ត្រឹមតែ២ឆ្នាំចុងក្រោយ ផ្ទាំងទឹកកកនៅស្វីសរលាយអស់ ក្នុងទំហំស្មើនឹងចន្លោះពីឆ្នាំ១៩៦០-១៩៩០
ក្នុងរវាង២ឆ្នាំចុងក្រោយ ផ្ទាំងទឹកកកនៅលើភ្នំប្រទេសស្វីស បានរលាយហូរជាទឹក អស់ក្នុងទំហំ ស្មើនឹងទំហំរលាយ ក្នុងរយៈពេល៣០ឆ្នាំ រវាងពីឆ្នាំ១៩៦០ដល់១៩៩០។ យោងតាមរបាយការណ៍ស្រាវជ្រាវថ្មី ដែលទើបតែចេញផ្សាយនៅថ្ងៃព្រហស្បតិ៍ ទី២៨កញ្ញា គឺលក្ខខណ្ឌឧតុនិយម ដែលកាន់តែដុនដាបខ្លាំងទៅ ដោយសារតែបម្រែបម្រួលអាកាសធាតុ បានធ្វើឲ្យផ្ទាំងទឹកកកនៅលើភ្នំស្វីស រលាយអស់យ៉ាងលឿនរហ័សបែបនេះ។
ចុះផ្សាយនៅថ្ងៃ៖
ស្តាប់ - ០៤:០៦
តើទៅថ្ងៃអនាគត ទេសភាពទឹកកកសក្បុះនៅលើកំពូលភ្នំស្រុកស្វីស អាចនឹងមានទៀតទេ?
រដូវរងារ ទឹកកកធ្លាក់កាន់តែតិចទៅៗ ហើយរដូវក្តៅវិញ សីតុណ្ហភាពកាន់តែក្តៅខ្លាំងទៅៗ។ នៅរវាងឆ្នាំ២០២២ ២០២៣ ផ្ទាំងទឹកកកនៅស្វីស បានរលាយអស់ក្នុងទំហំប្រមាណជា១០% នៃកម្រាសនិងទំហំរួមរបស់វា។ នេះបើផ្អែកតាមការសិក្សាពិនិត្យ របស់ក្រុមអ្នកជំនាញ នៅបណ្ឌិតសភាស្វីសដើម្បីការសិក្សាវិទ្យាសាស្ត្រធម្មជាតិ។ ជាការសន្និដ្ឋានដ៏ច្បាស់ គឺផ្ទាំងទឹកកកនៅស្វីស បានរលាយកាន់តែលឿនរហ័ស។
ពីមួយឆ្នាំទៅមួយឆ្នាំ កត្តាឧតុនិយមកាន់តែមិនអំណោយផល ដល់តុល្យភាពលំនឹងនៃទំហំផ្ទាំងទឹកកក។ ឆ្នាំ២០២២ផ្ទាំងទឹកកកនៅស្វីសបានរលាយ ស្រកទំហំអស់ប្រមាណ៦% ដែលជាទំហំរលាយស្រកដ៏ច្រើនមិនធ្លាប់មានរួចទៅហើយ។ នៅឆ្នាំ២០២៣ ទំហំនេះចុះស្រកចំនួន៤%បន្ថែមទៀត។
លោក Mathias Huss ប្រធានបណ្តាញទិន្នន័យស្រាវជ្រាវអំពីផ្ទាំងទឹកកកស្វីស (Glamos) បានប្រាប់ទីភ្នាក់ងារព័ត៌មានបារាំង AFP ថា ជាមួយនឹងល្បឿនដូច២ឆ្នាំកន្លងមកនេះ គឺនៅឆ្នាំខាងមុខៗ វានឹងក្លាយជាឆ្នាំដ៏អាក្រក់សម្រាប់ផ្ទាំងទឹកកក។ លោកបានអំពាវនាវថា ត្រូវតែមានវិធានការឲ្យបានឆាប់បំផុត ដើម្បីរក្សាលំនឹងអាកាសធាតុ ដោយធ្វើយ៉ាងណា ទាញការបញ្ចេញឧស្ម័នកាបូនិក ឲ្យមកនៅត្រឹមសូន្យ ប្រសិនបើគេចង់រក្សាផ្ទាំងទាំងកកនៅស្វីស ឲ្យនៅគង់វង្សក្នុងទំហំ១ភាគ៣។ លោកថ្លែងក្នុងក្តីអស់សង្ឃឹមថា ទៅថ្ងៃអនាគត ផ្ទាំងទឹកកកតូចៗអាចនឹងរលាយអស់រលីង ខណៈផ្ទាំងធំៗអាចរួញខើចនៅសល់ទំហំតូច។ តែយ៉ាងណា ក៏វាអាចនៅសល់ខ្លះ នៅតាមកំពូលភ្នំខ្ពស់ៗ ដើម្បីទុកឲ្យកូនចៅជំនាន់ក្រោយបានឃើញដែរ។
យោងតាមរបាយការណ៍សិក្សា នៅតំបន់ភាគខាងត្បូងស្វីស ផ្ទាំងទឹកកកបានរលាយនៅឆ្នាំ២០២៣ មានទំហំសឹងតែស្មើឆ្នាំ២០២២ ដោយសារតែសីតុណ្ហភាពក្តៅខ្លាំង។ យ៉ាងណាមិញ តំបន់ Valais និង Engadine គេសង្កេតឃើញថាផ្ទាំងទឹកកកដែលស្ថិតនៅកំពស់ ៣២០០ម៉ែត្រ ក៏បានចាប់ផ្តើមរលាយដែរ។ តាមធម្មតាពីមុនមក នៅកំពស់ខ្ពស់បែបនេះ គឺផ្ទាំងទឹកកកអាចរក្សាតុល្យភាពបានពីមួយឆ្នាំទៅមួយឆ្នាំ។ តែខែមិថុនាឆ្នាំ២០២៣ សីតុណ្ហភាពក្តៅខ្លាំងនៅស្វីស បានធ្វើឲ្យរលាយអស់ នូវស្រទាប់ព្រឹលទឹកកកដែលបានធ្លាក់កាលពីរដូវរងារ ក្នុងរយៈពេលចន្លោះពី២ទៅ៤សប្តាហ៍លឿនជាងធម្មតា។
គួរបញ្ជាក់ថា ស្វីសត្រូវគេចាត់ទុកថា គឺជាអ្នកផ្គត់ផ្គង់ទឹកសម្រាប់អឺរ៉ុបទាំងមូល តាមរយៈផ្ទាំងទឹកកកធំៗ ដែលមានចំនួនប្រមាណ១៤០០ទីតាំងនៅតាមកំពូលភ្នំ។ គឺផ្ទាំងទឹកកកទាំងនេះហើយ ដែលជាអ្នកផ្គត់ផ្គង់ទឹ កទៅតាមបឹង ស្ទឹង ទន្លេនានានៅអឺរ៉ុប។ ក្រុមអ្នកជំនាញអន្តររដ្ឋាភិបាល សិក្សាអំពីការវិវឌ្ឍន៍អាកាសធាតុ ហៅកាត់ថា GIEC បានចាត់ទុក ការរលាយផ្ទាំងទឹកកក ថាគឺជាការគំរាមដ៏ធំមួយក្នុងចំណោម១០ ដែលបណ្តាលមកពីការកើនឡើងនៃកំដៅផែនដី។ ហើយផ្អែកតាម របាយការណ៍មួយទៀត ចេញផ្សាយកាលពីខែមករា ក្នុងទស្សនាវត្តី The Science បានអះអាងថា ប្រសិនបើមនុស្សយើង មិនអាចទប់សីតុណ្ហភាពផែនដីកុំឲ្យឡើងលើសពី ១,៥°c ទេនោះ មានន័យថាយ៉ាងហោចណាស់ ផ្ទាំងទឹកកកចំនួនពាក់កណ្តាល នៅទូទាំងពិភពលោក នឹងត្រូវតែរលាយអស់ដោយចៀសមិនរួច នៅរវាងចុងសតវត្សទី២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ