ការបាញ់រះនៅឆែក៖ ខ្មាន់កាំភ្លើងបាញ់សម្លាប់ខ្លួនឯង បន្ទាប់ពីបាញ់សម្លាប់មនុស្ស១៤នាក់
ប៉ុន្មានម៉ោងក្រោយហេតុការណ៍បាញ់រះសម្លាប់មនុស្សនៅក្នុងសកលវិទ្យាល័យដ៏ល្បីឈ្មោះ ក្នុងទីក្រុងប្រាក អាជ្ញាធរឆែកកំពុងស៊ើបអង្កេតរកហេតុផលដែលធ្វើឲ្យនិស្សិតអាយុ២៤ឆ្នាំ ក្លាយជាខ្មាន់កាំភ្លើង ដើរបាញ់សម្លាប់មនុស្ស នៅទីក្រុងប្រាក កាលពីថ្ងៃព្រហស្បតិ៍ទី ២១ ធ្នូ។ យ៉ាងណាក៏ដោយ ប៉ូលិសឆែកអះអាងថា ការបាញ់រះសម្លាប់មនុស្ស នៅក្នុងសកលវិទ្យាល័យ ជាករណីដាច់ដោយឡែក គ្មានជាប់ទាក់ទងនឹងបញ្ហាភេរវកម្មអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
ប្រជាជនឆែករន្ធត់តក់ស្លុតនឹងហេតុការណ៍បាញ់រះ នៅក្នុងសកលវិទ្យាល័យ កណ្តាលទីក្រុងប្រាក កាលពីថ្ងៃព្រហស្បតិ៍ ដែលបានសម្លាប់មនុស្ស១៤នាក់ និងរបួស ២៥នាក់ ដែលនៅក្នុងនោះ ១០នាក់របួសធ្ងន់។
សោកនាដកម្ម ដែលសម្លាប់មនុស្សដ៏ច្រើនមិនធ្លាប់មាននៅសាធារណរដ្ឋឆែក បានកើតឡើង នៅពេលខ្មាន់កាំភ្លើងអាយុ២៤ឆ្នាំ ចូលទៅបាញ់រះសម្លាប់មនុស្សដោយឥតរើសមុខ នៅក្នុងសកលវិទ្យាល័យដ៏ល្បីឈ្មោះរបស់ឆែក គឺ Charles de Prague។
មកដល់ថ្ងៃសុក្រ ប៉ូលិសឆែកនៅបន្តស៊ើបអង្កេតស្វែងរកមូលហេតុដែលធ្វើឲ្យខ្មាន់កាំភ្លើង លើកដៃបាញ់រះសម្លាប់មនុស្សនៅក្នុងសកលវិទ្យាល័យ។ យោងតាមប៉ូលិសឆែក ខ្មាន់កាំភ្លើង ធ្លាប់ជានិស្សិតមហាវិទ្យាល័យវិចិត្រសិល្បៈ ដែលជាផ្នែកមួយនៃសកលវិទ្យាល័យCharles de Prague។ ប៉ូលិសសង្ស័យថា ខ្មាន់កាំភ្លើងអាចជាប់ពាក់ព័ន្ធនឹងការបាញ់សម្លាប់ឪពុកកូន ពីរនាក់នៅក្នុងព្រៃ កាលពីថ្ងៃទី ១៥ធ្នូកន្លងទៅ។
នៅប៉ុន្មានម៉ោងមុនកើតហេតុ ប៉ូលិសបានទៅស្វែងរកជនរូបនេះ នៅមហាវិទ្យាល័យវិចិត្រសិល្បៈ បន្ទាប់ពីមានការរាយការណ៍ថា ឪពុករបស់ខ្មាន់កាំភ្លើងត្រូវបាញ់សម្លាប់នៅ ភូមិHostoun ជាយទីក្រុងប្រាក។ ប៉ូលិសឆែកជឿថា ខ្មាន់កាំភ្លើងជាអ្នកបាញ់សម្លាប់ឪពុកខ្លួនឯង មុននឹងសម្រេចចិត្តមកធ្វើអត្តឃាតនៅទីក្រុងប្រាក។
ប៉ុន្តែ មុននឹងបាញ់សម្លាប់ខ្លួនឯង ខ្មាន់កាំភ្លើង ដែលមានអាវុធដ៏ច្រើនជាប់ខ្លួន រួមទាំងកាំភ្លើងពាក់កណ្តាលស្វ័យប្រវត្តិផង បានចូលទៅបាញ់រះសម្លាប់មនុស្ស ដោយឥតរើសមុខ នៅក្នុងអគាររបស់សកលវិទ្យាល័យ។ តាមរដ្ឋមន្រ្តីមហាផ្ទៃឆែក ដោយសារមានវត្តមាន តាមរកមុខខ្មាន់កាំភ្លើង នៅមុនហេតុការណ៍បាញ់រះទៅទៀត ប៉ូលិសឆែកចាប់អន្តរាគមន៍ យ៉ាងឆាប់រហ័ស ប៉ុន្តែ បានប្រទះឃើញសាកសពរបស់ខ្មាន់កាំភ្លើង ដែលប៉ូលិសជឿថា បានបាញ់សម្លាប់ខ្លួនឯង។
អាជ្ញាធរឆែក នៅយប់ថ្ងៃព្រហស្បតិ៍ ប្រកាសប្រាប់ប្រជាជនឲ្យស្ងប់ស្ងាត់ ព្រោះថា ការបាញ់រះសម្លាប់មនុស្សធ្វើឡើងដោយឧក្រិដ្ឋជនទោល ពោលគឺគ្មានជាប់ទាក់ទងនឹងក្រុមភេរវកម្មអន្តរជាតិណាមួយឡើយ។ បើតាមរដ្ឋមន្រ្តីមហាផ្ទៃ ឆែក ដែលនិយាយយោងដល់ការស៊ើបអង្កេតនៅលើបណ្តាញសង្គម ខ្មាន់កាំភ្លើងទំនងយកគំរូតាមហេតុការណ៍បាញ់សម្លាប់មនុស្សនៅរុស្ស៊ី កាលពី ប៉ុន្មានខែមុននេះ។
ចាប់តាំងពីទទួលបានឯករាជ្យនៅឆ្នាំ ១៩៩៣ នេះជាលើកទី១ ដែលសាធារណរដ្ឋឆែក ជួបហេតុការណ៍បាញ់រះ សម្លាប់ក្នុងចំនួនដ៏ច្រើន ជាពិសេស នៅសកលវិទ្យាល័យដ៏ល្បីឈ្មោះ ក្នុងសង្កាត់ទេសចរ កណ្តាលក្រុងប្រាក។ នៅថ្ងៃព្រហស្បតិ៍ ប្រធានាធិបតីឆែក សំដែងការរន្ធត់ និងប្រកាសកាន់ទុក្ខជាតិ នៅថ្ងៃសៅរ៍ស្អែក។ មេដឹកនាំអាមេរិក អឺរ៉ុប និងបារាំង បានផ្ញើសារចូលរួមមរណទុក្ខរបស់គ្រួសារជនរងគ្រោះស្លាប់នៅក្នុងសោកនាដកម្មលើកនេះ។
ទោះជាអំពើហិង្សាប្រើកាំភ្លើងបាញ់សម្លាប់មនុស្សជារឿងកម្រ នៅប្រទេសឆែក ប៉ុន្តែ ករណីបាញ់សម្លាប់មនុស្ស មុននឹងធ្វើអត្តឃាតខ្លួនឯងធ្លាប់ កើតមាន២លើកហើយនៅឆែក។ នៅឆ្នាំ ២០១៥ បុរសម្នាក់ចូលទៅបាញ់សម្លាប់មនុស្សនៅក្នុងបន្ទប់រង់ចាំគ្រូពេទ្យ ចំណែកនៅឆ្នាំ ២០១៩ បុរសអាយុ៦៣ឆ្នាំម្នាក់បាញ់សម្លាប់មនុស្ស៧នាក់នៅក្នុងភោជនីយដ្ឋាន មុននឹងធ្វើអត្តឃាត ផ្តាច់ជីវិតខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ