លោកប្រធានាធិបតីអ៊ុយក្រែន អំពាវនាវសុំអាវុធ ពីបណ្តាប្រទេសតំបន់បាល់កង់
លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានទៅចូលរួមជំនួបកំពូលនៃប្រទេសតំបន់បាល់កង់ ដែលរៀបចំធ្វើនៅទីក្រុង ទីរ៉ាណា ប្រទេសអាល់បានី កាលពីថ្ងៃពុធ ទី២៨កុម្ភៈ។ នៅក្នុងឱកាសនោះ លោកហ្សេឡេនស្គី បានថ្លែងអំពាវនាវ សុំឲ្យបណ្តាប្រទេសតំបន់បាល់កង់ ជួយផ្តល់គ្រាប់និងអាវុធឲ្យអ៊ុយក្រែនបន្ថែមទៀត ដើម្បីតស៊ូប្រយុទ្ធទល់នឹងការឈ្លានពានរបស់រុស្ស៊ី។ បន្ថែមពីនេះ លោកហ្សេឡេនស្គី បានលើកឡើងអំពីគម្រោង រៀបចំជាឧស្សាហកម្មសព្វាវុធ នៅក្នុងតំបន់អឺរ៉ុបភាគអាគ្នេយ៍នេះ ដើម្បីបន្ថែមកម្លាំងផ្គត់ផ្គង់ឲ្យបានកាន់តែច្រើន។
ចុះផ្សាយនៅថ្ងៃ៖
ស្តាប់ - ០២:៣២
ថ្លែងទៅកាន់ថ្នាក់ដឹកនាំរដ្ឋាភិបាលក្រូអាស៊ី អាល់បានី ស៊ែរប៊ី កូសូវ៉ូ និងបូសនី លោកវ្លូឌីមៀរ ហ្សេឡេនស្គី បានទទួលស្គាល់ថា បច្ចុប្បន្ននេះ កងទ័ពអ៊ុយក្រែនកំពុងតែជួបការលំបាកនៅសមរភូមិ។ ការលំបាកដែលបណ្តាលមកពី បញ្ហាខ្វះគ្រាប់ប្រយុទ្ធ។ លោកហ្សេឡេនស្គី បានបន្ថែមថា រដ្ឋាភិបាលលោក មានបំណងរៀបចំវេទិកាជជែកមួយ រវាងអ៊ុយក្រែន និងក្រុមប្រទេសតំបន់បាល់កង់ ស្តីអំពីឧស្សាហកម្មយោធា។ លោកហ្សេឡេនស្គី បានអះអាងថា ប្រទេសខ្លះក្នុងតំបន់នេះ អាចមានសមត្ថភាពនិងលទ្ធភាពធំ ក្នុងការផលិតគ្រាប់។
សូមបញ្ជាក់ថា លោកប្រធានាធិបតីអ៊ុយក្រែន កំពុងតែធ្វើដំណើរពីប្រទេសមួយទៅប្រទេសមួយ ដើម្បីថ្លែងសារនិងអំពាវនាវ ឲ្យគ្រប់គ្នាជួយប្រទេសលោក ដែលកំពុងតែរងគ្រោះដោយសារតែសង្គ្រាមឈ្លានពានរបស់រុស្ស៊ី។ មុននឹងទៅដល់អាល់បានី កាលពីថ្ងៃពុធ លោកហ្សេឡេនស្គី បានធ្វើដំណើរទៅអារ៉ាប៊ីសាអូឌីត។ ហើយមុនពេលចូលរួមជំនួបកំពូលក្រុមប្រទេសបាល់កង់ លោកហ្សេឡេនស្គី បានប្រជុំទ្វេភាគីជាមួយ លោកនាយករដ្ឋមន្ត្រីអាល់បានី។
ចេញពីការប្រជុំនេះ លោកហ្សេឡេនស្គី បានប្រាប់អ្នកកាសែត ថាអាល់បានីគឺជាប្រទេសលំដាប់ទី៣ ដែលបានជួយអ៊ុយក្រែនច្រើនជាងគេបង្អស់ បើគិតពីទំហំសមាមាត្រនៃចំនួនប្រជាជន។ តាំងតែពីភ្លាមៗ ក្រោយការឈ្លានពានរបស់រុស្ស៊ី អាល់បានីបានបញ្ជូនអាវុធ គ្រាប់កាំភ្លើង និងរថក្រោះទៅជួយអ៊ុយក្រែន។ លោកហ្សេឡេនស្គី បានអះអាងដែរថា ក្នុងពេលប្រជុំ លោកនិងលោកនាយករដ្ឋមន្ត្រីអាល់បានី Edi Rama បាននិយាយគ្នាអំពីលទ្ធភាពនៃការរួមគ្នាផលិតអាវុធ។
គួរបញ្ជាក់ដែរថា ជំនួយយោធាទៅឲ្យអ៊ុយក្រែន គឺជាសំណុំរឿងដែលកំពុងត្រូវបានគេជជែក យ៉ាងសកម្មនៅអឺរ៉ុប បន្ទាប់ពីកញ្ចប់ថវិកាពីសហរដ្ឋអាមេរិកឯណោះ ត្រូវជាប់គាំងនៅឯសភាខុសហ្ក្រេស។ នៅអឺរ៉ុប សាធារណរដ្ឋឆែក បានស្នើគំនិតថា ត្រូវចូលប្រាក់គ្នា ទិញគ្រាប់ដែលផលិតនៅក្រៅអឺរ៉ុប ហើយបញ្ជូនយកទៅឲ្យអ៊ុយក្រែន។ សំណើរយោបល់របស់សាធារណរដ្ឋឆែកនេះ ត្រូវបានគេលើកយកទៅជជែក កាលពីជំនួបកំពូលស្តីពីសន្តិសុខ នៅទីក្រុងមុយនីឆ ថ្ងៃទ១៧ដល់១៩កុម្ភៈ។ ប្រទេសសមាជិកអឺរ៉ុបខ្លះបាន បង្ហាញជំហរគាំទ្រគំនិតនេះ។
លោក Petr Pavel ប្រធានាធិបតីឆែក បានអះអាងថា ឆែក ដាណឺម៉ាក និងកាណាដា បានប្រមូលព័ត៌មានបានថា គេអាចប្រមូលទិញគ្រាប់ទំហំ១៥៥មីលីមែត្រចំនួនកន្លះលានគ្រាប់ និងគ្រាប់ទំហំ១២២មីលីមែត្រ ចំនួន៣សែនគ្រាប់ ក្នុងរយៈពេលត្រឹមតែប៉ុន្មានសប្តាហ៍ ដើម្បីយកទៅជួយអ៊ុយក្រែន ប្រសិនបើគេអាចប្រមូលប្រាក់ បានគ្រប់គ្រាន់ភ្លាមៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ