របាយការណ៍៖ អង់គ្លេសនិងប្រព័ន្ធហិរញ្ញវត្ថុសម្រួលជួយឥស្សរជនពុករលួយអាស៊ីកណ្តាល
អង់គ្លេស និងប្រព័ន្ធហិរញ្ញវត្ថុដ៏មានឥទ្ធិពលរបស់ប្រទេសនេះបានក្លាយជាអ្នកបើកផ្លូវ ជួយឥស្សរជនពុករលួយមកពីបណ្តាប្រទេសនៅអាស៊ីកណ្តាល។ នេះបើតាមរបាយការណ៍ ដែលគណៈកម្មការកិច្ចបរទេសរបស់សភាអង់គ្លេស ចេញផ្សាយកាលពីថ្ងៃសុក្រទី១០វិច្ឆិកា។ នៅក្នុងសេចក្តីប្រកាសព័ត៌មាននៅថ្ងៃដដែល គណៈកម្មការសភាអង់គ្លេសអំពាវនាវឲ្យរដ្ឋាភិបាលអង់គ្លេស ផ្តល់ធនធានបន្ថែមដើម្បីពង្រឹងសមត្ថភាពភ្នាក់ងារប្រយុទ្ធប្រឆាំងការលាយលុយកខ្វក់តាមរយៈប្រព័ន្ធធនាគារអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
អង់គ្លេស និងប្រព័ន្ធហិរញ្ញវត្ថុដ៏មានឥទ្ធិពលរបស់ប្រទេសនេះបានក្លាយជាអ្នកជួយសម្រួលបើកផ្លូវដ៏សំខាន់សម្រាប់ឥស្សរជនពុករលួយនៅបណ្តាប្រទេសអាស៊ីកណ្តាល ដែលមានដូចជាកាហ្សាក់ស្ថាន កៀហ្សីស៊ីស្ថាន តាហ្ស៊ីគីស្ថាន តួកមេនីស្ថាន និងអ៊ូសបេគីស្ថាន។ នៅក្នុងរបាយការណ៍របស់ខ្លួនកម្រាស់៧០ទំព័រ គណៈកម្មការកិច្ចការបរទេសរបស់សភាអង់គ្លេស លើកឡើងពីការជាប់ពាក់ព័ន្ធគ្នារវាងការជួញដូរគ្រឿងញៀននៅអាស៊ីកណ្តាល ហើយនិងថ្នាក់ដឹកនាំ ឥស្សរជនរបស់ប្រទេសទាំងនេះរួមទាំងបទឧក្រិដ្ឋដែលមានការរៀបចំ។
បើតាមរបាយការណ៍របស់សភាអង់គ្លេស លុយកខ្វក់ដែលមានប្រភពចេញមកពីការជួញដូរគ្រឿងញៀននៅអាស៊ីកណ្តាល បានឆ្លងកាត់ធនាគារអង់គ្លេស ដូចជាCity of Londonជាដើម។ សម្រាប់គណៈកម្មការកិច្ចការបរទេសរបស់សភាអង់គ្លេស ច្បាស់ណាស់ថា ការអនុវត្តមានកម្រិតនៅក្នុងការប្រយុទ្ធប្រឆាំងនឹងឧក្រិដ្ឋកម្មហិរញ្ញវត្ថុ ឬភាពអសកម្មបានធ្វើឲ្យអង់គ្លេសជាប់ឈ្មោះជាអ្នកចូលរួមប្រព្រឹត្តបទឧក្រិដ្ឋ និងអនុញ្ញាតឲ្យពួកឥស្សរជនអាស៊ីកណ្តាលអាចលាងលុយកខ្វក់បានមកពីការជួញដូរគ្រឿងញៀននៅធនាគារអង់គ្លេស ដោយគ្មានខ្លាចញញើត។
នៅត្រង់ចំណុចនេះ របាយការណ៍របស់សភាអង់គ្លេសលើកយកករណីស៊ើបអង្កេត ប្រឆាំងអតីតមន្រ្តីជាន់ខ្ពស់កាហ្សាក់ស្ថានម្នាក់ដែលគេសង្ស័យថា បានលាងលុយកខ្វក់តាមរយៈការទិញផ្ទះ៥ខ្នងនៅទីក្រុងឡុងដ៍ដែលមានតម្លៃសរុប ៨០លានផោន។ ប៉ុន្តែ នៅទីបំផុត តុលាការនៅទីក្រុងឡុងដ៍សម្រេចបិទសំណុំរឿង នៅក្នុងហេតុផលមានបញ្ហានីតិវិធី។ បើតាមប្រធានគណៈកម្មការកិច្ចការបរទេស លោកស្រី Alicia Kearns គេមិនអាចបន្ទោសភ្នាក់ងារអនុវត្តច្បាប់បានទេ ព្រោះថាកន្លងមកពួកគេខ្វះធនធានមធ្យោបាយ បើប្រៀបធៀបនឹងបុគ្គលអ្នកមានដែលពួកគេស៊ើបអង្កេត។ នៅក្នុងន័យនេះ គណៈកម្មការសភាអង់គ្លេសទាមទារឲ្យរដ្ឋាភិបាលរបស់លោកនាយករដ្ឋមន្រ្តីស៊ូណាក់បង្កើនធនធានសម្រាប់ផ្នែកស៊ើបអង្កេតប្រឆាំងឧក្រិដ្ឋកម្មហិរញ្ញវត្ថុ។
មួយវិញទៀត យោងតាមរបាយការណ៍គណៈកម្មការសភាអង់គ្លេស ក្រៅពីដើរតួជាអ្នកសម្របសម្រួលជួយក្រុមឥស្សរជនពុករលួយនៅអាស៊ីកណ្តាល ដែលជាប់ពាក់ព័ន្ធនឹងការជួញដូរគ្រឿងញៀន និងការកេងបន្លំលួចលុយរដ្ឋ ប្រព័ន្ធធនាគារអង់គ្លេសត្រូវបានគេប្រើសម្រាប់គេចវេសការដាក់ទណ្ឌកម្មសេដ្ឋកិច្ចទៅលើរុស្ស៊ី។ តាមគណៈកម្មការសភាអង់គ្លេស រុស្ស៊ីបានប្រើប្រទេសអាស៊ីកណ្តាលទាំង៥ស្ពានដើម្បីគេចចេញពីការដាក់ទណ្ឌកម្មរបស់ប្រទេសលោកខាងលិចនៅក្នុងសំណុំរឿងសង្រ្គាមឈ្លានពានអ៊ុយក្រែន។
គណៈកម្មការសភាអង់គ្លេសអំពាវនាវឲ្យរដ្ឋាភិបាលចាប់ដៃសហការជាមួយប្រទេសអាស៊ីកណ្តាលដើម្បីទី១ ប្រគល់លុយដែលគេលួចបន្លំយកចេញពីប្រទេសអាស៊ីកណ្តាលទៅឲ្យម្ចាស់ដើមវិញ និងទី២ដើម្បីចូលរួមចំណែកទប់ស្កាត់ការប្រព្រឹត្តអំពើពុករលួយ និងកាត់បន្ថយការពឹងផ្អែករបស់ប្រទេសអាស៊ីកណ្តាលទៅលើរុស្ស៊ី។
រងការចោទប្រកាន់ថា ធូររលុង មិនសូវសកម្មក្នុងការត្រួតពិនិត្យលើលំហូរទុនមកពីបរទេស អង់គ្លេស ចាប់តាំងពីមានការដាក់ទណ្ឌកម្មសេដ្ឋកិច្ចលើរុស្ស៊ី បានបង្កើតច្បាប់ដែលតម្រូវឲ្យម្ចាស់ផ្ទះត្រូវប្រកាសឈ្មោះនិងទ្រព្យសម្បត្តិរបស់ខ្លួន។ ប៉ុន្តែ នៅក្នុងការអនុវត្តជាក់ស្តែង មាន អចលនទ្រព្យរាប់ម៉ឺននៅអង់គ្លេសដែលមានម្ចាស់កម្មសិទ្ធិលាក់មុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ