សហជីពកសិករបារាំង អំពាវនាវបិទបញ្ចប់បាតុកម្ម ក្រោយលោកហ្កាប្រ៊ីយែល អាតាល់ ប្រកាសវិធានការជួយកសិករ
បារាំង-កសិកម្ម – គិតត្រឹមព្រឹកថ្ងៃសុក្រទី២កុម្ភៈ ចលនាបាតុកម្មរបស់កសិករបារាំងនៅទូទាំងប្រទេស បានចាប់ផ្តើមដកថយ ជាបណ្ដើរៗហើយ។ សហជីពកសិករបារាំងធំៗចំនួន២ បានអំពាវនាវ ឲ្យបាតុករដកថយ និងបិទបញ្ចប់បាតុកម្ម ដែលបានអូសបន្លាយ២សប្តាហ៍មកហើយ។ ការដកថយនេះ គឺត្រូវបានធ្វើឡើង បន្ទាប់ពីលោកនាយករដ្ឋមន្ត្រីបារាំង ហ្កាប្រ៊ីយែល អាតាល់ បានប្រកាសនូវវិធានមួយចំនួនបន្ថែមទៀត ដើម្បីឆ្លើយតបទៅនឹងការទាមទាររបស់កសិករបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៥
នៅល្ងាចថ្ងៃព្រហស្បតិ៍ គេសង្កេតឃើញ មានសញ្ញាណវិជ្ជមាននៃការស្រុះស្រួលគ្នា រវាងក្រុមកសិករបាតុករបារាំង ក្នុងការដកថយ ឬផ្អាកចលនាបាតុកម្មមួយរយៈសិន។ អាជ្ញាធរមូលដ្ឋាន នៅទូទាំងប្រទេសបារាំង បានអះអាងថា បាតុករបានចាប់ផ្តើមរុះរើ បន្តិចម្តងៗ នៅតាមចំណុចដែលពួកគេជួបជុំគ្នាដាក់រនាំងបិទផ្លូវ។ ក្បួនត្រាក់ទ័រ និងយានយន្តកសិកម្ម បានចាប់ផ្តើមចេញដំណើរត្រឡប់ទៅតាមភូមិស្រុករៀងៗខ្លួនវិញ នៅព្រឹកថ្ងៃសុក្រ។
ថ្លែងនៅក្នុងសន្និសីទកាសែតមួយ ធ្វើនៅបារីស កាលពីល្ងាចថ្ងៃព្រហស្បតិ៍ទី១កុម្ភៈ លោក Arnaud Gaillot ប្រធានសហជីពកសិករវ័យក្មេង Jeunes agriculteurs (JA) និងលោក Arnaud Roussea ប្រធានសហជីពFNSEA បានអះអាងថា ដោយសង្កេតឃើញការប្រកាសវិធានការមួយចំនួន ឆ្លើយតបមកកាន់កសិករ ពីសំណាក់រដ្ឋាភិបាល សហជីពធំៗទាំង២ បានសម្រេចអំពាវនាវឲ្យបាតុករដកថយ សម្រាកយកកម្លាំង ដើម្បីទុកឲ្យសហជីពបន្តការចរចាជាមួយរដ្ឋាភិបាល និងក្រុមឈ្មួញកណ្តាល។ តែយ៉ាងណា សហជីពសូមរក្សាសិទ្ធិត្រលប់មកធ្វើបាតុកម្មវិញ នៅក្នុងឱកាសពិពណ៌កសិកម្ម នៅចុងខែកុម្ភៈ ប្រសិនបើការចរចាមិនបានលទ្ធផល។
លោក Laurent Saint-Affre តំណាងសហជីពFNSEA ប្រចាំតំបន់ Aveyron បានបញ្ជាក់ឲ្យដឹងថា បាតុកម្មរបស់កសិករបារាំងប្រមាណជិត២សប្តាហ៍មកនេះ គឺជាចលនាបាតុកម្មដ៏ធំជាប្រវត្តិសាស្ត្រហើយ។ លោកអះអាងថា អ្វីៗមិនទាន់ចប់ទាំងស្រុងទេ ព្រោះនៅមានចំណុចមួយចំនួនទៀត ដែលកសិករមិនទាន់បានចម្លើយពីរដ្ឋាភិបាល ជាក់ស្តែងដូចជាការកំណត់តម្លៃទឹកដោះគោជាដើម។
យ៉ាងណាក៏ដោយ សហជីពកសិករបារាំងមួយទៀត ឈ្មោះ Confédération paysanne បានប្រកាសថា គេនឹងនៅតែបន្តធ្វើបាតុកម្ម មិនទាន់ដកថយនៅពេលនេះទេ។ មូលហេតុដែលគេបន្តធ្វើបាតុកម្ម ព្រោះថាចំណុចដ៏ធំមួយ ទាក់ទិននឹង ប្រាក់ចំណូលរបស់កសិករ នៅមិនទាន់ត្រូវបានរដ្ឋាភិបាលយកមកគិតគូរ ឲ្យបានម៉ដ្ឋចត់ឡើយ។
សូមបញ្ជាក់ថា កាលពីថ្ងៃព្រហស្បតិ៍ លោកហ្កាប៊្រីយែល អាតាល់ នាយករដ្ឋមន្ត្រីបារាំង បានប្រកាសនូវវិធានការថ្មីៗបន្ថែមទៀត ដើម្បីជួយដល់កសិករបារាំង។ ក្នុងចំណោមវិធានថ្មីៗទាំងនោះ គឺមានការទប់ស្កាត់ កុំឲ្យកសិករ ចាំតែទទួលរងថ្មបាក់ ទៅតាមការកំណត់តម្លៃថោកហួសប្រមាណ ដោយការស៊ំគ្រលំគ្នា រវាងក្រុមឈ្មួញកណ្តាល និងសហគ្រាសកសិឧស្សាហកម្ម ក៏ដូចជាបណ្តាញចែកចាយតាមផ្សារទំនើបជាដើម។
ផ្អែកតាមក្រសួងសេដ្ឋកិច្ចបារាំងវិញ វិធានការបន្ទាន់ទាំងអស់ ដែលរដ្ឋាភិបាលបានប្រកាសដើម្បីជួយដល់កសិករបារាំង កាលពីថ្ងៃព្រហស្បត៍ គឺមានតម្លៃទឹកប្រាក់ចំនួន ៤០០លានអឺរ៉ូ។ លោកហ្កាប៊្រីយែល អាតាល់ បានប្រកាសផងដែរ នូវវិធានការជួយផ្នែកពន្ធរដ្ឋ ដែលមានតម្លៃទឹកប្រាក់ ចំនួន១៥០លានអឺរ៉ូ ដើម្បីជួយសម្រាលបន្ទុក ដល់កសិករអ្នកចិញ្ចឹមគោ។
ដោយឡែក រដ្ឋាភិបាលលោកអាតាល់ បានប្រកាស “ផ្អាកសិន” នូវការអនុវត្តគោលនយោបាយ ហាមឃាត់ការប្រើ សារធាតុគីមីបាញ់សម្លាប់ស្មៅ និងបាញ់សម្លាប់សត្វល្អិត ដើម្បីទុកឲ្យកសិករបានដកដង្ហើមខ្លះ។ ការប្រកាសរបស់រដ្ឋាភិបាលនេះ ត្រូវបានក្រុងអង្គការបរិស្ថាន បរិហារថា ជាការដកថយមួយដ៏គ្រោះថ្នាក់ខ្លាំងណាស់ សម្រាប់យុទ្ធនាការការពារបរិស្ថាន និងសុខមាលភាពប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ