សង្គ្រាមអ៊ុយក្រែន ៖ បារាំងនិងរុស្ស៊ី ផ្តើមកិច្ចសន្ទនាគ្នាឡើងវិញ ក្រោយអាក់ខានជាង ១ ឆ្នាំ
រដ្ឋមន្ត្រីការពារជាតិបារាំង និង រុស្ស៊ី បានជជែកគ្នាតាមទូរសព្ទដ៏កម្រ ជាលើកទី១ គិតចាប់តាំងពីតែតុលា ឆ្នាំ ២០២២ មក។ ក្នុងកិច្ចសន្ទនាគ្នា ប្រមាណ១ម៉ោង រដ្ឋមន្ត្រីការពារជាតិទាំង២ប្រទេស បង្ហាញភាពផ្ទុយខ្វែងគំនិតគ្នាជាច្រើនជុំវិញបញ្ហាសង្គ្រាមនៅអ៊ុយក្រែន និង អំពើភេរវកម្មនៅជាយក្រុងម៉ូស្គូ។
ចុះផ្សាយនៅថ្ងៃ៖
ស្តាប់ - ០២:៤០
មានចំណុចខ្វែងគ្នាច្រើន នៅក្នុងកិច្ចសន្ទនា ថ្ងៃពុធ ទី៣មេសា រវាង រដ្ឋមន្ត្រីការពារជាតិបារាំង និងរុស្ស៊ី ពិសេសជុំវិញបញ្ហាសង្គ្រាមនៅអ៊ុយក្រែន និង អំពើភេរវកម្មនៅសាលតន្ត្រីជាយក្រុងម៉ូស្គូ។ ប្រភពពីមន្ត្រីអមជុំវិញរបស់រដ្ឋមន្ត្រីការពារជាតិបារាំង បានអះអាងថា រុស្ស៊ីត្រៀមខ្លួនចរចាឡើងវិញពីបញ្ហាអ៊ុយក្រែន។ ក្នុងសេចក្តីថ្លែងការណ៍ពីម៉ូស្គូ នាល្ងាចថ្ងៃពុធ លោក ស៊ែរហ្កី ឆយហ្គូ រដ្ឋមន្ត្រីការពារជាតិរុស្ស៊ី ថា សមភាគីទាំង២ បានជជែកគ្នាពីជម្លោះអ៊ុយក្រែន ហើយឈានទៅស្នើ«គំនិតផ្តួចផ្តើមក្រុងអ៊ីស្តង់ប៊ូលដើម្បីសន្តិភាព»ដែលអាចនឹងរៀបចំជជែកគ្នានៅប្រទេសស្វីល។ លោក ស៊ែរហ្កី ឆយហ្គូ ថែមទាំងព្រលយសម្តីថា «វាអត់ប្រយោជន៍ទេ បើគ្មានវត្តមានរុស្ស៊ីចូលរួមនោះ»។ ក៏ប៉ុន្តែផ្ទុយទៅវិញ សេចក្តីប្រកាសពីភាគីបារាំងឲ្យដឹងថា រដ្ឋមន្ត្រីការពារជាតិ លោក សេបាស្យាង ឡឺក័រនុយ មិនបានទទួលសំណើ ហើយក៏មិនបានស្នើអ្វីទៅរុស្ស៊ីក្នុងរឿងនេះដែរ។ មិនតែប៉ុណ្ណោះ លោក សេបាស្យាង ឡឺក័រនុយ ថែមទាំងបានថ្កោលទោសរុស្ស៊ីដោយឥតលាក់លៀមចំពោះសង្គ្រាមឈ្លានពានរុស្ស៊ីនៅអ៊ុយក្រែន។
ទោះយ៉ាងនេះក្តី ភាគីបារាំង បង្ហាញពីលទ្ធភាពសហការជាមួយរុស្ស៊ីដែរ នៅក្នុងការប្រយុទ្ធប្រឆាំងនឹងអំពើភេរវកម្ម។ បារាំងសូមបង្ហាញស្មារតីសាមគ្គីភាពជាមួយគ្រួសារជនរងគ្រោះព្រោះតែអំពើភេរវកម្មនៅម៉ូស្គូ ថ្ងៃទី២២មីនា ស្លាប់មនុស្ស ១៤៤ នាក់។ ក្នុងកិច្ចសន្ទនាតាមទូរសព្ទប្រហែល១ម៉ោង រដ្ឋមន្ត្រីបារាំង ក៏រំឭកសមភាគីរុស្ស៊ី ថាកុំឲ្យភ្ជាប់ អ៊ុយក្រែន ទៅអំពើភេវរកម្មនៅម៉ូស្គូ។ ជាថ្មីម្តងទៀត លោក សេបាស្យាង ឡឺក័រនុយ បានបញ្ជាក់ទៅលោក ស៊ែរហ្កី ឆយហ្គូ ថាបារាំងគ្មានភស្តុតាង គ្មានតម្រុយព័ត៌មានណាមួយ ដែលអាចភ្ជាប់អំពើភេវរកម្មនៅម៉ូស្គូទៅនឹងអ៊ុយក្រែនបានទេ។ ហេតុដូច្នេះ បារាំងសូមឲ្យរុស្ស៊ី ឲ្យឈប់ចោទប្រកាន់អ៊ុយក្រែនថានៅពីក្រោយភេវរកម្មនោះទៀតទៅ។
រដ្ឋមន្ត្រីការពារជាតិរុស្ស៊ី លោក ស៊ែរហ្កី ឆយហ្គូ បានឆ្លើយទៅវិញថា «រដ្ឋអំណាចក្រុងកៀវ មិនអាចនឹងធ្វើអ្វីបានសោះឡើយ ប្រសិនបើគ្មានក្រុមបស្ចិមប្រទេស នៅក្រោយខ្នង។ ក្នុងករណីនេះ រុស្ស៊ីសង្ឃឹមថា ក្រុមចារកម្មស៊ើបការសម្ងាត់របស់បារាំង មិននៅពីក្រោយរឿងនេះចុះ»។ ឃ្លាសម្តីរបស់រដ្ឋមន្ត្រីការពារជាតិរុស្ស៊ីបែបនេះ បានបង្កប្រតិកម្មមិនសប្បាយចិត្តចំពោះមជ្ឈដ្ឋានការទូតបារាំង។ នៅថ្ងៃទី៤មេសា លោក អេម៉ានុយអែល ម៉ាក្រុង បានឆ្លើយប្រតិកម្មប្រាប់អ្នកកាសែតនៅប៉ារីស ថា«ជារឿងគួរឲ្យអស់សំណើចណាស់ ដែលរុស្ស៊ីចោទបារាំងថានៅពីក្រោយអំពើភេរវកម្មនៅម៉ូស្គូនោះ។ គ្មានអ្វីទាក់ទងគ្នាទាល់តែសោះ»។ ទន្ទឹមនឹងគ្នានោះ ប្រធានាធិបតីបារាំង ពន្យល់ទៀតថា លោកបានបញ្ជាឲ្យស្ថាប័នពាក់ព័ន្ធឲ្យទាក់ទងទៅសមភាគី ដើម្បីផ្តល់ដំណឹងមានប្រយោជន៍ដល់ការដឹងឫសគល់និងក្រុមអ្នកបង្កភេរវកម្ម។
យ៉ាងណាក៏ដោយចុះ រដ្ឋមន្ត្រីការពារជាតិរុស្ស៊ី រំឭកពីប្រសាសន៍ប្រមុខរដ្ឋបារាំង កាលពីប៉ុន្មានសប្តាហ៍មុន ដែលលោក ម៉ាក្រុង ប្រកាសចេតនាចង់បញ្ចូនទ័ពបារាំងទៅជួយអ៊ុយក្រែននៅសមរភូមិ។ លោក ស៊ែរហ្កី ឆយហ្គូ បានព្រមានជាថ្មីថា ប្រសិនបើ បារាំងធ្វើបែបនេះ បារាំងនឹងបង្កើតបញ្ហាដល់ខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ