ស្លាប់ម្នាក់ របួស៧៧នាក់ ក្នុងមន្ទីរឃុំឃាំងជនភៀសខ្លួនអូស្ត្រាលី នៅប៉ាពូអាស៊ីនូវេលហ្គីណេ
នៅថ្ងៃចន្ទម្សិលមិញ អំពើហិង្សាថ្ងៃទី២ នៅមន្ទីរឃុំឃាំងជនភៀសខ្លួនអូស្ត្រាលី ក្នុងប្រទេសប៉ាពូអាស៊ីនូវេលហ្គីណេ បានបណ្តាលអោយជនភៀសខ្លួនម្នាក់ស្លាប់ និង៧៧នាក់ទៀតរងរបួស ក្នុងនោះ១៣នាក់ ស្ថិតក្នុងស្ថានភាពធ្ងន់ធ្ងរ។ រដ្ឋមន្ត្រីអន្តោប្រវេសន៍អូស្ត្រាលីបានសន្យាថា នឹងបើកការស៊ើបអង្កេតលើហេតុការណ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
គួររំលឹកថា ជាគោលការណ៍ រដ្ឋាភិបាលអូស្ត្រាលីបញ្ជូនរាល់ជនភៀសខ្លួនដែលចូលមកក្នុងទឹកដីអូស្ត្រាលី ដោយខុសច្បាប់ ទៅមន្ទីរឃុំឃាំង នៅប៉ាស៊ីហ្វិក ដើម្បីអោយជនភៀសខ្លួនតាមកប៉ាល់ដ៏ទ្រុឌទ្រោមនានា បាក់ទឹកចិត្ត លែងប្រថុយប្រថានអាយុជីវិត ចូលមកអូស្ត្រាលីទៀត។ ក្នុងពេលរង់ចាំអោយអាជ្ញាធរអូស្ត្រាលីពិនិត្យពាក្យសុំសិទ្ធីជ្រកកោននៅអូស្ត្រាលី ជនបរទេសត្រូវរស់នៅមន្ទីរឃុំឃាំង រាប់ខែឯណោះ។
មុននឹងរីករាលដាលរហូតមានមនុស្សស្លាប់ នៅថ្ងៃចន្ទម្សិលមិញ ហេតុការណ៍វឹកវរនៅមន្ទីរឃុំឃាំងជនភៀសខ្លួនរបស់អូស្ត្រាលី ក្នុងទឹកដីប៉ាពូអាស៊ីនូវេលហ្គីណេ បានកើតឡើងតាំងតែពីថ្ងៃអាទិត្យម្ល៉េះ។ មន្ទីរឃុំឃាំងជនភៀសខ្លួនដែលរងហេតុការណ៍នោះ ស្ថិតនៅកោះម៉ានូស។ នៅទីនោះ មនុស្ស៣៥នាក់បាននាំគ្នារត់គេចចេញពីមន្ទីរឃុំឃាំង។ ក្នុងការរត់គេចនេះ ជនភៀសខ្លួនច្រើននាក់បានរងរបួស។
យោងតាមលោក អ៊ីយ៉ាន រិនទូល មកពីក្រុមការពារសិទ្ធិជនភៀសខ្លួន ហេតុការណ៍ទាំងនេះកើតឡើង ដោយសារថា ប្រជាជនរស់នៅកោះម៉ានូស មិនបានពេញចិត្តនឹងវត្តមានជនភៀសខ្លួនទាំងនេះ ក្នុងស្រុកពួកគេនោះទេ។ មនុស្សប្រុសជាច្រើនជាអ្នករស់នៅកោះម៉ានូស ប្រដាប់ដោយផ្គាក់ ដំបង និងដុំថ្ម បានព្យាយាមចូលក្នុងមន្ទីរឃុំឃាំងជនភៀសខ្លួននោះ ធ្វើអោយជនភៀសខ្លួននាំគ្នារត់គេច ព្រោះខ្លាចស្លាប់។ លោករិនទូល ជាអ្នកការពារសិទ្ធិជនភៀសខ្លួន បន្ថែមទៀតថា ហេតុការណ៍នេះសបង្ហាញថា ជនភៀសខ្លួនគ្មានសុវត្ថិភាពសន្តិសុខនៅកោះម៉ានូស នោះទេ ដូច្នេះ ត្រូវតែបញ្ជូនពួកគេទៅអូស្ត្រាលី។
រដ្ឋាភិបាលអភិរក្សនិយមអូស្ត្រាលីមិនបានអត្ថាធិប្បាយអ្វី ក្រោយមានហេតុការណ៍នេះកើតឡើងទេ ប៉ុន្តែ រដ្ឋមន្ត្រីអន្តោប្រវេសន៍សន្យាថា នឹងស៊ើបអង្កេតរឿងនេះ។ ការពង្រឹងនយោបាយអន្តោប្រវេសន៍ធ្វើឡើងដោយរដ្ឋាភិបាលអាណត្តិថ្មីអូស្ត្រាលី នៅឆ្នាំ២០១៣ កន្លងទៅ ត្រូវបានឧត្តមស្នងការទទួលបន្ទុកជនភៀសខ្លួននៃអង្គការសហប្រជាជាតិ HCR រិះគន់យ៉ាងខ្លាំង។ យោងតាមអង្គការ HCR មន្ទីរឃុំឃាំងនៅកោះម៉ានូស និងណូរូ ជាកន្លែងផ្តល់ការលំបាកដល់ជនភៀសខ្លួនជាបុរស ស្ត្រី និងកុមារ ដែលរស់នៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ