អ្នកជំនាញ៖ក្រុមហ៊ុនទាហានស៊ីឈ្នួលរុស្ស៊ី Wagner លែងមាននៅអ៊ុយក្រែនទៀតឡើយ
តាំងពីក្រោយការងើបបះបោររបស់មេក្រុមហ៊ុនទាហានស៊ីឈ្នួលរុស្ស៊ី Wagner លោកព្រី ហ្គោហ្ស៊ីនមក ព័ត៌មានជុំវិញលោកព្រី ហ្គោហ្ស៊ីន កូនទាហានរបស់គាត់ និងរចនាសម្ព័ន្ធរបស់ Wagner កំពុងបន្តស្រពិចស្រពិល។ មានព័ត៌មានជាច្រើនបានធ្លាក់មកនារយៈពេលចុងក្រោយនេះ។ តាមក្រសួងការពារជាតិអាមេរិក ទាហាន Wagner លែងចូលរួមប្រយុទ្ធនៅក្នុងសង្រ្គាមអ៊ុយក្រែនក្នុងទ្រង់ទ្រាយធំដូចមុនទៀតឡើយ។ ចំណែកនៅរុស្ស៊ី វិមានក្រឹមឡាំងបាននិយាយក្នុងថ្ងៃសុក្រ ទី១៤ កក្កដាថា រុស្ស៊ីកំពុងពិចារណាពីការបង្កើតឲ្យមានច្បាប់មួយសម្រាប់ក្រុមហ៊ុនទាហានឯកជន ដូចករណី Wagner។ ថ្លែងទៅកាន់ក្រុមអ្នកកាសែតនៅក្រុងមូស្គូ អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវបានបញ្ជាក់ថា បើគិតតាមផ្លូវច្បាប់ គ្មានក្រុមហ៊ុន Wagner និងក៏មិនដែលមានក្រុមហ៊ុននេះនៅរុស្ស៊ីដែរ។ តាមលោកប៉េស្កូវ នេះជាសំណួរមួយដែលរុស្ស៊ីនឹងពិនិត្យ សិក្សាបន្ថែម។ តើការពិតនៅត្រង់ណា និងថា តើទ័ព Wagner កំពុងបន្តប្រយុទ្ធនៅអ៊ុយក្រែនទៀតដែរ ឬទេ។
ចុះផ្សាយនៅថ្ងៃ៖
ស្តាប់ - ០១:៣៦
« តាំងពីក្រោយការងើបបះបោររបស់លោកព្រីហ្គោហ្ស៊ីនដែលមេក្រុមហ៊ុនទាហានស៊ីឈ្នួលរុស្ស៊ី Wagner មក ទ័ព Wagner ត្រូវបានគេទុកឲ្យមានជម្រើសចំនួន ៣ ឬមួយចូលរួមជាមួយទាហានរុស្ស៊ី ឬមួយធ្វើដំណើរទៅកាន់ប្រទេសបេឡារុស និងឬមួយក៏ត្រឡប់ទៅផ្ទះរបស់ពួកគេវិញ។ នៅក្នុងរឿងត្រឡប់ទៅផ្ទះរបស់ពួកគេវិញនេះ គេមិនដឹងថាតើផ្ទះរបស់ពួកគេនៅទីណាពិតប្រាកដ ហើយគេក៏គ្មានព័ត៌មានអ្វីដែរ។
ចំណែករឿងទៅកាន់ប្រទេសបេឡារុសទៀតសោតក៏គេនៅមិនទាន់មានការដោះស្រាយឲ្យបានច្បាស់លាស់ទៀត។ តែបើទ័ព Wagner ទៅចូលរួមជាមួយទ័ពរុស្ស៊ីមានន័យថា រចនាសម្ព័ន្ធរបស់ Wagner លែងមានទៀតឡើយ។ ទាក់ទងនឹងគ្រឿងសព្វាវុធរបស់ Wagner វិញ តាមពិត ទូរទស្សន៍រុស្ស៊ីបានបង្ហាញឲ្យឃើញពីការប្រគល់គ្រឿងសព្វាវុធរបស់ Wagner ទៅឲ្យទាហានរុស្ស៊ី។
ខ្ញុំបានឃើញរូបភាពទាំងនេះ ក្នុងនោះ មានគ្រឿងសពា្វវុធខ្លះជាគ្រឿងសពា្វវុធទំនើប តែមានគ្រឿងសព្វាវុធចាស់ៗយ៉ាងច្រើន។ បន្ទាប់មក គេបានឃើញគ្រឿងសព្វាវុធមួយចំនួនដែលខ្ញុំគិតថា ទើបយកចេញពីឃ្លាំងស្តុក។ ដូច្នេះខ្ញុំមិនដឹងថា តើគ្រឿងសព្វាវុធចេញពីឃ្លាំងស្តុកទាំងនោះជារបស់ Wagner ពិតប្រាកដ ឬមួយក៏គ្រាន់ជាព្រឹត្តិការណ៍ផ្សព្វផ្សាយដើម្បីបន្លំភ្នែកមហាជន។
តែទោះជាយ៉ាងណាក៏ដោយ និងតាមធម្មតា គ្រឿងសព្វាវុធរបស់ Wagner ត្រូវតែប្រគល់ទៅឲ្យកងទ័ពរុស្ស៊ី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ