អឺរ៉ុបបង្កើតសម្ព័ន្ធភាពតាមកំពង់ផែ ដើម្បីទប់ស្កាត់ការនាំចូលគ្រឿងញៀន
ប្រមាណជា២ឆ្នាំចុងក្រោយនេះ គ្រឿងញៀនជាពិសេសប្រភេទកូកាអ៊ីន បានហូរចូលមកអឺរ៉ុបយ៉ាងច្រើនសន្ធឹក ដោយពួកឈ្មួញទុច្ចរិត បានបញ្ជូនចូលមកតាមកុងទឺន័រ ដែលគេដឹកមកដល់តាមកំពង់ផែធំៗរបស់អឺរ៉ុប។ កំពង់ផែក្រុងអង់វែ នៅបែលហ្ស៊ិក បានក្លាយជាទីតាំងច្រកចូលដ៏សំខាន់មួយ នៃគ្រឿងញៀនទាំងនេះ។ ប្រឈមនឹងបញ្ហា សហភាពអឺរ៉ុប បានបង្កើតឲ្យមាន “សម្ព័ន្ធភាព”មួយ នៅតាមកំពង់ផែអឺរ៉ុប ដើម្បីពង្រឹងវិធានការសន្តិសុខ ឈានទៅទប់ស្កាត់ការនាំចូលគ្រឿងញៀន។
ចុះផ្សាយនៅថ្ងៃ៖
ស្តាប់ - ០៣:៣៣
លោកស្រី Ylva Johansson ស្នងការអឺរ៉ុបទទួលបន្ទុកកិច្ចការផ្ទៃក្នុង បានប្រាប់អ្នកកាសែតថា ការរឹតបន្តឹងសន្តិសុខនៅកំពង់ផែតែមួយ គឺមិនអាចទប់ស្កាត់ការហូរចូលនូវគ្រឿងញៀនបានទេ ព្រោះពួកឈ្មួញទុច្ចរិត នឹងងាកទៅកំពង់ផែផ្សេងទៀត។ ដូច្នេះហើយ សហភាពអឺរ៉ុប នឹងរៀបចំបង្កើតជា “សម្ព័ន្ធភាពមួយ” ដោយសហការជាមួយ អាជ្ញាធរគ្រប់គ្រងកំពង់ផែធំៗចំនួន១៦ នៅអឺរ៉ុប ព្រមទាំងតំណាងក្រុមហ៊ុនដឹកជញ្ជូនផ្លូវសមុទ្រផងដែរ។
លោកស្រី Ylva Johansson ថាសម្ព័ន្ធភាពនេះ អាចបានជោគជ័យ ទាល់តែមានការសហការ ជាមួយអាជ្ញាធរនគរបាល អាជ្ញាធរគយ ព្រមទាំងតំណាងក្រុមហ៊ុនឯកជន ដែលមានចំណែកពាក់ព័ន្ធនៅតាមកំពង់ផែ។ លោកស្រីបានគូសបញ្ជាក់ថា ការនាំចូលគ្រឿងញៀននៅតាមកំពង់ផែ កាន់តែធ្ងន់ធ្ងរឡើងពីមួយថ្ងៃទៅមួយថ្ងៃ ដោយសារតែអំពើពុករលួយ នៅតាមកំពង់ផែ។
គួរបញ្ជាក់ថា កំពង់ផែធំៗនៅអឺរ៉ុប បានក្លាយជាច្រកចូលនៃគ្រឿងញៀន របស់ពួកឈ្មួញទុច្ចរិត។ បណ្តាញទុច្ចរិត បានប្រើលុយសូកប៉ាន់បុគ្គលិកកំពង់ផែ អ្នកបើកបររថយន្តដឹកកុងទឺន័រ ព្រមទាំងមន្ត្រីគយ និងមន្ត្រីនគរបាលថែមទៀតផង ដើម្បីឲ្យកូនចៅខ្លួន អាចចូលទៅយកគ្រឿងញៀន ដែលត្រូវបានបញ្ជូនមកតាមកាប៉ាល់។ ជាក់ស្តែង គ្រឿងញៀនប្រភេទកូកាអ៊ីន ដែលដឹកមកពីតំបន់អាមេរិកឡាទីន កំពុងតែជនជោរខ្លាំងពេញអឺរ៉ុបតែម្តង។
នៅឆ្នាំ២០២៣ អាជ្ញាធរបែលហ្ស៊ិក បានចាប់ឃាត់បានកូកាអ៊ីនចំនួន១៦តោន នៅកំពង់ផែក្រុងអង់វែ។ ជាងនេះទៀត សកម្មភាពជួញដូរគ្រឿងញៀនយ៉ាងអាណាធិបតេយ្យ បានធ្វើឲ្យទីក្រុងអង់វែ ប្រឈមនឹងអំពើហិង្សាបាញ់បោះខ្លាំងឡើងៗ រវាងពួកក្រុមជនទុច្ចរិតដែលប្រជែងទីផ្សារគ្នា។ ផ្អែកតាមអាជ្ញាធរបែលហ្ស៊ិក ថ្វីបើឆ្នាំ២០២៣កន្លងទៅ គេបានចាប់ឃាត់គ្រឿងញៀនបានច្រើនសន្ធឹកក៏ពិតមែន តែគ្រឿងញៀននៅតែមានតម្លៃថោកខ្លាំង។ មានន័យថា ទំហំបរិមាណគ្រឿងញៀន គឺមានច្រើនខ្លាំងណាស់ ទើបបានជាវាមានតម្លៃថោកបែបនេះ។
គួរកត់សំគាល់ដែរថា ពួកជនទុច្ចរិតបានសំរុកនាំគ្រឿងញៀន ចូលតាមកំពង់ផែក្រុងអង់វែរបស់បែលហ្ស៊ិក គឺបន្ទាប់ពីអាជ្ញាធរហូឡង់បានចាប់ផ្តើមបង្ក្រាបខ្លាំង នៅកំពង់ផែក្រុងរ៉ូទែដាម។ ហើយស្របពេលដែលអាជ្ញាធរបែលហ្ស៊ិក បានចាប់ផ្តើមបង្ក្រាបនៅកំពង់ផែអង់វែ ស្រាប់តែគេសង្កេតឃើញថា សកម្មភាពនាំចូលគ្រឿងញៀន បានងាកទៅកើនឡើងខ្លាំង នៅត្រង់កំពង់ផែ Helsingborg ប្រទេសស៊ុយអែត។
ផ្អែកតាមលោកស្រី ស្នងការអឺរ៉ុបទទួលបន្ទុកកិច្ចការផ្ទៃក្នុង ស្ថានការណ៍ដូចគ្នានេះ គេសង្កេតឃើញដែរ នៅតាមកំពង់ផែ ដែលគ្រឿងញៀនទាំងនោះ ត្រូវគេបញ្ជូនឡើងកាប៉ាល់មក។ ក្រោយពេលដែល អាជ្ញាធរកូឡុំប៊ី បានចាប់ផ្តើមពង្រឹងការបង្រ្កាប នៅតាមកំពង់ផែកូឡុំប៊ី គេសង្កេតឃើញថា ពួកបណ្តាញជួញដូរគ្រឿងញៀន បានងាកទៅប្រើប្រាស់ កំពង់ផែនៅអាក្វាទ័រ ដើម្បីបញ្ជូនគ្រឿងញៀនចេញមកអឺរ៉ុប។
សូមបញ្ជាក់ថា នៅអឺរ៉ុប ៧០%នៃគ្រឿងញៀនកូកាអ៊ីន គឺគេរឹបអូសបាន នៅតាមកំពង់ផែ។ ប្រឈមនឹងការចុះចាប់កាន់តែញឹកញាប់របស់សមត្ថកិច្ចអឺរ៉ុប ក្រុមជនទុច្ចរិតខ្លះ បានងាកទៅប្រើប្រាស់កំពង់ផែ នៅតាមប្រទេសអាហ្វ្រិកខាងជើង ដើម្បីទំលាក់គ្រឿងញៀន ហើយបញ្ជូនចូលអឺរ៉ុបតាមទូកតូចៗ នៅតាមកំពង់ផែអេស្ប៉ាញ។ បន្ថែមពីគ្រឿងញៀនប្រភេទកូកាអ៊ីន អាជ្ញាធអឺរ៉ុបមានការព្រួយបារម្ភផងដែរ អំពីគ្រឿងញៀនប្រភេទគីមីសំយោគ ដែលអាចបង្កគ្រោះថ្នាក់ខ្លាំងដល់អាយុជីវិត។ ជារៀងរាល់ឆ្នាំ សមត្ថកិច្ចអឺរ៉ុបចុះចាប់ បំបែកបានទីតាំងកែច្នៃសារធាតុញៀនគីមីសំយោគ ចំនួន៤០០ទីតាំងជាមធ្យម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ