សង្រ្គាមហ្កាហ្សា៖ អ.ស.បបារម្ភនៅចំពោះមុខការកើនឡើង ការស្អប់ជនជាតិជ្វីហ្វនិងអ្នកកាន់សាសនាអ៊ីស្លាម
ឧត្តមស្នងការសិទ្ធិមនុស្សរបស់អង្គការសហប្រជាជាតិសំដែង ការសោកស្តាយនៅចំពោះមុខនៃការកើនឡើងសកម្មភាពខឹងស្អប់ជនជាតិជ្វីហ្វ និងអ្នកកាន់សាសនាអ៊ីស្លាម។ យោងតាមសេចក្តីថ្លែងការណ៍របស់ឧត្តមស្នងការសិទ្ធិមនុស្ស ចុះផ្សាយនៅថ្ងៃសៅរ៍ទី៤ ចំនួនស្អប់ រើសអើងនៅក្នុងពិភពលោក បានកើនឡើងខ្លាំង នៅបន្ទាប់ពីអ៊ីស្រាអែលបើកការវាយប្រហារសងសឹកក្រុមហាម៉ាសប៉ាឡេស្ទីន នៅទឹកដីហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
នៅក្នុងបរិបទនៃសង្រ្គាមហ្កាហ្សា ករណីស្អប់ ប្រឆាំងជនជាតិជ្វីហ្វ អ្នកកាន់សាសនាអ៊ីស្លាម រួមទាំងសារស្អប់ជេរប្រមាថ នៅក្នុងពិភពលោក បានកើនឡើង ក្នុងកម្រិតមួយគួរឲ្យព្រួយបារម្ភ។ នេះបើតាមសេចក្តីថ្លែងការណ៍របស់ឧត្តមស្នងការសិទ្ធិមនុស្សរបស់អង្គការសហប្រជាជាតិដែលមានទីស្នាក់ការនៅទីក្រុងហ្សឺណែវ។
សម្រាប់ប្រធានឧត្តមស្នងការសិទ្ធិមនុស្ស លោក Volker Türk សង្រ្គាមវាយប្រហាររបស់អ៊ីស្រាអែលទៅលើតំបន់ហ្កាហ្សាដើម្បីសងសឹកក្រុមហាម៉ាសប៉ាឡេស្ទីន បានជះផលអាក្រក់ទៅគ្រប់ទីកន្លែង នៅក្នុងពិភពលោក មានជាអាទិ៍ ការស្អប់ និយាយប្រមាថ អំពើហិង្សា ការរើសអើង ការបែងបាក់នៅក្នុងសង្គម ការបដិសេធទាត់ចោលសិទ្ធិសេរីភាពបញ្ចេញមតិ និងការរឹតត្បិតហាមឃាត់ការជួបជុំដោយសន្តិវិធី។
នៅតាមប្រទេសអឺរ៉ុបមួយចំនួន ដូចជា បារាំង អាល្លឺម៉ង់ និងអង់គ្លេសជាដើម បាតុកម្មគាំទ្រប្រជាជនប៉ាឡេស្ទីន ត្រូវអាជ្ញាធរបិទខ្ទប់ ហាមមិនឲ្យរៀបចំ ឬបង្រ្កាបដោយហិង្សា នៅក្នុងហេតុផលសន្តិសុខជាតិ។ នៅអង់គ្លេស បន្ទាប់ពីក្រុមហាម៉ាសបើកការវាយប្រហារសម្លាប់មនុស្ស នៅអ៊ីស្រាអែល រដ្ឋាភិបាល ចេញច្បាប់ផាកពិន័យ ដាក់ទោសអ្នកដែលល្មើសលើកទង់សញ្ញាគាំទ្រក្រុមហាម៉ាសប៉ាឡេស្ទីន ដែលអង់គ្លេស ចាត់ទុកជាក្រុមភេរវនិយម។
នៅបណ្តាប្រទេសមួយចំនួន នៅអឺរ៉ុប សារស្អប់ជនជាតិជ្វីហ្វ ឬរូបសញ្ញាផ្កាយDavid ត្រូវបានគេសរសេរនៅតាមជញ្ជាំង ឬនៅលើផ្នូរជ្វីហ្វ។ ជាក់ស្តែង នៅប្រទេសបារាំង ជាទីដែលមានជនជាតិជ្វីហ្វ ៥សែននាក់ គេឃើញមានសញ្ញារូបផ្កាយ David ដែលជាសញ្ញាសំគាល់សាសនាជ្វីហ្វ គូសនៅលើជញ្ជាំងអគារនៅទីក្រុងប៉ារីស។ យោងតាម ការិយាល័យជាតិប្រយុទ្ធប្រឆាំង ការស្អប់នៅក្នុងលើបណ្តាញសង្គម គិតចាប់តាំងពីមានសង្រ្គាមហ្កាហ្សា គេរកឃើញមានសកម្មភាពប្រឆាំងស្អប់ជ្វីហ្វ ឬគាំទ្រក្រុមហាម៉ាស យ៉ាងតិច ១៦០ករណី។
ប្រធានឧត្តមស្នងការសិទ្ធិមនុស្សមិនលាក់លៀមក្តីកង្វល់ បន្ទាប់ពីលោកបានលឺជនជាតិជ្វីហ្វ ឬអ្នកកាន់សាសនាអ៊ីស្លាម មួយចំនួននិយាយថា ចាប់តាំងពីផ្ទុះមានសង្រ្គាមប្រយុទ្ធគ្នារវាងអ៊ីស្រាអែលនិងក្រុមហាម៉ាស នៅហ្កាហ្សា ពួកគេមានអារម្មណ៍ថា ពួកគេរស់នៅដោយគ្មានសុខសុវត្ថិភាព។
ឧត្តមស្នងការសិទ្ធិមនុស្សចេញសេចក្តីថ្លែងការណ៍ស្តីពីការកើនឡើងចំនួនស្អប់ជនជាតិជ្វីហ្វ និងអ្នកកាន់សាសនាអ៊ីស្លាម នៅប៉ុន្មានថ្ងៃក្រោយ អ្នកគាំទ្រប៉ាឡេស្ទីន បានលើកគ្នាសម្រុកចូល ទៅក្នុងអាកាសយានដ្ឋានមួយ នៅប្រទេសរុស្ស៊ី ដើម្បី ឆែកឆេរ ដេញដោលសួររកអត្តសញ្ញាណប័ណ្ណ ដើម្បីរកមុខជនជាតិជ្វីហ្វ ធ្វើដំណើរមកពីប្រទេសអ៊ីស្រាអែល។ ក្នុងចំណោមបាតុកររុស្ស៊ី គេឃើញមានផ្ទាំងបដាដែលសរសេរថា “Daguestan មិនទទួលជាដាច់ខាត ពួកឃាតករសម្លាប់កុមារប៉ាឡេស្ទីន”។ រីឯបុគ្គលខ្លះទៀត នាំគ្នាសម្រែកថា Allah Akbar ! ដែលមានន័យថា (ព្រះអាឡាធំដ៏អស្ចារ្យ) ក្នុងពេលដែលអ្នកខ្លះទៀតនាំគ្នាលើកគ្រវី ទង់ជាតិប៉ាឡេស្ទីន។
នេះជាទង្វើមួយទៀតដែលបង្ហាញការរើសអើង ស្អប់ប្រឆាំង ជនជាតិជ្វីហ្វ នៅក្នុងបរិបទដ៏តានតឹង ចាប់តាំងពីអ៊ីស្រាអែលធ្វើប្រតិបត្តិការវាយប្រហារឥតសំចៃទៅលើក្រុមហាម៉ាស ក្នុងតំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ