នាយករដ្ឋមន្រ្តីប៉ូឡូញព្រមានថា អឺរ៉ុបកំពុងដើរចូលក្នុងសម័យមុនសង្រ្គាម
នៅក្នុងបទសម្ភាសន៍របស់លោកជាមួយសម្ព័ន្ធកាសែតអឺរ៉ុប កាលពីថ្ងៃសុក្រទី២៩មីនា នាយករដ្ឋមន្រ្តីប៉ូឡូញ លោកDonald Tusk បានព្រមានប្រាប់បណ្តាប្រទេសអឺរ៉ុបឲ្យត្រៀមខ្លួនសម្រាប់សង្រ្គាមជាមុន ព្រោះថា សង្រ្គាមរុស្ស៊ីឈ្លានពានអ៊ុយក្រែន ជាង២ឆ្នាំមកនេះ បង្ហាញថា សង្រ្គាមលែងជាកុងសិបអតីតកាលតទៅទៀតហើយ ប៉ុន្តែ ជារឿងដែលអាចកើតឡើងពិតៗនៅអឺរ៉ុប។ សម្រាប់ប្រមុខរដ្ឋាភិបាលប៉ូឡូញ វាជារឿងចាំបាច់បំផុតដែលអឺរ៉ុបត្រូវជួយអ៊ុយក្រែន ព្រោះថា បើសិនអ៊ុយក្រែនចាញ់រុស្ស៊ី នៅក្នុងសង្រ្គាម នោះ គ្មានប្រទេសអឺរ៉ុបណាមួយដែលមានសុវត្ថិភាពនោះទេ។
ចុះផ្សាយនៅថ្ងៃ៖
ស្តាប់ - ០៣:២៩
មានព្រំដែនជាប់អ៊ុយក្រែនដែលកំពុងរងគ្រោះដោយសារការការវាយប្រហារគ្រាប់មីស៊ីលរបស់រុស្ស៊ីសឹងជារៀងរាល់ថ្ងៃ ប៉ូឡូញឃើញភ្លើងសង្រ្គាមឆាបឆេះ នៅមុខរបងទ្វារផ្ទះរបស់ខ្លួន។ នៅថ្ងៃអាទិត្យកន្លងទៅ ប៉ូឡូញទើបដំឡើងកំរិតត្រៀមអាសន្នបន្ថែមទៀត នៅតាមព្រំដែនជាប់អ៊ុយក្រែន បន្ទាប់ពីរុស្ស៊ីបាញ់ស្រោចមីស៊ីលសំដៅទីក្រុងកៀវ និងទីក្រុងលីវ ជាប់ព្រំដែនប៉ូឡូញ។ ប្រព័ន្ធការពារអាកាសរបស់ប៉ូឡូញត្រូវបានដាក់ឲ្យដំណើរការភ្លាមៗ បន្ទាប់ពីមីស៊ីលបណ្តែតរបស់រុស្ស៊ី ដែលសំដៅវាយប្រហារទីក្រុងអ៊ុយក្រែន បានហោះចូលក្នុងដែនអាកាសប៉ូឡូញរយៈពេល៣៩វិនាទី
ឈរនៅជួរមុខគេ ប្រឈមនឹងការហោះរំលោភចូលមីស៊ីលរុស្ស៊ី ក្នុងដែនអាកាសរបស់ខ្លួនជាញឹកញាប់ ប៉ូឡូញគ្មានជម្រើសអ្វីក្រៅតែពីពង្រឹងប្រព័ន្ធការពារជាតិ និងប្រឹងប្រែងបញ្ចុះបញ្ចូលឲ្យគេជួយអ៊ុយក្រែន។ នៅក្នុងបទសម្ភាសន៍ជាមួយសម្ព័ន្ធអ្នកកាសែតអឺរ៉ុប Lena (Leading European Newspaper Alliance) កាលពីថ្ងៃសុក្រ ទី ២៩មីនា នាយករដ្ឋមន្រ្តីប៉ូឡូញ លោកDonald Tusk បានអំពាវនាវសាជាថ្មីឲ្យគេប្រឹងជួយអ៊ុយក្រែន ព្រោះថា បើសិនអ៊ុយក្រែនចាញ់រុស្ស៊ី នៅក្នុងសង្រ្គាមលើកនេះ គ្មានអ្នកណាម្នាក់នៅអឺរ៉ុបដែលមានសុវត្ថិភាពនោះទេ។
ធ្លាប់ជាអតីតប្រធានក្រុមប្រឹក្សាអឺរ៉ុប លោកនាយករដ្ឋមន្រ្តីប៉ូឡូញជាថ្នាក់ដឹកនាំប៉ូឡូញម្នាក់ដែលឈ្មុសឈ្មុលខ្លាំង ក្នុងរឿងជំរុញឲ្យអឺរ៉ុបពង្រឹងវិស័យកងទ័ព នៅចំពោះមុខការគំរាមកំហែងរបស់រុស្ស៊ី។ បើតាមនាយករដ្ឋមន្រ្តីប៉ូឡូញ លោកមិនចង់និយាយបំភ័យឲ្យគេខ្លាចនោះទេ ប៉ុន្តែ សម្រាប់លោក សង្រ្គាមនៅទឹកដីអឺរ៉ុប លែងជាកុងសិបអតីតកាលទៀតហើយ។ វាជារឿងពិត ដែលកំពុងកើតឡើង នៅជាង២ឆ្នាំមកនេះ ចាប់តាំងពីរុស្ស៊ីធ្វើសង្រ្គាមចូលឈ្លានពានអ៊ុយក្រែន។ អ្វីដែលគេព្រួយបារម្ភជាងគេនៅពេលនេះ នៅត្រង់ថា គ្រប់សេណារីយ៉ូអាចកើតឡើង។ អឺរ៉ុបមិនដែលជួបស្ថានភាពបែបនេះ ទេ គិតចាប់តាំងពីចប់សង្រ្គាមលោកលើកទី២។ សម្រាប់នាយករដ្ឋមន្រ្តីប៉ូឡូញ លោកមិនចង់និយាយបំភ័យឲ្យគេខ្លាចនោះទេ។ ពាក្យសង្រ្គាមនេះ ស្តាប់ទៅ ធ្វើឲ្យគេខ្លោចផ្សាខ្លាំងណាស់ ជាពិសេសសម្រាប់យុវជនជំនាន់ក្រោយ។ ប៉ុន្តែ បើតាមយោបល់របស់លោក គេត្រូវផ្សាំ រស់នៅជាមួយគំនិតដែលថា អឺរ៉ុបពេលនេះ កំពុងដើរចូលក្នុងសម័យមួយថ្មី គឺសម័យមុនសង្រ្គាម។
ចាប់តាំងពីឈ្នះឆ្នោត ចូលកាន់តំណែងជានាយករដ្ឋមន្រ្តីប៉ូឡូញ សាជាថ្មី នៅចុងឆ្នាំ ២០២៣ លោកDonald Tusk រមែងរំលឹកឲ្យថ្នាក់ដឹកនាំអឺរ៉ុបជំរុញវិស័យការពារជាតិ តាមរយៈការបង្កើនថវិកាកងទ័ព ដើម្បីជំរុញឧស្សាហកម្មយោធាអឺរ៉ុប និងការពង្រឹងកម្លាំងទ័ព។ បើតាមនាយករដ្ឋមន្រ្តីប៉ូឡូញ អឺរ៉ុបមិនចាំបាច់បង្កើតកម្លាំងយោធាថ្មីដូចកងទ័ពរបស់បក្សសម្ព័ន្ធអូតង់។ ប៉ុន្តែ បើសិនអឺរ៉ុបចង់ក្លាយជាដៃគូគួរឲ្យទាក់ទាញរបស់អាមេរិក អឺរ៉ុបគួរតែមានសមត្ថភាពយោធា សព្វាវុធគ្រប់គ្រាន់ ដោយមិនចាំបាច់ត្រូវការពឹងលើអាមេរិក ឬត្រូវបារម្ភខ្លាចពីការផ្លាស់ប្តូរថ្នាក់ដឹកនាំអាមេរិក។
ប៉ូឡូញ និងប្រទេសនៅអឺរ៉ុបដូចជាអាល្លឺម៉ង់ចាប់ផ្តើមភ្ញាក់រលឹកជំរុញឧស្សាហកម្មយោធា និងពង្រឹងកងទ័ពរបស់ខ្លួនឡើងវិញ ដោយសារសង្រ្គាមរុស្ស៊ីឈ្លានពានអ៊ុយក្រែន និងដោយសារតែម្យ៉ាង គេព្រួយបារម្ភខ្លាចថា បើសិនលោកដូណាល់ ត្រាំ ឈ្នះឆ្នោតកា្លយជាប្រធានាធិបតីអាមេរិកសាជាថ្មី នោះលោកនឹងគំរាម មិនការពារអឺរ៉ុប បើសិនអឺរ៉ុបមិនព្រមធ្វើតាមអាមេរិក ដែលទាមទារឲ្យគេបង់វិភាគទានយ៉ាងហោច ២%នៃផលិតផលក្នុងសរុបរបស់ខ្លួនចូលទៅក្នុងកេស របស់អូតង់ បើសិនចង់បានការការពារពីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ