ជីវិតគ្រូបង្រៀនប្រឈមនឹងការគំរាមកំហែង បារាំងរឹតបន្តឹងសន្តិសុខនៅសាលារៀន
នៅបារាំង រដ្ឋាភិបាលរឹតបន្តឹងសន្តិសុខនៅតាមសាលារៀន នៅបន្ទាប់ពីមានការគំរាមកំហែងអាយុជីវិតដល់គ្រូបង្រៀន។ ក្នុងសប្តាហ៍នេះ សិស្សវិទ្យាល័យនិងក្មេងជំទង់ ៣នាក់ ត្រូវ តុលាការ សួរចម្លើយ ជុំវិញការបញ្ចេញសារ និងសញ្ញាសកម្មភាពគំរាមកំហែងភេរវកម្ម និងគំរាមកំហែងដល់អាយុជីវិតបុគ្គលិកសិក្សា។ ស្របគ្នានេះដែរ លោកស្រីរដ្ឋមន្ត្រីអប់រំបារាំង ក៏បានប្រកាសពីការបង្កើតកងកម្លាំងអន្តរាគមន៍ពិសេសចុះចល័តក្នុងសាលារៀនតែម្តង ក្នុងករណីចាំបាច់ មានសញ្ញាអាសន្ន។
ចុះផ្សាយនៅថ្ងៃ៖
ស្តាប់ - ០២:៥៧
យ៉ាងហោច សិស្សវិទ្យាល័យនិងក្មេងជំទង់ ៣នាក់ អាយុចន្លោះពី ១៥ ដល់១៧ឆ្នាំ ត្រូវ ចៅក្រមបារាំង បើកនិតីវិធីសួរចម្លើយ ជុំវិញការបញ្ចេញសារ និងសញ្ញាសកម្មភាពគំរាមកំហែងភេរវកម្ម, ប្រកាសដំណឹងអាសន្នគំរាមកំហែងដល់អាយុជីវិតបុគ្គលិកសិក្សា។ ប្រភពពីរដ្ឋាភិបាលនិងតំណាងអយ្យការបារាំង ក្មេងជំទង់ទាំង៣នោះ សុទ្ធតែនៅតំបន់ដាច់ដោយឡែកពីគ្នា។ ម្នាក់អាយុ១៦ឆ្នាំ នៅខេត្តប័រដូរ ប៉ែកអាគ្នេយ៍បារាំង ត្រូវនគរបាលចាប់ឃុំខ្លួន ពីបទគំរាមកំហែងបង្កគ្រោះថ្នាក់ដល់អាយុជីវិត និងបញ្ចេញសាធារណៈពីសកម្មភាពភេរវកម្ម។ ម្នាក់ទៀត អាយុ១៥ឆ្នាំ នៅខេត្តអាល់ស្សាស ខាងកើតបារាំង។ មុនត្រូវចាប់ខ្លួនសួរចម្លើយ រូបគេនោះបានប្រកាសអាសន្នថាមានគ្រាប់បែកផ្ទុះនៅវិទ្យាល័យ២កន្លែង ក្នុងក្រុងនិងជាយក្រុងមឺឡូស។ រូបគេត្រូវនគរបាលចាប់ខ្លួន ពីថ្ងៃព្រហស្បតិ៍ និងដាក់ក្រោមការត្រួតពិនិត្យរបស់តុលាការ។ ថ្ងៃទី២៨មីនាដដែល នៅជាយក្រុងប៉ារីស នគរបាលប្រឆាំងបទល្មើសឧក្រិដ្ឋតាមអាំងទែរនែត បានចាប់ខ្លួនយុវសិស្សម្នាក់ទៀត។ ក្មេងជំទង់អាយុ១៧ឆ្នាំរូបនេះ ត្រូវបង្ហាញខ្លួនចំពោះមុខចៅក្រមស៊ើបសួរ នៅថ្ងៃសៅរ៍ ទី៣០មីនា។
នៅបារាំង ក្នុងពេលជាង១សប្តាហ៍ចុងក្រោយនេះ មានគ្រឹះស្ថានសិក្សា ជាង១៥០កន្លែង រងសញ្ញាគួរឲ្យព្រួយបារម្ភពីសកម្មភាពវាយប្រហារនិងគំរាមកំហែង។ ហេតុដែលបណ្តាលឲ្យចលាចលខ្លាំងនិងព្រួយបារម្ភសុវត្ថិភាពនៅសាលារៀន ដើមហេតុគឺកាលពីសប្តាហ៍មុន នៅក្នុងវិទ្យាល័យថ្នាក់បណ្តុះបណ្តាលវិជ្ជាជីវៈ១ ជាយក្រុងប៉ារីស មានសិស្សស្រីម្នាក់កាន់សាសនាអ៊ីស្លាម ត្រូវ នាយកសាលា បញ្ជាហាមមិនឲ្យទទូលក្រដាត់ជូតក្បាលចូលសាលារៀន។ នាងយករឿងនេះទៅប្រាប់បងប្រុស ហើយក៏បង្កជាហេតុកំហែងគំរាមសម្លាប់នាយកសាលា។ ទីបំផុត លោកនាយកសាលា ក៏បានសុំលាឈប់ពីតួនាទី នៅមុនអាយុចូលនិវន្តន៍ ព្រោះតែព្រួយបារម្ភពីសុវត្ថិភាពអាយុជីវិត។ រដ្ឋាភិបាលបារាំងគាំទ្រស្មារតីលោកនាយកនិងបុគ្គលិកសិក្សា ហើយប្រមុខរដ្ឋាភិបាល លោក ហ្កាប៊្រីយែល អាតតាល់ បានប្រកាសដាក់ពាក្យប្តឹងក្មេងស្រីសិស្សសាលានោះ ទៀតផង។
ក្រសួងអប់រំ ក្រសួងមហាផ្ទៃ ក្រសួងយុត្តិធម៌ រួមទាំងបណ្តានាយកសាលា និងចៅហ្វាយខេត្តនានា បានរួមប្រជុំគ្នាដើម្បីរិះរកចំណាត់ការនិងវិធានាការសុវត្ថិភាពរួមគ្នា ក្នុងសប្តាហ៍នេះ។ ដើម្បីធានាទំនុកចិត្តផ្នែកសន្តិសុខសុវត្ថិភាព ដល់គ្រូបង្រៀននិងបុគ្គលិកសិក្សា រដ្ឋមន្ត្រីក្រសួងសិក្សាធិការជាតិ លោកស្រី នីកូល បេល្លូបេត៍ បានប្រកាសកាលពីថ្ងៃសុក្រ បង្កើតកងកម្លាំងអន្តរាគមន៍ពិសេសចល័តតាមសាលារៀន ហើយនិងចូលអន្តរាគមន៍ល្បាតក្នុងសាលារៀនតែម្តង ក្នុងករណីចាំបាច់។ ការប្រកាសនេះធ្វើឡើងក្នុងដំណើរទស្សនកិច្ចរបស់លោកស្រីរដ្ឋមន្ត្រីអប់រំទៅខេត្តប័រដូរ ជាទីដែលយុវសិស្សម្នាក់ បញ្ចេញសារគំរាមកំហែងអំពើភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ