បារាំងបើកពិព័រណ៍កសិកម្ម ឆ្នាំ២០២៤ ក្រោមកំហឹងនិងប៉ះទង្គិចជាមួយកសិករ
ព្រឹកថ្ងៃសៅរ៍ ទី២៤កុម្ភៈ បារាំងបានបើកពិព័រណ៍កសិកម្ម ក្រោមកំហឹងរបស់កសិករ។ កសិករបារាំង ប្រមូលផ្តុំគ្នាសម្តែងមតិនៅមុខរោងពិព័រណ៍ក្នុងក្រុងប៉ារីស ហើយព្យាយាមប្រុងរារាំងមិនឲ្យកម្មវិធីបើកដំណើរការទៅបាន។ កសិករជាង១០នាក់ បានប៉ះទង្គិចប្រទាញប្រទង់រុញច្រានគ្នាជាមួយកងកម្លាំងសន្តិសុខ និងត្រូវក្រុមសមត្ថកិច្ចចាប់ចេញ។ ភ្លាមៗ ប្រធានាធិបតីបារាំង លោក អេម៉ានុយអែល ម៉ាក្រុង ដែលអញ្ជើញទៅសម្ពោធកម្មវិធីពិព័រណ៍នោះ បានអំពាវនាវឲ្យរក្សាភាពស្ងៀមស្ងាត់ និងសន្យាទទួលជួបសហជីពកសិករ ហើយទីបំផុត កម្មវិធីបើកដំណើរការ ដោយយឺតជាងការគ្រោងទុក។
ចុះផ្សាយនៅថ្ងៃ៖
ស្តាប់ - ០២:៥៧
កសិករបារាំងសម្តែងមតិមិនសប្បាយចិត្ត និងយកត្រាក់ទ័រមកបាំងបិទផ្លូវ នៅមុខមជ្ឈមណ្ឌលតាំងពិព័រណ៍ Porte de Versailles។ កសិករខ្លះបានព្យាយាមសម្រុកចូលក្នុងសាលពិព័រណ៍ដោយមិនឲ្យសន្តិសុខត្រួតពិនិត្យឆែកឆេរ។ អ្នកខ្លះទៀត ដើរសំដៅស្វែងរកជួបប្រធានាធិបតី នៅក្នុងសាលពិព័រណ៍។ មនុស្សជាង១០នាក់ ក៏បានប៉ះទង្គិចគ្នា វាយតប់តិចតួច ជាមួយពួកកម្លាំងសន្តិសុខ។ ហេតុការណ៍នេះ បណ្តាលឲ្យការបើកដំណើរកម្មវិធីពិព័រណ៍សម្រាប់សាធារណៈជន មានភាពយឺតយ៉ាវ។
ក្នុងនិងក្រៅសាលពិព័រណ៍ មានយាមកាមពង្រឹងសន្តិសុខយ៉ាងខ្លាំង។ ក្រុមប៉ូលិសជាច្រើនដាក់ពង្រាយយាមល្បាត។ ក្រុមសហជីពកសិករ ដែលអ្នកកាសែតអាចសម្គាល់បាន គឺសហព័ន្ធសម្របសម្រួលជនបទ សហជីពជាតិផលិតកម្មកសិកម្ម និង សហជីពកសិករវ័យក្មេង។ ខាងក្រៅសាលពិព័រណ៍ ក្រុមកសិករ បានស្រែកបំពងសំឡេង ហើយប្រកូកប្រកាសឲ្យ«ប្រគល់ខ្លួនលោក ម៉ាក្រុង ទៅពួកគេ»។ ពួកគេក៏ស្រែកព្រមទាំងសរសេរបដាថា «ប្រធានាធិបតីត្រូវចុះចេញពីតំណែង»។ លោក Arnaud Gaillot អ្នកតំណាងកសិកម្មម្នាក់ បានលើកឡើងប្រាប់អ្នកកាសែតបារាំងថា «ពួកយើងកសិករត្រូវការចម្លើយច្បាស់លាស់ ត្រូវការទស្សនវិស័យប្រាកដប្រជា ហើយនិងមានមធ្យោបាយគន្លឹះជាស្រេចដើម្បីនាំមកនូវដំណោះស្រាយ។ គន្លឹះ១ធំ គឺនៅលើប្រធានាធិបតី»។
ប្រធានាធិបតីបារាំងដែលអញ្ជើញទៅសម្ពោធកម្មវិធីពិព័រណ៍ បានអំពាវនាវឲ្យរក្សាភាពស្ងៀមស្ងាត់ ហើយលោក អេម៉ានុយអែល ម៉ាក្រុង បានបើកការជជែកពិភាក្សាដេញដោលគ្នាជាមួយកសិករមួយចំនួននៅសាលពិព័រណ៍តែម្តង។ ទោះយ៉ាងនេះក្តី លោក ម៉ាក្រុង បញ្ជាក់ថា ត្រឹមតែប៉ុន្មាន២-៣ម៉ោង មិនអាចដោះស្រាយវិបត្តិកសិកម្មទាំងមូលរួចនោះឡើយ ដ្បិតថាគេត្រូវយល់ដឹងទូលំទូលាយពីទិដ្ឋភាពច្បាប់ វិធានការបទដ្ឋាននានាទាក់ទងផលិតកម្មនិងចំណីអាហារ។ល។ ដូច្នេះហើយ ទើបលោកប្រមុខរដ្ឋបារាំងបានសន្យាទទួលជួបជាមួយក្រុមសហជីពកសិករគ្រប់ភាគី នៅវិមានប្រធានាធិបតី ក្នុងអំលុងពេល ៣ សប្តាហ៍ ខាងមុខ ដើម្បីជជែកគ្នាលម្អិត និង រកដំណោះស្រាយវិបត្តិកសិកម្ម។
ពិព័រណ៍កសិកម្មបារាំង រៀបចំឡើងរៀងរាល់ឆ្នាំ។ ឆ្នាំនេះ ជួបវិបត្តិជាច្រើនសប្តាហ៍មកហើយ ព្រោះតែប្រជាកសិករ បានធ្វើបាតុកម្មបិទផ្លូវជាតិនានា សម្តែងមតិអំពីផលលំបាកក្នុងដំណើរការផលិតកម្ម រៀបរាប់អីទុក្ខលំបាកក្នុងជីវភាព ហើយនិងបញ្ចេញការមិនពេញចិត្តប្រឆាំងនឹងនយោបាយកសិកម្មរបស់រដ្ឋាភិបាល។ ក្នុងប្រទេសមួយចំនួននៅអឺរ៉ុប ក៏មានចលនាកសិករងើបឈរធ្វើបាតុកម្ម ជាច្រើនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ