ប្រមុខការទូតរុស្ស៊ីចោទក្រុមប្រទេសលោកខាងលិច ថាកំពុងវាយប្រយុទ្ធដោយផ្ទាល់មកលើរុស្ស៊ី
នៅក្នុងឱកាសអង្គមហាសន្និបាតលើកទី៧៨ នៃអង្គការសហប្រជាជាតិ ដែលប្រព្រឹត្តិធ្វើទៅនៅក្រុងញូយ៉ក លោកស៊ែហ្កី ឡាវរ៉ូវ ប្រមុខការទូតរុស្ស៊ី បានឆក់ឱកាស ថ្លែងសារវាយប្រហារមកលើក្រុមប្រទេសលោកខាងលិច ដែលមានសហរដ្ឋអាមេរិកជាមេដឹកមុខ។ ក្រៅពីបានបរិហារក្រុមប្រទេសលោកខាងលិច ថាជាអាណាចក្រនៃការភូតកុហក លោកប្រមុខការទូតរុស្ស៊ីបានរិះគន់មិនសំចៃមាត់ មកលើអង្គការសហប្រជាជាតិ និងបានទាមទារថាត្រូវតែធ្វើកំណែទម្រង់ស្ថាប័ននេះ ដើម្បីការពារក្រុមប្រទេសស្ថិតនៅភាគខាងត្បូងអឌ្ឍគោលនៃផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
ជាការពិតណាស់ ក្នុងសប្តាហ៍កន្លងទៅនេះ សំណុំរឿងធ្វើកំណែទម្រង់អង្គការសហប្រជាជាតិ ត្រូវបានគេលើកយកមកជជែកគ្នាយ៉ាងសកម្ម។ ជាលើកទី១ តាមរយៈសំឡេងរបស់ប្រមុខការទូតខ្លួន រុស្ស៊ីបានបង្ហាញការគាំទ្រចំពោះគម្រោងនេះ និងបានសង្កត់បន្ថែមនូវពាក្យរិះគន់ខ្លាំងៗ មកលើស្ថាប័នកំពូលនេះ ទាំងដែលធាតុពិត គឺរុស្ស៊ីខ្លួនឯង ដែលជាអ្នកបានប្រើសិទ្ធិវ៉េតូច្រើនដងជាងគេ ដើម្បីរារាំងដំណើរការរបស់ក្រុមប្រឹក្សាសន្តិសុខ។
នៅចំពោះមុខអង្គមហាសន្និបាត លោកស៊ែហ្កី ឡាវរ៉ូវ បានលើកឡើងថា “សម្រាប់រុស្ស៊ី គឺវាច្បាស់ណាស់ ដែលសហរដ្ឋអាមេរិក និងបណ្តាប្រទេសលោកខាងលិច ដែលរណបអាយ៉ាង បាននិងកំពុងតែបង្កវិវាទគ្រប់ទីកន្លែង ធ្វើឲ្យពិភពលោកបែកបាក់គ្នាជាច្រើនក្រុម”។ លោក ស៊ែហ្កី ឡាវរ៉ូវ បន្តថា “ក្រុមប្រទេសលោកខាងលិច ប្រឹងគ្រប់មធ្យោបាយដើម្បីរារាំង កុំឲ្យពិភពលោកមានសណ្តាប់ធ្នាប់រួមមួយ ដែលយុត្តិធម៌ និងពហុប៉ូល។ អ្វីដែលពួកគេចង់បាន គឺចង់តែដាក់សំពាធ ឲ្យពិភពលោកធ្វើតាមវិធានច្បាប់ដែលគេចង់បាន ដែលបម្រើអត្ថប្រយោជន៍គេតែប៉ុណ្ណោះ”។
សូមបញ្ជាក់ថា ក្រោយចប់សុន្ទរកថានេះ លោកស៊ែហ្កី ឡាវរ៉ូវ បានធ្វើសន្និសីទកាសែតមួយ កាលពីថ្ងៃសៅរ៍ទី២៣កញ្ញា។ អ្នកកាសែត បានចោទសួរលោក អំពី “ផែនការសន្តិភាព” ដែលលោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានស្នើនៅចំពោះមុខក្រុមប្រឹក្សាសន្តិសុខ ហើយយោងតាមផែនការនេះ អ៊ុយក្រែនទាមទារឲ្យរុស្ស៊ីត្រូវដកទ័ពចេញទាំងស្រុងពីទឹកដីអ៊ុយក្រែន។ លោកឡាវរ៉ូវ បានឆ្លើយទៅកាន់អ្នកកាសែតថា ផែនការនេះគឺមិនអាចសម្រេចទៅបានជាដាច់ខាត ព្រោះគ្មានថ្ងៃទេ ដែលរុស្ស៊ីនឹងដកទ័ពចេញពីអ៊ុយក្រែន។
អ្នកកាសែត បានជជីកសួរបន្តទៀត ស្តីអំពីការចូលរួមរបស់ក្រុមប្រទេសលោកខាងលិច នៅក្នុងសង្គ្រាមនៅអ៊ុយក្រែន។ លោកឡាវរ៉ូវ បានឆ្លើយថា គ្រប់គ្នាដឹងច្បាស់ហើយ ថាអាមេរិក អង់គ្លេស និងបក្សពួកផ្សេងទៀត កំពុងតែវាយប្រយុទ្ធមកលើរុស្ស៊ីដោយផ្ទាល់ ដោយខ្ចីដៃខ្ចីកម្លាំងទាហានរបស់អ៊ុយក្រែន។ លោកប្រមុខការទូតរុស្ស៊ី បានបន្តទៀតថា តាមរយៈការផ្តល់អាវុធដ៏សន្ធឹកមកឲ្យអ៊ុយក្រែន គឺក្រុមប្រទេសលោកខាងលិច ដែលមានអាមេរិកជាមេដឹកច្រមុះនោះ មិនមែនចង់ជួយអ៊ុយក្រែននោះទេ។ តែក្រុមនេះ ចង់វាយប្រយុទ្ធមកលើរុស្ស៊ីដោយផ្ទាល់។ លោកឡាវរ៉ូវ ចោទបរិហារទៀតថា ក្រុមប្រទេសលោកខាងលិចកំពុងធ្វើ “សង្គ្រាមលាក់មុខ” ដែលធាតុពិតជាក់ស្តែង គឺវាគ្មានខុសអ្វី ពីសង្គ្រាមមែនទែននោះឡើយ ព្រោះថាពួកលោកខាងលិច ផ្តល់លុយ ផ្តល់អាវុធ និងបានបញ្ជូន “ពួកទាហានស៊ីឈ្នួល” ទៅអ៊ុយក្រែនថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ