បារាំងប្រកាសផ្តល់រថពាសដែករាប់រយគ្រឿង និងប្រព័ន្ធខែលមីស៊ីលបន្ថែមទៀតទៅឲ្យអ៊ុយក្រែន
នៅចំពោះមុខការទទូចទាមទាររបស់អ៊ុយក្រែន ដែលកាន់តែខើចអាវុធដើម្បីធ្វើសង្រ្គាមប្រឆាំងរុស្ស៊ី បារាំង តាមរយៈរដ្ឋមន្រ្តីការពារជាតិបានប្រកាសថា នឹងបញ្ជូនរថពាសដែកជាច្រើនរយគ្រឿងទៅឲ្យអ៊ុយក្រែន។ នៅក្នុងបទសម្ភាសន៍ជាមួយកាសែតក្នុងស្រុកបារាំង La Tribune ឡាទ្រីប៊ុន ចុះផ្សាយនៅថ្ងៃអាទិត្យ ទី ៣១មីនា ប្រមុខការពារជាតិបារាំង បញ្ជាក់ដែរថា រដ្ឋាភិបាលនឹងចាប់តម្រូវឲ្យរោងចក្រឧស្សាហកម្មបារាំងផ្តោតអាទិភាពលើការផលិតសព្វាវុធ ដើម្បីធានាជួយអ៊ុយក្រែនផង និងដើម្បីស្តុកទុកការពារប្រទេសផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៩
នៅក្នុងក្របខ័ណ្ឌផ្តល់ជំនួយយោធាដើម្បីជួយឲ្យអ៊ុយក្រែនប្រឈមតទល់នឹងសង្រ្គាមឈ្លានពានរបស់រុស្ស៊ី រដ្ឋាភិបាលបារាំងប្រកាសបញ្ជូនរថពាសដែករាប់រយគ្រឿងទៅឲ្យអ៊ុយក្រែន។ បើតាមការអះអាងរបស់រដ្ឋមន្រ្តីការពារជាតិបារាំង លោកSébatien Lecornu នៅចុងឆ្នាំនេះ និងដើមឆ្នាំ ២០២៥ បារាំងនឹងបញ្ជូនរថពាសដែកចាស់ៗ ប្រភេទ VAB ទៅឲ្យអ៊ុយក្រែន។ កងទ័ពបារាំងលែងប្រើរថពាសដែកប្រភេទVABទៀតហើយ ដោយជំនួសមកវិញនូវរថពាសដែក Griffon ដែលបារាំងទើបផលិតថ្មី។
សម្រាប់ប្រមុខការពារជាតិបារាំង រថពាសដែកបារាំងចាស់មែន (ព្រោះវាមានអាយុជាង៤០ឆ្នាំ) ប៉ុន្តែវានៅតែដំណើរការល្អ។ ដើម្បីតទល់នឹងកងទ័ពរុស្ស៊ី នៅក្នុងសមរភូមិដ៏ធំធេង បរិមាណរថពាសដែកបារាំងជាច្រើនរយគ្រឿងនឹងផ្តល់ប្រយោជន៍ ជួយដឹកកងទ័ពអ៊ុយក្រែននៅក្នុងផ្លាស់ទីក្នុងសមរភូមិ។
ក្រៅពីសន្យាផ្តល់រថពាសដែក រដ្ឋមន្រ្តីការពារជាតិបារាំងបន្ថែមថា បារាំងនឹងផ្តល់ប្រព័ន្ធខែមីស៊ីលបន្ថែមទៀត ដើម្បីជួយអ៊ុយក្រែនឲ្យការពារខ្លួនពីការវាយប្រហារមីស៊ីលរបស់រុស្ស៊ី។ ប្រព័ន្ធខែលមីស៊ីលបារាំងAster30 មានសមត្ថភាពដូចខែលមីស៊ីលអាមេរិក ឈ្មោះPatriot។
ដោយប្រកាសផ្តល់មីស៊ីលទៅឲ្យអ៊ុយក្រែនទុកការពារដែនអាកាស រដ្ឋមន្រ្តីការពារជាតិបារាំងបញ្ជាក់ផងដែរថា លោកបានបញ្ជាឲ្យអគ្គនាយកដ្ឋានសព្វាវុធបារាំងធ្វើសំណើដើម្បីបង្កើនការផលិតមីស៊ីល Aster បន្ថែមទៀត។ បើតាមប្រមុខការពារជាតិបារាំង អគ្គនាយកដ្ឋានសព្វាវុធបារាំងនឹងចុះធ្វើការជាមួយក្រុមហ៊ុនMBDA ដែលជាក្រុមហ៊ុនផលិតមីស៊ីលធំជាងគេនៅអឺរ៉ុប ដើម្បីធានាថា គេមានស្តុកវត្ថុធាតុដើមគ្រប់គ្រាន់ដើម្បីផលិតប្រព័ន្ធខែលមីស៊ីលAster។ សម្រាប់រដ្ឋមន្រ្តីបារាំង ក្រៅពីផ្តល់មីស៊ីលទៅឲ្យអ៊ុយក្រែន បារាំងត្រូវការបង្កើនការផលិតមីស៊ីល និងគ្រាប់ផ្សេងទៀតសម្រាប់ស្តុកទុកការពារខ្លួន និងប្រើប្រាស់នៅក្នុងប្រតិបត្តិការនៅបរទេសដូចជានៅសមុទ្រក្រហមដើម្បីប្រឆាំងនឹងពួកឧទ្ទាមហ៊ូទីជាដើម។
នៅចំពោះមុខសង្រ្គាមរុស្ស៊ីឈ្លានពានអ៊ុយក្រែន បារាំងក៏ដូចជាប្រទេសអឺរ៉ុបធំៗមួយចំនួន ដូចជាអាល្លឺម៉ង់ អ៊ីតាលីជាដើមបានប្រកាសអនុវត្តសេដ្ឋកិច្ចសង្រ្គាម ដូចរុស្ស៊ី ដោយបែរងាកទៅជំរុញឧស្សាហកម្មយោធា។ បើតាមការអះអាងរបស់រដ្ឋមន្រ្តីការពារជាតិបារាំង រដ្ឋាភិបាលបានចេញក្រឹត្យមួយកាលពីថ្ងៃសុក្រ ដើម្បីផ្តល់សិទ្ធិអំណាចដល់ប៉ូលិសរបស់ក្រសួងការពារជាតិ នៅក្នុងការចាប់តម្រូវឲ្យក្រុមហ៊ុនបារាំងផ្តោតអាទិភាពលើកិច្ចសន្យា និងការស្តុកទាំងឡាយណាដែលទាក់ទងនឹងយោធា។ រដ្ឋមន្រ្តីបារាំងនៅបាននិយាយពីលទ្ធភាពចាប់រឹបអូសយករោងចក្រឧស្សាហកម្មមួយចំនួនសម្រាប់ដំណើការផលិតសព្វាវុធ។ ការជំរុញការផលិតសព្វាវុធ មិនត្រឹមជួយឲ្យបារាំងអាចជួយអ៊ុយក្រែនធ្វើសង្រ្គាមតទល់នឹងរុស្ស៊ី ប៉ុន្តែ នឹងទៅបង្កើនស្តុកអាវុធរបស់បារាំង សម្រាប់ការពារខ្លួនផង និងសម្រាប់នាំចេញទៅលក់នៅបរទេសផង។ នៅត្រង់ចំណុចនេះ រដ្ឋមន្រ្តីការពារជាតិកត់សំគាល់ឃើញការធ្លាក់ថយចុះនៃកិច្ចសន្យាទិញអាវុធបារាំង នៅក្នុងចំណោមប្រទេសអឺរ៉ុបខាងកើត។ សម្រាប់លោក ដើម្បីលក់នាំចេញអាវុធ គេមិនត្រឹមពូកែខាងបច្ចេកវិទ្យា បញ្ចុះតម្លៃថោក និងភាពប៉ិនប្រសប់ផ្នែកការទូតតែប៉ុណ្ណោះទេ ប៉ុន្តែ គេត្រូវពូកែផលិតឲ្យបានលឿន ដើម្បីបញ្ជូនទៅដល់ដៃអតិថិជនឲ្យឆាប់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ