អូតង់នឹងពង្រីកវត្តមានយោធាខ្លួននៅសមុទ្រខ្មៅដើម្បីទប់នឹងរុស្ស៊ី
ថ្នាក់ដឹកនាំបក្សសម្ព័ន្ធអូតង់ ក្នុងពេលឆាប់ៗខាងមុខ គ្រោងបង្កើនកងនាវាចម្បាំងប្រចាំនៅសមុទ្រខ្មៅដើម្បីបំផ្លាញផែនការរបស់រុស្ស៊ីកុំឲ្យ “ អាងយ៉ាង” នៅទីនោះ - សេចក្តីថ្លែង ការណ៍នេះ ត្រូវបានធ្វើឡើង នៅក្រុង Sofia រដ្ឋធានីប៊ុលហ្ការីដោយលោក Alexander Vershbow កាលមុនជា អគ្គរដ្ឋទូតអាមេរិកប្រចាំនៅរុស្ស៊ីហើយបច្ចុប្បន្នជាអគ្គលេខាធិការរងរបស់អូតង់។ តាមសម្តីគាត់ ឥឡូវកំពុងប្រព្រឹត្តទៅកិច្ចចរចាសមស្របជាមួយបណ្តាប្រទេសសមាជិកបក្សសម្ព័ន្ធបែបយ៉ាង ប៊ុលហ្ការី រូម៉ានី តួកគី ដែលសុទ្ធតែស្ថិតនៅតាមឆ្នេរសមុទ្រនេះ។
ចុះផ្សាយនៅថ្ងៃ៖
ស្តាប់ - ០២:១៦
សេចក្តីថ្លែងការណ៍នោះ ត្រូវបានលោក Alexander Vershbow ធ្វើក្នុងកិច្ចប្រជុំនៃ
“ ក្លឹបអាត្លង់ទិក ក្នុងក្របខ័ណ្ឌសន្និសីទខាងធានាសន្តិសុខនៅសមុទ្រខ្មៅ“ ។ គាត់ថា ការពិភាក្សាសែនមានតម្លៃកំពុងប្រព្រឹត្តទៅ ជាមួយបណ្តាប្រទេសសម្ព័ន្ធមិត្ត ដែលរស់នៅតាមមាត់សមុទ្រខ្មៅ ជុំវិញការធ្វើ សមាហរ័ណកម្ម កងម៉ារីនយោធារបស់គេនៅសមុទ្រនេះ។ គាត់បន្ថែមថា អូតង់អាច “ពង្រីកវត្តមាន” ខ្លួននៅសមុទ្រខ្មៅគឺទៅទល់ខែកក្កដាខាងមុខទៅហើយ ពេលដែលពួកអ្នកដឹកនាំបស្ចិមលោក នឹងរួមប្រជុំក្នុងជំនួបកំពូល។
លោកអគ្គលេខារងអូតង់ ពន្យល់បំភ្លឺថា ៖ យុទ្ធសាស្ត្ររុស្ស៊ីនៅសមុទ្រខ្មៅ គឺជាភាគមួយនៃ ការខំប្រឹងប្រែងជាសកល ដើម្បី”ចាក់ឫសខ្លួនឲ្យជាប់ម៉ឺង”នៅទីនោះ -ការខំប្រឹងប្រែងដែលឥឡូវ លាតសន្ធឹងពីសមុទ្រទឹកកកនៅឧត្តរ រហូតដល់ប្រទេសស៊ីរីនៅខាងត្បូង ហើយដែលបង្កើតជាគ្រោះថ្នាក់ដល់ ឯកភាពអូតង់ព្រមទាំង ដល់បូរណភាពដែនដីរបស់បក្សសម្ព័ន្ធនេះ។
លោក Vershbow កត់សម្គាល់ថា អូតង់មិនអាចបណ្តោយឲ្យរុស្ស៊ីធ្វើព្រងើយកន្តើយ ចំពោះគោលការណ៍ផងទាំងឡាយដែលជាមូលដ្ឋានទ្រប្រព័ន្ធសន្តិសុខទ្វីបអឺរ៉ុប។ បើអូតង់បណ្តោយ គឺមានន័យថា ក្បត់នឹងតម្លៃរបស់ខ្លួនហើយរឹតតែលើកទឹកចិត្តរុស្ស៊ីឲ្យប្រថុយប្រព្រឹត្តអំពើឈ្លានពានតទៅទៀត។
មុនពេលនេះ លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានប្រកាសថា ប្រទេសគាត់ ត្រៀមភ្ជាប់ខ្លួន ទៅនឹងការបង្កើតឡើងជាកងនាវាប្រចាំនៅសមុទ្រខ្មៅ ដែលស្ថិតនៅក្រោម ការដឹកនាំរបស់អូតង់ផ្ទាល់។ សេចក្តីថ្លែងការណ៍នេះ ត្រូវប្រមុខរដ្ឋអ៊ុយក្រែនធ្វើពេលបំពេញ ទស្សនកិច្ចនៅរូម៉ានី -ប្រទេសដែលបានបំផុសមកជា គំនិតផ្តួចផ្តើមឲ្យបង្កើតកងនាវាបែបនេះ។
គឺក្នុងជំនួបកំពូលអូតង់ នៅខែកក្កដាខាងមុខ ដែលរូម៉ានីនឹងលាតត្រដាងសំនើខ្លួន ដែលប្រមើលថា អនាគតកងនាវានោះនឹងផ្សំឡើងពី កប៉ាល់ចម្បាំង របស់ រូម៉ានី ប៊ុលហ្ការី តួកគី ហើយក៏អាចរួមក្តោបទាំង នាវាចម្បាំងរបស់ ស.រ.អា. អាល្លឺម៉ង់ អ៊ីតាលី។ អាចសហការជាមួយ កងនាវាថ្មីនេះ ក៏ទាំងកងម៉ារីន របស់ អ៊ុយក្រែន និង ហ្ស័កហ្ស៊ី។
បច្ចុប្បន្ន នាវាចម្បាំងពួកប្រទេសអូតង់ វត្តមានលើផ្ទៃទឹកសមុទ្រខ្មៅគឺតែនៅពេលធ្វើសមយុទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ