អឺរ៉ុបយល់ព្រមព្រៀងគ្នាដើម្បីចាយលុយរុស្ស៊ីដែលអឺរ៉ុបបង្កកទុក ដោយសារសង្រ្គាមអ៊ុយក្រែន
ទីបំផុតទៅ សហភាពអឺរ៉ុបរកឃើញកិច្ចព្រមព្រៀងរួមស្តីពីការទាញយកប្រយោជន៍ពីទ្រព្យសម្បត្តិរុស្ស៊ី ដែលផ្អឹបទុកនៅ ទឹកដីអឺរ៉ុប ដោយសារសង្រ្គាមអ៊ុយក្រែន។ តាមបែលហ្ស៊ិកដែលជាប្រធានផ្លាស់វេនក្រុមប្រឹក្សាអឺរ៉ុប នៅក្នុងកិច្ចប្រជុំ កាលពីថ្ងៃចន្ទទី ២៩មករា អ្នកតំណាងទូតរបស់ប្រទេសសមាជិកទាំង២៧របស់សហភាពអឺរ៉ុបសម្រេចចិត្តលើកដៃ បោះឆ្នោតជាឯកច្ឆន្ទឲ្យគេយកប្រាក់ចំណូល បានមកពីទ្រព្យសម្បត្តិរុស្ស៊ី ផ្អឹបទុកក្នុងទឹកដីអឺរ៉ុប ទៅប្រើប្រាស់សម្រាប់ជួយកសាងអ៊ុយក្រែន នៅក្រោយចប់សង្រ្គាម។
ចុះផ្សាយនៅថ្ងៃ៖
ស្តាប់ - ០៣:៤២
នៅក្នុងក្របខណ្ឌនៃការដាក់ទណ្ឌកម្មសេដ្ឋកិច្ចទៅលើរុស្ស៊ី ដែលធ្វើសង្រ្គាមឈ្លានពានអ៊ុយក្រែន អឺរ៉ុបបានបង្កកទ្រព្យសម្បត្តិរបស់ធនាគារកណ្តាលរុស្ស៊ី ប្រមាណ ២០០ពាន់លានអឺរ៉ូ។ ៩០%នៃមូលនិធិរុស្ស៊ី នៅទឹកដីអឺរ៉ុប ស្ថិតក្រោមការគ្រប់គ្រងរបស់ស្ថាប័នហិរញ្ញវត្ថុEuroclear ដែលមានទីតាំង នៅប្រទេសប៊ែលហ្សិក។
សហភាពអឺរ៉ុបធ្លាប់ជជែកគ្នាជាច្រើនដងពីទ្រព្យសម្បត្តិរុស្ស៊ី ដែលគេបង្កកទុកចោល នៅអឺរ៉ុប ដែលនៅក្នុងនោះ មានតាំងពីការជំរុញឲ្យយកទ្រព្យសម្បត្តិរុស្ស៊ីទាំងអស់ដែលគេចាប់បង្កកទុក នៅអឺរ៉ុប ទៅប្រើសម្រាប់កសាងអ៊ុយក្រែន។ អ៊ុយក្រែនដែលកំពុងត្រូវបំផ្លាញខ្ទេចខ្ទីរដោយសារសង្រ្គាមឈ្លានពានរបស់រុស្ស៊ី។
ប៉ុន្តែ ដោយសារបញ្ហានីតិវិធីដ៏ស្មុគស្មាញ និងដើម្បីជៀសវាងកុំឲ្យលុយអឺរ៉ូ ធ្លាក់ថ្លៃ ឬទីផ្សារអន្តរជាតិជួបហានិភ័យ សហភាពអឺរ៉ុបបានទាត់ចោលជំរើសខាងលើ ដោយងាកមកផ្តោតសំខាន់លើការប្រាក់ ឬប្រាក់ចំណេញ បានមកពីទ្រព្យសម្បត្តិផ្ទឹបទុកនៅអឺរ៉ុប។
កន្លងមក គណៈកម្មការអឺរ៉ុបបានដាក់សំណើទៅប្រទេសសមាជិកទាំង២៧របស់សហភាពអឺរ៉ុប ដែលនៅក្នុងនោះ ស្ថាប័នដែលមានបង្កកទ្រព្យសម្បត្តិរុស្ស៊ី ដូចជា Euroclear ជាដើម ត្រូវបែងចែកឲ្យដាច់ រវាងការប្រាក់ ឬប្រាក់ចំណេញ បានមកពីទ្រព្យសម្បត្តិរុស្ស៊ី បន្ទាប់មកត្រូវដាក់វាទៅក្នុងគណនីពីរផ្សេងគ្នា។
នៅក្នុងដំណាក់កាលទី២ គណៈកម្មការអឺរ៉ុបនឹងស្នើសាជាថ្មី ដើម្បីរឹបអូសយកប្រាក់ចំណេញ ឬការប្រាក់លើទ្រព្យសម្បត្តិបង្កករុស្ស៊ី ដើម្បីប្រគល់ទៅឲ្យអ៊ុយក្រែន។
ប្រទេសមួយចំនួន ដូចជាបែលហ្សិកបានស្នើឲ្យគេយកពន្ធលើទ្រព្យសម្បត្តិបង្កករបស់រុស្ស៊ី ព្រោះថា ពន្ធប្រភេទនេះនឹងអាចឲ្យទទួលបានប្រាក់ប្រមាណ ៣ពាន់លានអឺរ៉ូ ក្នុងមួយឆ្នាំៗ សម្រាប់យកទៅជួយអ៊ុយក្រែន។ ជាឧទាហរណ៍ស្រាប់ បែលហ្សិកបានទាមទារឲ្យEuroclear ដែលគ្រប់គ្រងទ្រព្យសម្បត្តិបង្កករបស់ធនាគារកណ្តាលរុស្ស៊ី បង់ពន្ធលើប្រាក់ចំណេញ ឬការប្រាក់បានមកពីទ្រព្យរុស្ស៊ី មុននឹងបង្វែរទៅឲ្យអ៊ុយក្រែន។ នៅឆ្នាំ ២០២៣ ប៊ែលហ្សិកប្រមូលបានពន្ធពីទ្រព្យសម្បត្តិបង្កករុស្ស៊ី ប្រមាណ ៦០០លានអឺរ៉ូ ដើម្បីយកទៅជួយអ៊ុយក្រែន។ ថ្មីៗនេះ នាយករដ្ឋមន្រ្តីបែលហ្សិក លោក Alexander de Croo សន្យាថា នឹងព្យាយាមប្រមូលពន្ធបន្ថែមទៀត នៅឆ្នាំនេះ ឲ្យបាន១៧០០លានអឺរ៉ូ ដើម្បីប្រគល់ទៅឲ្យអ៊ុយក្រែន។
គួររំលឹកថា នៅតែប៉ុន្មានខែក្រោយ រុស្ស៊ីចូលធ្វើសង្រ្គាមឈ្លានពានអ៊ុយក្រែន ប្រទេសលោកខាងលិច ដូចជាអាមេរិក អង់គ្លេស និងសហភាពអឺរ៉ុបបានដាក់ទណ្ឌកម្មសេដ្ឋកិច្ចលើរុស្ស៊ី ដែលនៅក្នុងនោះ ទ្រព្យសម្បត្តិរបស់រដ្ឋរុស្ស៊ី និងមហាសេដ្ឋី អ្នកជំនួញរុស្ស៊ី ប្រមាណ ៣៥០ពាន់លានអឺរ៉ូ ត្រូវគេបង្កកទុកនៅតាមធនាគារក្នុងប្រទេសលោកខាងលិច។
ដោយទាញប្រយោជន៍ពីប្រាក់ចំណេញ បានមកពីទ្រព្យសម្បត្តិរុស្ស៊ី ដែលបង្កកទុកនៅអឺរ៉ុប សហភាពអឺរ៉ុប ដែលបានទទួលការគាំទ្រពីក្រុមប្រទេសG7 កំពុងស្វះស្វែងរកមធ្យោបាយ ប្រភពហិរញ្ញវត្ថុថ្មីដើម្បីជួយអ៊ុយក្រែន នៅក្នុងកាលៈទេសៈដែលប្រាក់ជំនួយអន្តរជាតិសម្រាប់អ៊ុយក្រែនកាន់តែយ៉ាប់រក។ នៅអាមេរិក គណបក្សសាធារណរដ្ឋដែលជាបក្សប្រឆាំងបានបោះឆ្នោត ប្រឆាំងនៅសភាមិនឲ្យអាមេរិកផ្តល់ជំនួយហិរញ្ញវត្ថុ និងយោធាជួយអ៊ុយក្រែន ក្នុងហេតុផលថា អាមេរិកខ្លួនឯងត្រូវការថវិកាដើម្បីដោះស្រាយបញ្ហាបន្ទាន់ក្នុងស្រុក ដូចជាបញ្ហាអន្តោប្រវេសន៍ នៅព្រំដែនជាដើម។ ចំណែក ការសន្យាផ្តល់ប្រាក់ជំនួយ និងកម្ចី ៥០ពាន់លានអឺរ៉ូ របស់សហភាពអឺរ៉ុបសម្រាប់អ៊ុយក្រែន ក៏កំពុងត្រូវជាប់គាំង ដោយសារការប្រឆាំងរបស់ហុងគ្រី។
អង្គការសហប្រជាជាតិ ធនាគារកណ្តាលវាយតម្លៃ កាលពីខែ មីនាឆ្នាំមុន ថា គេត្រូវការទឹកប្រាក់ប្រមាណ ៣៨០ពាន់លានអឺរ៉ូ ស្មើនឹង៤១១ពាន់លានដុល្លារ សម្រាប់សាងសង់អ៊ុយក្រែនឡើងវិញ នៅក្រោយសង្រ្គាមបិទបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ