អូតង់បានសម្ពោធនៅរូម៉ានី គឺគ្រឿងផ្សំទី២នៃខែលមីស៊ីលប្រឆាំងមីស៊ីលនៅអឺរ៉ុប
ម្សិលមិញ ថ្ងៃ១២ឧសភា អូតង់បានដាក់ឲ្យត្រៀមប្រតិបត្តិការជាផ្លូវការ គឺ ប្រព័ន្ធ “ខែលមីស៊ីលប្រឆាំងមីស៊ីល” ដែលប្រចាំការ នៅលើដែនដីប៉ែកខាងត្បូងរូម៉ានី ជាប្រទេស សមាជិកបក្សសម្ព័ននេះ ហេតុ ដែលញ៉ាំងឲ្យមានប្រតិកម្មក្តៅក្រហាយតែម្តង ពីខាងក្រុងម៉ូស្គូ ដែលចាត់ទុកប្រព័ន្ធនេះថា ជាការគំរាមត្រង់ៗ ដល់សន្តិសុខរុស្ស៊ី ព្រមទាំង ជា ហានិភ័យ បន្សោយ សក្តានុពលកាំជ្រួចនុយក្លេអ៊ែររបស់រុស្ស៊ីទៅផង ទោះបី ថ្នាក់ដឹកនាំអូតង់ ខំអះអាងថា វា ឥតបង្កជាគ្រោះថ្នាក់អ្វីទេ ដល់សន្តិសុខរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
គ្រឿងផ្សំទី២នេះ នៃប្រព័ន្ធខែលមីស្ស៊ីប្រឆាំងមីស៊ីល របស់អូតង់ ត្រូវបានស.រ.អា. និង រូម៉ានី ដាក់ឲ្យដំណើរការជាផ្លូវការម្សិលមិញ គឺនៅលើដែនដីនៃអតីតមូលដ្ឋានកងអាកាស ឈ្មោះ Deveselu សង់ឡើងដោយសហភាពសូវៀត តាំងពីក្នុងឆ្នាំ ១៩៥២។ គឺកាលពីខែតុលាឆ្នាំ២០១៣ ដែលស.រ.អា. បានចាប់ផ្តើមសង់ឡើងនៅទីនោះ ភាគទី២ នៃ គម្រោងខែលមីស៊ីលនោះ ដែលត្រូវបានបំផុសមកក្នុងឆ្នាំ២០១០។ ដើរតួជា បេះដូងមណ្ឌល ដែលបានតម្រូវ ឲ្យចំណាយអស់ ៨០០លានដុល្លារ គឺអាគារបេតុងកំពស់២០ម៉ែត្រ រំលេចចេញពី ដំបូលវា ទៅដោយបង្គោលអង់តែនច្រើនឥតគណនា ហើយលំអដោយ ទង់ជាតិអាមេរិកាំង។
ប្រចាំការនៅមណ្ឌលនេះ គឺ កាំជ្រួចមីស៊ីលធុន MS-2 សម្រាប់ស្កាត់ចាប់មីស្សីលខ្មាំង។ គ្រឿង ផ្សំ នៅមូលដ្ឋានរូម៉ានី ជាគ្រឿងផ្សំទី២ នៃខែលមីស្សីលប្រឆាំងមីស៊ីលរបស់អូតង់នៅអឺរ៉ុប។ គ្រឿងផ្សំទី១ គឺ ស្ថានីយរ៉ាដារ ដែលស្ថិតនៅតួកគី និង នាវា៤គ្រឿងប្រចាំការនៅតាមឆ្នេរ អេស្ប៉ាញ បំពាក់ទៅដោយកាំជ្រួច Aegis ខាងការពារប្រឆាំងមីស៊ីល។ ហើយគ្រឿងផ្សំទី៣ នៃ ប្រព័ន្ធខែលមីស៊ីលប្រឆាំងមីស៊ីលនោះ ត្រូវចាប់ផ្តើមសង់នៅប៉ូឡូញ នៅថ្ងៃសុក្រនេះតែម្តង ដើម្បីសម្ពោធវា នៅដំណាច់ឆ្នាំ២០១៨។
ដើម្បីឲ្យរុស្ស៊ីស្ងប់ចិត្ត ថា ប្រព័ន្ធខែលនេះ ឥតតម្រង់ប្រឆាំងរុស្ស៊ីទេ លោក អគ្គលេខាធិការអូតង់ Stoltenberg បានថ្លែងថា កាំជ្រួចខាងស្កាត់ចាប់ នៅមូលដ្ឋានរូម៉ានី គឺទុកសម្រាប់ផ្ចាញ់ មីស៊ីល ណា ដែលអាចបាញ់បង្ហោះចេញជាយថាហេតុ ពី តំបន់មជ្ឈិមបូព៌ា មានពីអ៊ីរ៉ង់ជាដើម។ មិនតែ ប៉ុណ្ណោះ វាមានចំនួនតិចតួចសោះ ហើយ វាស្ថិតនៅខាងត្បូងជ្រុល និងនៅជិតពេក នឹងប្រទេស រុស្ស៊ី ម្ល៉ោះហើយ បានជាវា មិនអាចស្កាត់ចាប់ឡើយ កាំជ្រួចមីស៊ីលអន្តរទ្វីបរបស់រុស្ស៊ីដែលទុក វាយប្រហារ ទៅចម្ងាយឆ្ងាយៗ ដល់ជាង១ម៉ឺនគ.ម.ឯណោះ។
ប៉ុន្តែម៉ូស្គូមិនជឿសោះឡើយសម្តីពោលអាង របស់មេដឹកនាំអូតង់។ យ៉ាងណាមិញ អ្នកនាំពាក្យ វិមានក្រេមឡាង លោក ពេស្កូវ ថ្លែងជាអាទិ៍ថា យើងតែងនិយាយច្រើនដងមកហើយថា តាម ជំនឿជឿជាក់របស់យើង ការដំឡើងប្រព័ន្ធខែលមីស៊ីលប្រឆាំងមីស៊ីល របស់អូតង់ នៅអឺរ៉ុប តាមធាតុពិតដែលមាន គឺ សំដៅបន្សោយ សក្តានុពលបរមាណូរបស់រុស្ស៊ី ហើយជាការគំរាមត្រង់ៗ ដល់សន្តិសុខរុស្ស៊ី។ ក្រសួងការបរទេសរុស្ស៊ី ពីចំណែកខ្លួន ចាត់ទុកខែលអូតង់នេះថា ជាកត្តាដែលនាំឲ្យរង្គោះរង្គើ ដល់ ស្ថិរភាពនៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ