ទីភ្នាក់ងារព័ត៌មានរុស្ស៊ី៖ លោកព្រីហ្គោហ្សីន ស្លាប់ដោយធ្លាក់យន្តហោះ
មេក្រុមទាហានស៊ីឈ្នួលវ៉ាក់ណែ លោកព្រីហ្គោហ្សីន ស្ថិតក្នុងចំណោមអ្នកដំណើរដែលបានស្លាប់ ក្រោយធ្លាក់យន្តហោះ កាលពីថ្ងៃពុធម្សិលមិញ នៅភាគខាងជើងទីក្រុងម៊ូស្គូ។ ហេតុការណ៍នេះ បានកើតឡើងប្រមាណ២ខែ ក្រោយមេក្រុមទាហានស៊ីឈ្នួលដ៏មានឥទ្ធិពលនេះ បានប្រកាសដឹកនាំការបះបោរផ្ដួលរំលំអំណាចយោធារុស្ស៊ី។ ប្រធានាធិបតីអាមេរិក លោក ចូ បៃឌិន ថា លោកមិនមានការភ្ញាក់ផ្អើលអ្វីនោះឡើយ។
ចុះផ្សាយនៅថ្ងៃ៖
ស្តាប់ - ០២:១៤
មេក្រុមទាហានស៊ីឈ្នួលដ៏មានឥទ្ធិពលគឺ លោក អេវហ្គីនី ព្រីហ្គោហ្សីន ត្រូវបានទីភ្នាក់ងារព័ត៌មានរុស្ស៊ីTASS នៅថ្ងៃពុធម្សិលមិញ រាយការណ៍ថា លោកស្ថិតនៅលើយន្តហោះដែលបានធ្លាក់ស្លាប់អ្នកដំណើរទាំងអស់ កាលពីល្ងាចថ្ងៃពុធម្សិលមិញ នៅតំបន់Tver ភាគខាងជើងទីក្រុងម៊ូស្គូ។ ហេតុការណ៍ធ្លាក់យន្តហោះដ៏គួរឲ្យសង្ស័យនេះ បានកើតឡើង នៅប្រមាណ២ខែ ក្រោយមេក្រុមហ៊ុនទាហានស៊ីឈ្នួលដ៏មានឥទ្ធិពលនេះ បានដឹកនាំការបះបោរសំដៅផ្ដួលរំលំអំណាចមេដឹកនាំយោធារុស្ស៊ី។ យ៉ាងណាមិញ គិតព្រឹកថ្ងៃព្រហស្បត្តិ៍នេះ មិនទាន់មានការបញ្ជាក់ជាផ្លូវការ ពីវិមានក្រឹមឡាំង ឬក្រសួងការពារជាតិរុស្ស៊ី ចំពោះករណីនេះនៅឡើយនោះទេ។
ក្រសួងស្ថានការណ៍គ្រាអាសន្នរបស់រុស្ស៊ី នៅថ្ងៃពុធម្សិលមិញ បានបញ្ជាក់ថា យន្តហោះដែលបានធ្លាក់នេះ ជាប្រភេទយន្តហោះឯកជន ផ្ទុកអ្នកដំណើរសរុបចំនួន១០នាក់ ធ្វើដំណើរពីទីក្រុងMoscow ទៅកាន់ទីក្រុង Saint Petersburg នៃប្រទេសរុស្ស៊ី។ នៅចំពោះមុខនេះ គណៈកម្មាធិការស៊ើបអង្កេតរបស់រុស្ស៊ី ក៏បានបើកសំណុំរឿងស៊ើបអង្កេតព្រហ្មទណ្ឌ លើហេតុការណ៍មួយនេះផងដែរ។ នេះបើយោងតាមសេចក្ដីថ្លែងការណ៍ផ្លូវការមួយរបស់លោកស្រី Svetlana Petrenko។
គួរជម្រាបថា អំឡុងហេតុការណ៍នេះ ប្រធានាធិបតីរុស្សីលោក វ្ល៉ាឌីមៀរ ពូទីន បានឡើងថ្លែងសុន្ទរកថា ក្នុងឱកាសប្រារព្ធខួបលើកទី៨០នៃសមរភូមិKursk ក្នុងសង្គ្រាមលោកលើកទី២ តែលោកមិនបាននិយាយអ្វីពាក់ព័ន្ធនឹងហេតុការណ៍នេះនោះទេ ។ ចំណែក ប្រធានាធិបតីអាមេរិក លោក ចូ បៃឌិន ដែលកំពុងធ្វើវិស្សមកាលឯណោះវិញ បានឆ្លើយតបជាមួយអ្នកកាសែតថា លោកមិនទាន់បានដឹងច្បាស់ពីហេតុការណ៍នេះឡើយ ក៏ប៉ុន្តែលោកអះអាង លោកក៏មិនមានការភ្ញាក់ផ្អើលអ្វីនោះដែរ។
ទន្ទឹមនឹងនេះ អ្នកជំនាញនិងជាអ្នកប្រឹក្សាជាន់ខ្ពស់ លោក Keir Giles បានលើកឡើងថា ហេតុការណ៍នេះ អាស្រ័យថាអ្នកដំណើរនោះ គឺពិតជាលោកPrigozhinមែន ឬក៏ជាអ្នកណាផ្សេងដែលធ្វើដំណើរក្រោមឈ្មោះមេក្រុមទាហានស៊ីឈ្នួលរូបនេះ ក្រោមវិធានការការពារសុវត្ថិភាព។ យ៉ាងណាមិញ លោកបញ្ជាក់ដែរថា លោកក៏មិនមានការភ្ញាក់ផ្អើលដែរ ដោយអ្វីដែលត្រូវភ្ញាក់ផ្អើលនោះ គឺការណ៍ដែលលោកព្រីហ្គោហ្សីន អាចនៅមានជីវិតបានយ៉ាងយូរ ក្រោយការដឹកនាំការបះបោរប្រឆាំងអំណាចយោធារុស្ស៊ីនេះ។
យោងតាមទិន្នន័យតាមដានការហោះហើរ(Flight Tracking Data) យន្តហោះ Embraer – 135 (ЕВМ-135BJ)ដែលបានធ្លាក់នេះ មិនបានបង្ហាញសញ្ញាថាមានបញ្ហាអ្វីឡើយ ក្រៅតែពីបានហោះធ្លាក់ចុះយ៉ាងគំហុក អំឡុងប្រមាណ៣០វិនាទីចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ