម Grey Zone លោកព្រីហ្គោហ្ស៊ីនស្លាប់ដោយសារទង្វើក្បត់របស់ជនជាតិរុស្ស៊ី។ មេបញ្ជាការទាហានវ៉ាក់ណែរ ដែលជាមនុស្សដៃស្តាំរបស់លោកព្រីហ្គោហ្ស៊ីន និងដែលមានវត្តមាននៅក្នុងយន្តហោះជាមួយព្រីហ្គោហ្ស៊ីន ធ្លាប់បាននិយាយប្រាប់កូនចៅរបស់ខ្លួនថា ម៉ូស្គូកោះហៅពួកគេ ទំនងដើម្បីទទួលស្តាប់ការដាក់ទោស ទាក់ទងនឹងការបះបោរមិនបានសម្រេច របស់ទាហានវ៉ាក់ណែរ នៅម៉ូស្គូ កាលពី ខែមិថុនា។
ពីមេចុងភៅ មនុស្សជំនិតរបស់លោកពូទីន មកជាជនក្បត់ជាតិ
មូលហេតុដែលធ្វើឲ្យយន្តហោះដឹកមេទាហានស៊ីឈ្នួលវ៉ាក់ណែ មិនមែនជារឿងសំខាន់។ អ្វីដែលគេចាប់អារម្មណ៍ចោទសួរថា តើគ្រោះថ្នាក់ធ្លាក់យន្តហោះដែលមានដឹក មេដឹកនាំសំខាន់ៗរបស់ទាហានវ៉ាក់ណែរ ជាការសងសឹករបស់លោកពូទីន? ក្រៅពីអ្នកបើកបរយន្តហោះ ២នាក់ អ្នកបម្រើការលើយន្តហោះ៣នាក់ មនុស្ស៧នាក់ផ្សេងទៀត ដែលស្លាប់នៅក្នុងគ្រោះថ្នាក់ធ្លាក់យន្តហោះ សុទ្ធជាមនុស្សសំខាន់ៗរបស់ក្រុមហ៊ុនវ៉ាក់ណែរដែលមានជាប់ពាក់ព័ន្ធនឹងការបះបោររបស់វ៉ាក់ណែរ ប្រឆាំងរដ្ឋអំណាចរុស្ស៊ី កាលពីថ្ងៃទី ២៣ និង២៤មិថុនា។ មនុស្សសំខាន់ៗ មានលោកព្រីហ្គោហ្ស៊ីន និង មនុស្សដៃស្តាំរបស់លោក គឺលោក Dmitry Utkin ដែលសហស្ថាបនិកក្រុមហ៊ុនវ៉ាក់ណែ។ ជាមេបញ្ជាការទាហានវ៉ាក់ណែរ លោកឌីមីទ្រី អ៊ុតគីនធ្លាប់បម្រើការក្នុងក្រសួងស៊ើបការណ៍សម្ងាត់រុស្ស៊ី។ បន្ទាប់មកទៀតគឺលោក វ៉ាឡេរី ឆេកាឡូវ ដែលទទួលបន្ទុកកិច្ចការជំនួញ កិច្ចសន្យារបស់ក្រុមហ៊ុនទាហានស៊ីឈ្នួលវ៉ាក់ណែរ ហើយនិងជាអ្នកចាត់ចែងការធ្វើដំណើរដ៏សម្ងាត់របស់លោកព្រីហ្គោហ្ស៊ីន។
ទាំងលោកព្រីហ្គោហ្ស៊ីន និងមនុស្សដៃស្តាំរបស់លោក គឺលោក ឌីមីទ្រី អ៊ុតគីន ជាប់ពាក់ព័ន្ធនឹងការបះបោរមិនបានសម្រេចរបស់វ៉ាក់ណែរ នៅម៉ូស្គូ កាលពីខែមិថុនា។
គេមិនដឹងតើវាជារឿងចៃដន្យ ឬគ្រោងទុក នោះទេ។ គ្រោះថ្នាក់ធ្លាក់យន្តហោះ ដឹកលោកព្រីហ្គោហ្ស៊ីន កើតឡើងនៅចំថ្ងៃគម្រប់ ២ខែគត់ ដែលលោកព្រីហ្គោហ្ស៊ីនដឹកនាំទាហានវ៉ាក់ណែរឲ្យធ្វើការបះបោរ លើកគ្នាទៅម៉ូស្គូ ដើម្បីទាមទារឲ្យរដ្ឋមន្រ្តីការពារជាតិ និងមេបញ្ជាការទ័ពរុស្ស៊ី នៅអ៊ុយក្រែន ត្រូវតែចុះចេញពីតំណែង។ ចាប់តាំងពីមានស្នាដៃក្នុងការប្រយុទ្ធដណ្តើមបានទឹកដី ពីកងទ័ពអ៊ុយក្រែន មេទាហានស៊ីឈ្នួលវ៉ាក់ណែរ លោកព្រីហ្គោហ្ស៊ីនបានចេញមុខ និងដំឡើងសំឡេងរិះគន់កាន់តែខ្លាំង យុទ្ធសាស្រ្តធ្វើសង្រ្គាមរបស់ម៉ូស្គូ នៅអ៊ុយក្រែន។ នៅពេលនាំទាហានរបស់ខ្លួន ទៅកាន់កាប់មូលដ្ឋានទ័ពសំខាន់មួយក្នុងទឹកដីរុស្ស៊ី លោកព្រីហ្គោហ្ស៊ីន និយាយថា រដ្ឋមន្រ្តីក្រសួងការពារជាតិរុស្ស៊ីចង់ដណ្តើមជ័យជំនះរបស់វ៉ាក់ណែរក្នុងសង្រ្គាមអ៊ុយក្រែន តាមរយៈ ការដាក់កំហិត ឲ្យទាហានវ៉ាក់ណែរចុះចូលក្នុងកងទ័ពរុស្ស៊ី។ តាមលោកព្រីហ្គោហ្ស៊ីន ទាហានវ៉ាក់ណែរលើកគ្នាបះបោរក៏ដោយសារតែពួកគេមិនចង់ចូលក្នុងជួរកងទ័ពជាតិរុស្ស៊ី ប៉ុន្តែ ចង់នៅបន្តធ្វើជាទាហានស៊ីឈ្នួល ដដែល។
មរណភាពរបស់ព្រីហ្គោហ្ស៊ីនមានន័យយ៉ាងណា?
ទំព័ររបស់មេទាហានស៊ីឈ្នួលវ៉ាក់ណែបានបិទបញ្ចប់ទៅ ជាមួយការរលត់ជីវិត ក្នុងគ្រោះថ្នាក់ធ្លាក់យន្តហោះ កាលពីថ្ងៃពុធ ប៉ុន្តែ សម្រាប់អ្នកដែលស្គាល់រុស្ស៊ី លោកព្រីហ្គោហ្ស៊ីនតាមពិត ជាមនុស្សស្លាប់ទាំងរស់ ចាប់តាំងពីលោកលើកទាហានវ៉ាក់ណែរសំដៅ ក្រុងម៉ូស្គូ ដែលលោកប្រធានាធិបតីពូទីនចាត់ទុកជាទង្វើក្បត់ ចាក់ពីក្រោយខ្នង។
លោកព្រីហ្គោហ្ស៊ីនស្លាប់នៅក្នុងគ្រោះថ្នាក់យន្តហោះ មិនមែនជារឿងដែលគេភ្ញាក់ផ្អើល ប៉ុន្តែ អ្វីដែលធ្វើឲ្យភ្ញាក់ផ្អើលចម្លែកចិត្តនៅត្រង់ថា ហេតុអ្វីបានជាលោកពូទីន បន្តទុកជីវិតឲ្យលោកព្រីហ្គោហ្ស៊ីនបានយូរដល់ទៅ២ខែ បើទោះបីជាលោកព្រីហ្គោហ្ស៊ីនជាមនុស្សដែលលោកចាត់ទុកជាជនក្បត់ ចាក់ពីក្រោយខ្នង គ្រោះថ្នាក់សម្រាប់អំណាចរបស់លោក ពីព្រោះហ៊ានលើកទាហានវ៉ាក់ណែរទៅលើកទាហានវ៉ាក់ណែរបះបោរប្រឆាំងអំណាចរបស់លោក។ អ្នកជំនាញដែលស្គាល់ចរិតរបស់លោកពូទីនកាន់តែភ្ញាក់ផ្អើល ព្រោះថា បទពិសោធន៍កន្លងមក បង្ហាញថា អ្នកចេញមុខប្រឆាំងរិះគន់លោកពូទីន បើមិនត្រូវឃាតករបាញ់សម្លាប់ កណ្តាលផ្លូវ ឬត្រូវគេដាក់ថ្នាំពុលសម្លាប់ទេ ក៏ត្រូវជាប់ពន្ធនាគារ ដូចជាមេបក្សប្រឆាំង លោកណាវ៉ាល់នីជាដើម។
សម្រាប់អ្នកជំនាញ ទង្វើរបស់លោកព្រីហ្គោហ្ស៊ីនដែលដឹកនាំទាហានវ៉ាក់ណែរបះបោរ ប្រឆាំងថ្នាក់ដឹកនាំរុស្ស៊ី បានធ្វើឲ្យលោកពូទីនអាម៉ាស់មុខខ្លាំង។ នៅរុស្ស៊ី រូបភាពរបស់លោកពូទីនកាន់តែចុះស្រអាប់ ព្រោះថា លោកព្រីហ្គោហ្ស៊ីន ដែលជាមេឧក្រិដ្ឋជន ហ៊ានលើកទ័ពបែរក្បាលមកប្រឆាំងរដ្ឋអំណាចម៉ូស្គូ បែរជាត្រូវលោកពូទីនមិនប្រកាន់ទោសពៃ ដោយគ្រាន់តែនិរទេសទៅនៅបេឡារុស។
ប៉ុន្តែ នៅថ្ងៃពុធទី ២៤ ចំពេល២ខែគត់ នៃការបះបោររបស់ទាហានវ៉ាក់ណែរ លោកព្រីហ្គោហ្ស៊ីន និងថ្នាក់ដឹកនាំសំខាន់ៗរបស់ក្រុមហ៊ុនទាហានស៊ីឈ្នួលវ៉ាក់ណែរ ស្លាប់ទាំងអស់នៅក្នុងគ្រោះថ្នាក់ធ្លាក់យន្តហោះ។ នេះសបញ្ជាក់ឲ្យឃើញថា លោកពូទីនមិនបានភ្លេច ហើយក៏មិនអត់ឱនដាច់ខាតសម្រាប់អ្នកដែលគ្រោះថ្នាក់ គំរាមកំហែងអំណាចរបស់លោក។ តាមរយៈ ករណីធ្លាក់យន្តហោះដឹកមេក្រុមវ៉ាក់ណែរ មេដឹកនាំរុស្ស៊ី មានសារពីរ។ ទី១ លោកចង់ផ្ញើសារ បង្រ្កាបទឹកចិត្តរបស់ទាហានវ៉ាក់ណែរ ដែលជាកូនចៅអ្នកគាំទ្រស្មោះស្ម័គ្ររបស់ព្រីហ្គោហ្ស៊ីន និងសារមួយទៀត ទៅកាន់មនុស្សរាល់គ្នានៅរុស្ស៊ីដែលមានគំនិត ចង់ធ្វើការតស៊ូអាវុធប្រឆាំងនឹងលោកថា កុំឲ្យព្យាយាម ព្រោះថា មានគំរូរួចស្រាប់ហើយ។ អ្នកដែលប្រឆាំងលោកពូទីនគឺជួបវាសនាអាក្រក់ដូចជាលោកព្រីហ្គោហ្ស៊ីនយ៉ាងដូច្នេះឯង។
អស់មេកើយ តើទាហានស៊ីឈ្នួលរុស្ស៊ីវ៉ាក់ណែរ នឹងទៅជាយ៉ាងណា?
ដោយសារការបះបោរមិនបានសម្រេចនៅម៉ូស្គូ លោកព្រីហ្គោហ្ស៊ីន បានក្លាយជាសំរាមក្នុងកែវភ្នែករបស់លោកពូទីន និងថ្នាក់ដឹកនាំយោធារុស្ស៊ី។ ប៉ុន្តែ នៅទីក្រុងSaint Petersburg ជាទីដែលមានទីស្នាក់ការក្រុមហ៊ុនវ៉ាក់ណែរ ដែលរើសបញ្ចូលទាហានសម្រាប់ការប្រយុទ្ធនៅទឹកដីបរទេស លោកព្រីហ្គោហ្ស៊ីនទទួលបានការគោរពស្មោះស័្មគ្រពីកូនទាហានវ៉ាក់ណែរដែលបានចាត់ទុកលោកជាមេដឹកនាំគំរូយកចិត្តទុកដាក់ពីកូនចៅ។ ទាហានវ៉ាក់ណែរមួយចំនួនធំធ្លាប់ជាអ្នកទោសដែលលោកព្រីហ្គោហ្ស៊ីនបានរើសចេញពីពន្ធនាគារ។ ពួកគេបានទទួលការលើកលែងទោស ជាថ្នូរនឹងការធ្វើសង្រ្គាមនៅអ៊ុយក្រែន រយៈពេល ៦ខែ។ អាមេរិកធ្លាប់វាយតម្លៃថា ក្រុមទាហានស៊ីឈ្នួលវ៉ាក់ណែរ ដែលធ្លាប់សកម្មនៅក្នុងសង្រ្គាមអ៊ុយក្រែន មានចំនួនបរ្មាណ ៥ម៉ឺននាក់ ដែលនៅក្នុងនោះ ៤ម៉ឺននាក់ហើយ ជាឧក្រិដ្ឋជនអ្នកទោសក្នុងពន្ធនាគារ។ ក្រៅពីធ្វើសង្រ្គាមនៅអ៊ុយក្រែន ទាហានវ៉ាក់ណែរមានវត្តមាននៅទឹកដីអាហ្វ្រិក ដើម្បីផ្តល់សេវាការពារសន្តិសុខផ្ទាល់ខ្លួន ដល់ថ្នាក់ដឹកនាំឬការពារក្រុមហ៊ុនដែលធ្វើអាជីវកម្មជីកយកប្រេង មាស ជាដើម។ លែងមានមេកើយគ្រប់គ្រងតទៅទៀត ក្រុមហ៊ុនទាហានស៊ីឈ្នួលវ៉ាក់ណែររង្គោះរង្គើ។ ទាហានវ៉ាក់ណែរអាចបែកបាក់គ្នាជាក្រុមនិងបន្តធ្វើជំនួញដើម្បីផលប្រយោជន៍រៀងៗខ្លួន ដោយលែងមានរចនាសម្ព័ន្ធគ្រប់គ្រងដូចមុន។ ការបំបែកកម្ចាយទាហានវ៉ាក់ណែរដើម្បីឲ្យពួកគេលែងមានអំណាច អំណួតខ្លាំងដូចមុន ជាគោលដៅចង់បានរបស់លោកពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ