កិច្ចព្រមព្រៀងពាណិជ្ជកម្មសេរី រវាងអឺរ៉ុប និង អាមេរិកខាងត្បូង មិនទាន់សម្រេចទេមុនដាច់ឆ្នាំនេះ
សហគមតំបន់សេដ្ឋកិច្ចអាមេរិកខាងត្បូង ឬតំបន់អាមេរិកឡាទីន ហៅកាត់ថា Mercosur មានសមាជិកជាង១០ ប្រទេស ហើយ ដឹកនាំមុខគេដោយ អាហ្សង់ទីន អ៊ុយរ៉ាហ្កាយ ប៉ារ៉ាហ្គាយ និង វ៉េណេស៊ុយអេឡា ជាដើម។ ចំណែក សហភាពអឺរ៉ុប មាន ២៧ ប្រទេស។ តំបន់ប៉ូលសេដ្ឋកិច្ចទាំងពីរ ចាប់ផ្តើមជជែកគ្នាពីកិច្ចព្រមព្រៀងពាណិជ្ជកម្មសេរី តាំងពីឆ្នាំ ២០១៩ មកម្ល៉េះ។ ប្រសិនបើគេបូកទាំងពីរតំបន់ចូលគ្នា នោះគឺទំហំផ្លាស់ប្តូរពាណិជ្ជកម្មសេរី នឹងធំជាងគេលើពិភពលោក។ ក៏ប៉ុន្តែ អ្នកវិភាគប្រមើលមើលឃើញថា នៅមានការរាំងស្ទះជាច្រើន ហើយក៏ទំនងជារកមិនទាន់ឃើញកិច្ចព្រមព្រៀងជាក់លាក់ណាមួយទេ នៅមុនបំណាច់ឆ្នាំ២០២៣នេះ។
ចុះផ្សាយនៅថ្ងៃ៖
ស្តាប់ - ០២:២៥
កិច្ចព្រមព្រៀងពាណិជ្ជកម្មសេរី រវាង អាមេរិកឡាទីន និងសហភាពអឺរ៉ុប គឺត្រូវតំបន់សេដ្ឋកិច្ចទាំងពីរ បានចរចាគ្នា ជាច្រើនឆ្នាំមកហើយ ក៏ប៉ុន្តែ នៅតែមិនបានសម្រេច។ មិនបានសម្រេច ក៏ពីព្រោះតែពីមុនមក ប្រេស៊ីល យកជើងរាទឹក។ ប្រេស៊ីល នៅក្រោមការដឹកនាំរបស់អតីតប្រធានាធិបតី Jair Bolsonaro កាប់ព្រៃតំបន់អាម៉ាហ្សូន និងបំផ្លាញ់បរិស្ថាន ហើយការអភិរក្សបរិស្ថានធម្មជាតិ ជាលក្ខខណ្ឌតម្រូវចាំបាច់របស់សហភាពអឺរ៉ុប។ លុះដល់ប្រធានាធិបតីប្រេស៊ីលថ្មីលោក Lula គឺបានសន្យាកែតម្រូវនយោបាយបរិស្ថាន និងងាកមកចូលតុចរចាឡើងវិញ។ ប៉ុន្តែ លើកនេះ គឺដល់វេន បារាំង ទៅវិញ ដែលជំទាស់។
ប្រធានាធិបតីបារាំង បានជួបផ្ទាល់មួយទល់មួយជាមួយ ប្រធានាធិបតីប្រេស៊ីល នៅទីក្រុងឌូបៃថ្មីៗនេះ ហើយលោក ម៉ាក្រុង បានថ្លែង ថា កិច្ចព្រមព្រៀងពាណិជ្ជកម្មសេរី ពេលនេះ មានលក្ខណៈមិនទាន់គ្រប់គ្រាន់ទេ ពោលគឺនៅចន្លោះប្រហោងនៅឡើយ។ ចន្លោះប្រហោងទាក់ទងនឹងការថែរក្សាប្រព័ន្ធជីវចម្រុះនិងបរិស្ថានអាកាសធាតុ។
ទន្ទឹមនឹងគ្នានេះ បារាំងនិងប្រទេសអឺរ៉ុបផ្សេងទៀត ព្រួយបារម្ភអំពីបញ្ហាវិស័យកសិកម្ម។ ផ្ទុយទៅវិញ អាល្លឺម៉ង់ ជាក្បាលម៉ាស៊ីនមួយធំរបស់សហភាពអឺរ៉ុប គឺចង់ឲ្យឃើញកិច្ចព្រមព្រៀងពាណិជ្ជកម្មសេរីនេះ កើតឡើងឆាប់ ពីព្រោះអាល្លឺម៉ង់យល់ថាវានឹងមានសារៈសំខាន់ណាស់ចំពោះឧស្សាហកម្មរបស់ខ្លួន។
ប្រធានាធិបតីប្រេស៊ីល លោក Lula ទំនងជាបានដឹងដែរថា កិច្ចព្រមព្រៀងមិនអាចចុះហត្ថលេខាទៅរួចទេ នៅចុងឆ្នាំនេះ ប៉ុន្តែលោកបានលើកបង្ហាញថា បើចុះកិច្ចព្រមព្រៀងមិនកើត ក៏តាមហ្នឹងទៅ ប៉ុន្តែ សូមកុំទម្លាក់កំហុសលើប្រេស៊ីល ឬប្រទេសអាមេរិកខាងត្បូង ថាគ្មានសុច្ឆន្ទៈឲ្យសោះ។
ទោះជាយ៉ាងនេះក្តី គេក៏កំពុងតែរង់ចាំមើលជំហរផ្លូវការរបស់ប្រធានាធិបតីអាហ្សង់ទីនថ្មី ដែលត្រូវចូលកាន់តំណែងនៅថ្ងៃទី១០ធ្នូខាងមុខ។
សម្រេចសម្រួលទៅ គ្រប់ភាគីបានដឹងច្បាស់ថា កិច្ចព្រមព្រៀង ពាណិជ្ជកម្មសេរី រវាង អាមេរិកឡាទីន និងសហភាពអឺរ៉ុប ធ្វើទៅមិនរួច នៅមុនដាច់ឆ្នាំនេះឡើយ។ ធ្ងន់ធ្ងន់ជាងនេះទៀត អ្នកស្រាវជ្រាវ Bruno Binetti នៃមណ្ឌលស្រាវជ្រាវសេដ្ឋកិច្ច London School of Economics ប្រមើលមើលឃើញថា កិច្ចព្រមព្រៀងពាណិជ្ជកម្មសេរីនេះ ស្លាប់បាត់ទៅហើយ គ្រាន់តែថា គេមិននិយាយ និងមិនកប់ចោល តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ