អង់គ្លេសដាក់ទាហានស៊ីឈ្នួលរុស្ស៊ីWagnerក្នុងបញ្ជីក្រុមភេរវនិយម
អង់គ្លេសរៀបចំសេចក្តីព្រាងក្រឹត្យដើម្បីដាក់បញ្ចូលពួកទាហានស៊ីឈ្នួលវ៉ាក់ណែរ Wagnerទៅក្នុងបញ្ជីក្រុមភេរវនិយម។ តាមអំណះអំណាងរបស់ក្រសួងមហាផ្ទៃអង់គ្លេស ក្រុមទាហានស៊ីឈ្នួលវ៉ាក់ណែរ ជាក្រុមប្រដាប់អាវុធហិង្សា បំផ្លិចបំផ្លាញ និងជាអាវុធរបស់រុស្ស៊ីដើម្បីធ្វើសង្រ្គាមនៅទឹកដីបរទេស។ សេចក្តីព្រាងក្រឹត្យរៀបចំដោយក្រសួងមហាផ្ទៃត្រូវបញ្ជូនទៅឲ្យសភាអង់គ្លេសបោះឆ្នោតអនុម័តនៅថ្ងៃពុធទី៦ខែសីហាឆ្នាំ ២០២៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
រដ្ឋមន្រ្តីក្រសួងការពារជាតិអង់គ្លេស លោក Grant Shapps បាននិយាយថា អង់គ្លេសនឹងដាក់បញ្ចូលក្រុមទាហានស៊ីឈ្នួលវ៉ាក់ណែរ ទៅក្នុងបញ្ជីឈ្មោះក្រុមភេរវនិយម ឲ្យដូចក្រុមអាល់កៃដា ឬក្រុមអង្គការរដ្ឋអ៊ីស្លាម។ ទៅតាមសេចក្តីព្រាងក្រឹត្យដែលសភាអង់គ្លេសត្រូវបោះឆ្នោតអនុម័តនៅថ្ងៃពុធ ការចូលជាសមាជិក ឬគាំទ្រ ជំរុញ ផ្សព្វផ្សាយ លើកទង់សញ្ញាវ៉ាក់ណែរនៅទីសាធារណៈ ជារឿងខុសច្បាប់ និងត្រូវប្រឈមនឹងការដាក់ទោសជាប់ពន្ធនាគារ ១៤ឆ្នាំ នៅអង់គ្លេស។
ការដាក់ក្រុមទាហានស៊ីឈ្នួលវ៉ាក់ណែរក្នុងបញ្ជីឈ្មោះក្រុមភេរវនិយម មានន័យដែរថា រាល់ទ្រព្យសម្បត្តិរបស់ក្រុម វ៉ាក់ណែរ Wagnerជាទ្រព្យរបស់ក្រុមភេរវនិយម ដែលអាជ្ញាធរមានសិទ្ធិរឹបអូសយកមកជាសម្បត្តិរដ្ឋ។
តាមសេចក្តីថ្លែងការណ៍របស់រដ្ឋមន្រ្តីក្រសួងមហាផ្ទៃអង់គ្លេស លោកស្រី Suella Braverman ក្រុមទាហានស៊ីឈ្នួលវ៉ាក់ណែរ Wagnerជាក្រុមហិង្សា បំផ្លិចបំផ្លាញ និងជាឧបករណ៍ធ្វើសង្រ្គាមនៅទឹកដីបរទេសរបស់មេដឹកនាំរុស្ស៊ី លោកពូទីន។ បង្កើតឡើងដោយលោកពូទីន ក្រុមទាហានស៊ីឈ្នួលវ៉ាក់ណែរចូលរួមក្នុងការឆក់ប្លន់ ប្រព្រឹត្តឧក្រិដ្ឋកម្ម ធ្វើទារុណកម្ម និងសម្លាប់មនុស្សដ៏ព្រៃផ្សៃ។
សម្រាប់រដ្ឋមន្រ្តីក្រសួងមហាផ្ទៃអង់គ្លេស ក្រុមទាហានស៊ីឈ្នួលរុស្ស៊ី វ៉ាក់ណែរ Wagnerជាក្រុមគំរាមកំហែង សន្តិសុខពិភពលោក។ ក្រៅពីចូលប្រលូកធ្វើសង្រ្គាមនៅទឹកដីអ៊ុយក្រែន ដើម្បីរុស្ស៊ី ក្រុមទាហានស៊ីឈ្នួលវ៉ាក់ណែរ Wagnerកំពុងធ្វើប្រតិបត្តិការយ៉ាងសកម្ម នៅទឹកដីស៊ីរី និងប្រទេសជាង ១០នៅអាហ្វ្រិក ដូចជា លីប៊ី និងម៉ាលីជាដើម។ ទាហានវ៉ាក់ណែរមួយចំនួនធំ ធ្លាប់ជាអ្នកទោសដែលលោកព្រីហ្គោហ្ស៊ីនរើសចេញពីពន្ធនាគារ។ ពួកគេបានទទួលការលើកលែងទោសពីអាជ្ញាធររុស្ស៊ី ជាថ្នូរនឹងការធ្វើសង្រ្គាមនៅអ៊ុយក្រែន រយៈពេល ៦ខែ។ តាមអាមេរិក ក្រុមទាហានស៊ីឈ្នួលវ៉ាក់ណែរ៥ម៉ឺននាក់ បានប្រលូកក្នុងសង្រ្គាមអ៊ុយក្រែន ដែលនៅក្នុងនោះ ៤ម៉ឺននាក់ ធ្លាប់ជាឧក្រិដ្ឋជន អ្នកទោសជាប់ពន្ធនាគារ។
នៅមុនចាត់បញ្ចូលក្រុមទាហានវ៉ាក់ណែរ Wagnerទៅក្នុងបញ្ជីក្រុមភេរវនិយម អង់គ្លេសធ្លាប់ប្រកាសដាក់ទណ្ឌកម្មលើមេក្រុមទាហានស៊ីឈ្នួលវ៉ាក់ណែរ លោកព្រីហ្គោហ្ស៊ីន និងមនុស្ស១៣នាក់ ដែលជាប់ពាក់ព័ន្ធនឹងក្រុមទាហានវ៉ាក់ណែរនៅទឹកដីអាហ្វ្រិក នៅក្នុងបទចោទប្រកាន់ប្រព្រឹត្តឧក្រិដ្ឋកម្មសង្រ្គាម។
អង់គ្លេសប្រកាសដាក់ក្រុមទាហានស៊ីឈ្នួលរុស្ស៊ី វ៉ាក់ណែរ ទៅក្នុងបញ្ជីក្រុមភេរវនិយម នៅ២សប្តាហ៍ក្រោយ ដែលលោកព្រីហ្គោហ្ស៊ីន និងថ្នាក់ដឹកនាំសំខាន់ៗរបស់ក្រុមទាហានស៊ីឈ្នួលវ៉ាក់ណែរ ស្លាប់នៅក្នុងគ្រោះថ្នាក់ធ្លាក់យន្តហោះ នៅភាគខាងជើងទីក្រុងម៉ូស្គូ។ ក្រុមស៊ើបអង្កេតរុស្ស៊ីនៅមិនទាន់បង្ហាញមូលហេតុដែលធ្វើឲ្យយន្តហោះដឹកមេក្រុម Wagnerជួបគ្រោះថ្នាក់ធ្លាក់ផ្ទុះឆេះ កាលពីថ្ងៃទី ២៣សីហា ប៉ុន្តែ លោកខាងលិច ជឿថា វាអាចជាស្នាដៃរបស់លោកពូទីន ដែលមិនសប្បាយចិត្ត និងធ្លាប់ចាត់ទុកការបះបោររបស់មេក្រុមទាហានស៊ីឈ្នួល Wagnerប្រឆាំងរដ្ឋអំណាចម៉ូស្គូថា ជាទង្វើក្បត់ ចាក់ពីក្រោយខ្នងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ