ប៉ារីសបើកជំនួបប្រជុំអន្តរជាតិដើម្បីរកវិធីជួយអ៊ុយក្រែនប្រកបដោយប្រសិទ្ធភាព
ប្រមុខរដ្ឋ-រដ្ឋាភិបាលជាង២០ប្រទេស ភាគច្រើនជាអឺរ៉ុប បានមកជួបប្រជុំគ្នានៅក្រុងប៉ារីស តាមគំនិតផ្តួចផ្តើមរបស់ប្រធានាធិបតីបារាំង លោក អេម៉ានុយអែល ម៉ាក្រុង។ កម្មវត្ថុនៃជំនួប គឺដើម្បីបញ្ជាក់អំពីសាមគ្គីភាពរបស់លោកខាងលិចចំពោះអ៊ុយក្រែន និងរិះរកមធ្យោបាយជួយអ៊ុយក្រែនប្រកបដោយប្រសិទ្ធភាព ព្រោះបើតាមលោកប្រធានាធិបតី ហ្សេឡេនស្គី ជោគជ័យរបស់អ៊ុយក្រែនអាស្រ័យលើសម្ព័ន្ធមិត្ត។
ចុះផ្សាយនៅថ្ងៃ៖
ស្តាប់ - ០២:៤៣
ក្រោមការផ្តួចផ្តើមរបស់ប្រធានាធិបតីបារាំង មេដឹកនាំប្រទេសភាគច្រើននៅអឺរ៉ុបមានជាអាទិ៍ប្រមុខរដ្ឋាភិបាល អាល្លឺម៉ង់ ប្រធានាធិបតីប៉ូឡូញ នាយករដ្ឋមន្ត្រីនៃ១៥ប្រទេសជាសមាជិកសហភាពអឺរ៉ុប ព្រមទាំងប្រមុខការទូតអង់គ្លេស និងតំណាងអាមេរិកកាណាដា បានបង្ហាញវត្តមាននៅវិមានអេលីហ្សេ ក្នុងជំនួបដែលមានលក្ខណៈពិសេសប្លែក។
ថ្វីបើគ្មានគម្រោងប្រកាសបន្ថែមជំនួយថ្មីមែន តែជំនួបនេះរៀបចំឡើងក្នុងបំណងពិនិត្យពិច័យអំពីមធ្យោបាយ និងរិះរកវិធីជួយអ៊ុយក្រែន ដោយជាក់ស្តែងនិងប្រកបដោយប្រសិទ្ធភាព ក្នុងខណៈដែលអ៊ុយក្រែនកំពុងខ្វះអាវុធ ខ្វះគ្រាប់និងស្ថិតក្នុងស្ថានភាពលំបាកនៅលើសមរភូមិ។ នេះជាឱកាសដែលអឺរ៉ុបចង់បញ្ជាក់អំពីសាមគ្គីភាពនិងបង្ហាញសកម្មភាពគាំទ្រ មិនថមថយក្នុងការជួយអ៊ុយក្រែនរហូតទាល់តែអំពើឈ្លានពានរុស្ស៊ីបរាជ័យ។ រុស្ស៊ីមិនអាចទទួលជោគជ័យលើអ៊ុយក្រែនបានទេ។ នេះជាការគូសបញ្ជាក់របស់វិមានប្រធានាធិបតីបារាំង។
ជោគជ័យឬបរាជ័យរបស់អ៊ុយក្រែនអាស្រ័យលើអ្នក! នេះជាប្រសាសន៍របស់លោកហ្សេឡេនស្គី ប្រធានាធិបតីអ៊ុយក្រែន ដែលចូលរួមក្នុងជំនួបក្រុងប៉ារីសតាមប្រព័ន្ធវីដេអូ។ មុនជំនួបក្រុងប៉ារីស លោកហ្សេឡេនស្គីបានធ្វើសន្និសីទកាសែតរៀបរាប់ថា ស្ថានភាពលំបាករបស់យោធាអ៊ុយក្រែននៅលើសមរភូមិ និងផែនការវាយបករំដោះទឹកដីត្រូវបរាជ័យកាលពីរដូវក្តៅ២០២៣ ដោយហេតុតែមានការលេចធ្លាយព័ត៌មានរុស្ស៊ីដឹងការណ៍សម្ងាត់មុន ហើយជំនួយរបស់លោកខាងលិចមកយឺតយ៉ាវខ្លាំង។ ជំនួយអាវុធយុទ្ធភណ្ឌរបស់ក្រុមប្រទេសអឺរ៉ុបបានមកដល់អ៊ុយក្រែនទាន់ពេលវេលាតែប្រមាណ៥០%ប៉ុណ្ណោះ ទើបកងកម្លាំងអ៊ុយក្រែនត្រូវបាត់បង់យោធា និងបាត់បង់ដីទៅវិញ។ បើតាមលោកហ្សេឡេនស្គី សង្គ្រាមពីរឆ្នាំនេះបានសម្លាប់ជីវិតយោធាអ៊ុយក្រែនអស់៣១០០០នាក់។ តែទោះជាយ៉ាងណា ក៏លោកជឿជាក់ជានិច្ចថាសភាអាមេរិកនឹងព្រមអនុម័តកញ្ចប់ជំនួយតម្លៃ៦០ពាន់លានសម្រាប់អ៊ុយក្រែន។
សម្រាប់អ្នកវិភាគ ដោយហេតុតែការគាំទ្រហិរញ្ញវត្ថុដ៏ចម្បងរបស់អាមេរិកចំពោះអ៊ុយក្រែន ត្រូវជាប់គាំងនៅសភា ហើយដំណើរផ្លូវរបស់លោកដូណាល់ត្រាំអាចត្រលប់មកសេតវិមានវិញកាន់ស្រលះ អឺរ៉ុបកំពុងបែកញើស និងព្រួយបារម្ភខ្លាំង ទើបត្រូវប្រឹងពង្រឹងខ្លួនឯង រៀបចំជំនួបថ្ងៃនេះដើម្បីអ៊ុយក្រែន ទល់នឹងអាមេរិកមុនត្រលប់មកកាន់អំណាចជាយថាហេតុវិញរបស់លោកត្រាំ។ ទំនាក់ទំនងរវាងលោកត្រាំនិងអឺរ៉ុបមិនដែលរលូនល្អទេ។ លោកត្រាំអួតអាងថានឹងដោះស្រាយវិបត្តិអ៊ុយក្រែនបានដោយប្រើពេលតែ២៤ម៉ោង គឺពុះចែកអ៊ុយក្រែនជាពីរ ដែលផ្ទុយស្រលះនឹងសណ្តាប់ធ្នាប់អន្តរជាតិ សម្រាប់ក្រសែភ្នែកអឺរ៉ុប។ នេះបើតាមទស្សនៈរបស់លោក André Filler សាស្ត្រាចារ្យនៅវិទ្យាស្ថានភូមិសាស្ត្រនយោបាយបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ