បារាំង៖ លោកហ្កាប្រ៊ីយែល អាតតាល់ ត្រូវបានតែងតាំងនាយករដ្ឋមន្ត្រីថ្មី
២០ខែបន្ទាប់ពីបានដឹកនាំរដ្ឋាភិបាលបារាំង លោកស្រី អេលីហ្សាប៊ែត ប៊ន បានលាចុះពីមុខតំណែងនាយករដ្ឋមន្ត្រី ទៅតាមការសម្រេច របស់លោកប្រធានាធិបតី អេម៉ានុយអែល ម៉ាក្រុង កាលពីថ្ងៃចន្ទទី៨មករា។ ការសម្រេចរុះរើរដ្ឋាភិបាលនេះ គឺបន្ទាប់ពីមានបញ្ហារកាំរកូសបែកបាក់គ្នា ក្នុងចំណោមសមាជិករដ្ឋាភិបាល ព្រមទាំងសមាជិកសភាមកពីបក្សរបស់លោកម៉ាក្រុង។ លោកម៉ាក្រុង បានតែងតាំង លោក ហ្កាប៊្រីយែល អាតតាល់ ដែលមានអាយុ៣៤ឆ្នាំ ឲ្យធ្វើជានាយករដ្ឋមន្ត្រីថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
ក្នុងវ័យ៣៤ឆ្នាំ លោក ហ្កាប៊្រីយែល អាតតាល់ (Gabriel Attal) បានក្លាយជានាយករដ្ឋមន្ត្រីបារាំង ដែលមានវ័យក្មេងជាងគេបំផុត ក្នុងប្រវត្តិសាស្ត្រនយោបាយបារាំង។ ភ្លាមៗក្រោយការប្រកាសតែងតាំង នៅព្រឹកថ្ងៃទី៩មករា លោកប្រធានាធិបតីម៉ាក្រុង បានសរសេរសានៅលើបណ្តាញសង្គម X ថាលោកសង្ឃឹមនឹងមានទំនុកចិត្តទៅលើ ភាពស្វាហាប់ របស់លោក ហ្កាប៊្រីយែល អាតតាល់ ក្នុងការដឹកនាំរដ្ឋាភិបាលថ្មី ផ្តល់សន្ទុះដល់គម្រោងពង្រឹងកម្លាំងយុវជនបារាំងជំនាន់ថ្មី។
យ៉ាងណាមិញ ក្នុងពិធីផ្ទេរតំណែងនៅវិមានម៉ាទីញ៉ុង លោកហ្កាប៊្រីយែល អាតតាល់ បានទទួលស្គាល់ថា ការតែងតាំងរូបលោកជានាយករដ្ឋមន្ត្រី គឺបានស្តែងអំពីទំនុកចិត្តរបស់លោកប្រធានាធិបតី មកលើភាពស្វាហាប់ ភាពក្លាហានរបស់យុវជនវ័យក្មេងជំនាន់ក្រោយ។ លោកបានបន្ថែមថា ការងាររបស់លោកចាប់ពីពេលនេះ គឺចាត់ចែងដឹកនាំជោគវាសនារបស់បារាំង ដើម្បីរំដោះសក្តានុពលរបស់បារាំង។ ចូលកាន់តំណែងភ្លាម លោកនាយករដ្ឋមន្ត្រី ហ្កាប៊្រីយែល អាតតាល់ បានធ្វើដំណើរទៅសួរសុខទុក្ខពលរដ្ឋបារាំងរងគ្រោះដោយគ្រោះទឹកជំនន់នៅភាគខាងជើងបារាំង។
សូមបញ្ជាក់ថា លោក ហ្កាប៊្រីយែល អាតតាល់ គឺជាអ្នកនយោបាយវ័យក្មេង ដែលកំពុងលេចធ្លោបំផុត នៅលើឆាកនយោបាយបារាំង នាប៉ុន្មានឆ្នាំចុងក្រោយនេះ។ លោកគឺជាសកម្មជននយោបាយ ដែលបានចូលរួមក្នុងចលនានយោបាយ ដឹកនាំដោយលោកម៉ាក្រុង ដំបូងៗគេបង្អស់ កាលពីឆ្នាំ២០១៧។ ពីអ្នកនាំពាក្យវិមានប្រធានាធិបតី លោក ហ្កាប៊្រីយែល អាតតាល់ ត្រូវបានតែងតាំងជារដ្ឋមន្ត្រីទទួលបន្ទុកកញ្ចប់ថវិកាសាធារណៈ នៅខែឧសភា ឆ្នាំ២០២២ មុននឹងបានក្លាយជារដ្ឋមន្ត្រីក្រសួងអប់រំ នៅខែកក្កដា២០២៣។ ដោយសារតែភាពស្វាហាប់ ម៉ឺងម៉ាត់ និងពូកែវោហារសព្ទ លោកហ្កាប៊្រីយែល អាតតាល់ បានក្លាយជាអ្នកនយោបាយ ដែលមានប្រជាប្រិយបំផុត ក្នុងការយល់ឃើញរបស់ប្រជាជនបារាំងទូទៅ។
យោងតាមការវិភាគ លោកប្រធានាធិបតីម៉ាក្រុង បានសម្រេចចិត្តតែងតាំងលោក ហ្កាប៊្រីយែល អាតតាល់ ដោយសង្ឃឹមថា អាចនឹងផ្តល់សន្ទុះវិជ្ជមាន ដល់រដ្ឋាភិបាលអាណត្តិទី២របស់ខ្លួន ដែលកំពុងតែជួបការលំបាកខ្លាំងឡើងៗ។ ច្បាប់កំណែទម្រង់ប្រព័ន្ធចូលនិវត្តន៍ និងច្បាប់អន្តោប្រវេសន៍ថ្មី ដែលរដ្ឋាភិបាលបារាំង បានមានៈអនុម័ត បានធ្វើឲ្យបែកបាក់ឈ្លោះប្រកែកគ្នាយ៉ាងខ្លាំង មិនថាក្នុងសភា និងក្នុងរដ្ឋាភិបាលខ្លួនឯង។ បន្ថែមពីនេះ លោកម៉ាក្រុងត្រូវតែត្រៀមជម្រុញ ឲ្យបក្សរបស់ឈានទៅបានជោគជ័យ នៅក្នុងការបោះឆ្នោតជ្រើសរើសសមាជិកសភាអឺរ៉ុប នៅខែមិថុនាខាងមុខ ស្របពេលដែលតាមការស្ទាបស្ទង់មតិ គឺបក្សស្តាំនិយមជ្រុលដែលកំពុងទទួលបានការគាំទ្រខ្លាំង។
យ៉ាងណាក៏ដោយ មានឧបសគ្គជាច្រើនកំពុងរងរចាំលោកនាយករដ្ឋមន្ត្រីថ្មី ហ្កាប៊្រីយែល អាតតាល់ ព្រោះថារដ្ឋាភិបាលលោក ពុំមានសំឡេងភាគច្រើននៅក្នុងសភាទេ។ រាល់ការបោះឆ្នោតធ្វើកំណែទម្រង់ ឬធ្វើច្បាប់ថ្មីណាមួយ គឺត្រូវតែឆ្លងកាត់ការចរចា ជាមួយគណបក្សផ្សេងៗទៀត ដែលពួកគេកាន់តែបង្ហាញការប្រឆាំងខ្លាំងឡើងៗ ទៅលើការដឹកនាំរបស់លោកអេម៉ានុយអែល ម៉ាក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ