លោកនាយករដ្ឋមន្ត្រី ហ៊ុន ម៉ាណែត ធ្វើទស្សនកិច្ចផ្លូវរដ្ឋ នៅប្រទេសបារាំង
លោកនាយករដ្ឋមន្ត្រីកម្ពុជា ហ៊ុន ម៉ាណែត បានដឹកនាំគណៈប្រតិភូ ទៅកាន់អឺរ៉ុប កាលពីចុងសប្តាហ៍ កន្លងមកនេះ។ បន្ទាប់ពីបានទៅចូលរួមកម្មវិធីវេទិកាសេដ្ឋកិច្ចពិភពលោក នៅក្រុងដាវូសប្រទេសស្វីស ព្រមទាំងជួបជាមួយតំណាងសហព័ន្ធនយោជកបារាំង ដើម្បីទាក់ទាញការវិនិយោគ នៅថ្ងៃព្រហស្បតិ៍ទី១៨មករា លោកនាយករដ្ឋមន្ត្រីហ៊ុន ម៉ាណែត បានចាប់ផ្តើមទស្សនកិច្ចផ្លូវរដ្ឋ នៅក្នុងប្រទេសបារាំង។ ក្រៅពីចូលរួមជាអធិបតី ក្នុងកម្មវិធីត្រួតពលទាហាន លោកនាយករដ្ឋមន្ត្រីហ៊ុន ម៉ាណែត បានទៅជួបពិសារអាហារថ្ងៃត្រង់ និងពិភាក្សាការងារ ជាមួយលោកប្រធានាធិបតីបារាំង នៅឯវិមានអេលីហ្សេ។
ចុះផ្សាយនៅថ្ងៃ៖
ថ្ងៃព្រហស្បតិ៍ ទី១៨មករា នៅវេលាម៉ោង១រសៀល លោកនាយករដ្ឋមន្ត្រី ហ៊ុន ម៉ាណែត ត្រូវបានទទួលស្វាគមន៍ ដោយលោកប្រធានាធិបតីបារាំង អេម៉ានុយអែល ម៉ាកុ្រង នៅឯវិមានអេលីហ្សេ ដើម្បីពិសារអាហារថ្ងៃត្រង់និងពិភាក្សាការងារ។ ក្រៅពីបានអ្នកអបអរសាទរមិត្តភាពដ៏ស្និទ្ធនៃប្រទេសទាំង២ និងការដើរតួនាទីយ៉ាងសំខាន់របស់កម្ពុជា នៅក្នុងអង្គការក្រុមប្រទេសនិយាយភាសាបារាំង La Francophonie លោកប្រធានាធិបតីម៉ាក្រុង បានកោតសរសើរមកលើកម្ពុជាដែលបានចូលរួមធ្វើការងារយ៉ាងសកម្ម នៅក្នុងសហគមន៍អន្តរជាតិ។
លោកនាយករដ្ឋមន្ត្រីកម្ពុជាបានថ្លែងអរគុណ ចំពោះការអញ្ជើញ និងការទទួលស្វាគមន៍យ៉ាងកក់ក្តៅពីសំណាក់រដ្ឋាភិបាលបារាំង។ លោកក៏បានអរគុណផងដែរ ចំពោះការដើរតួនាទីដ៏សំខាន់របស់បារាំង នៅក្នុងដំណើរការកសាងសន្តិភាពនៅកម្ពុជា ដោយរាប់ចាប់តាំងពីកិច្ចព្រមព្រៀងទីក្រុងប៉ារីស ឆ្នាំ១៩៩១ រហូតរៀងមក។
ផ្អែកតាមសេចក្តីប្រកាសរបស់វិមានប្រធានាធិបតីបារាំង ទស្សនកិច្ចផ្លូវរដ្ឋរបស់លោកនាយករដ្ឋមន្ត្រីកម្ពុជា ហ៊ុន ម៉ាណែត នៅប្រទេសបារាំង គឺត្រូវបានធ្វើឡើង ក្នុងក្របខណ្ឌពង្រឹងទំនាក់ទំនងទ្វេភាគីរវាងប្រទេសទាំង និងបន្ទាប់ពី ព្រះករុណាព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ស្តេចបានយាងមកទស្សនកិច្ចនៅបារាំង កាលពីខែវិច្ឆិកាកន្លងទៅ។
មុននឹងមកជួបលោកប្រធានាធិបតីម៉ាក្រុង នៅវិមានអេលីហ្សេ នៅព្រឹកថ្ងៃព្រហស្បតិ៍ទី១៨មករា លោកនាយករដ្ឋមន្ត្រីកម្ពុជា ហ៊ុន ម៉ាណែត បានអញ្ជើញចូលរួមជាអធិបតី ជាមួយលោករដ្ឋមន្ត្រីក្រសួងការបរទេសបារាំង នៅក្នុងកម្មវិធីទ្រួតពលទាហាន នៅឯវិមាន អាំងវ៉ាលីដ (Invalides) ដែលជាទីតាំងនិម្មិតរូបដ៏សំខាន់បំផុត នៃកងទ័ពបារាំង។ កម្មវិធីស្វាគមន៍ថ្នាក់ជាតិនេះ គឺជាការទទួលស្វាគមន៍ដ៏មានកិត្តិយសបំផុត ដែលក្រសួងការពារជាតិបារាំង បានរៀបចំឡើងជាពិសេស ដើម្បីទទួលរូបលោក នាយករដ្ឋមន្ត្រីរបស់កម្ពុជា។
សូមបញ្ជាក់ដែរថា កាលពីដើមសប្តាហ៍នេះ លោកនាយករដ្ឋមន្ត្រីកម្ពុជាបានដឹកនាំគណៈប្រតិភូ តំណាងវិស័យធុរកិច្ចកម្ពុជា ចូលទៅជួបប្រជុំ ជាមួយសហព័ន្ធនយោជក និងសហគ្រាសបារាំង។ ជាកម្មវិធីដ៏សំខាន់ផងដែរ នៃដំណើរមកកាន់អឺរ៉ុបរបស់គណៈប្រតិភូកម្ពុជា ព្រោះថាកម្មវត្ថុ គឺដើម្បីធ្វើបទបង្ហាញអំពីសក្តានុពលសេដ្ឋកិច្ចរបស់កម្ពុជា ព្រមទាំងទាក់ទាញការបោះទុនវិនិយោគថ្មីៗបន្ថែមទៀត ពីសំណាក់ក្រុមហ៊ុនបារាំង ក៏ដូចជាក្រុមហ៊ុនអឺរ៉ុបទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ