សម្តេចប៉ាបធ្វើកំណែទម្រង់ប្រឆាំងនឹងអានាចារលើកុមារនិងឧក្រិដ្ឋកម្មហិរញ្ញវត្ថុ
នៅរសៀលថ្ងៃព្រហស្បតិ៍ទី ១១ កក្កដា ២០១៣ សម្តេចប៉ាប François បានប្រកាសធ្វើកំណែទម្រង់ច្បាប់ព្រហ្មទណ្ឌ ដែលសំដៅរឹតបន្តឹងទណ្ឌកម្មប្រឆាំងរាល់ទង្វើអានាចារលើកុមារ និងពង្រឹងទោសចំពោះករណីពុករលួយ ឬការលាងលុយកខ្វក់ ដែលបុរីវ៉ាទីកង់ទើបបានរងគ្រោះកាលពីថ្មីៗនេះ។
ចុះផ្សាយនៅថ្ងៃ៖
ស្តាប់ - ០១:៣៨
កំណែទម្រង់ច្បាប់ព្រហ្មទណ្ឌវ៉ាទីកង់ ដែលសម្តេចប៉ាបបានចុះហត្ថលេខា នឹងចូលជាធរមានចាប់ពីថ្ងៃទី១កញ្ញា ឆ្នាំ២០១៣តទៅ សម្រាប់គ្រប់សមាជិករបស់រដ្ឋាភិបាលកណ្តាលរបស់វ៉ាទីកង់ មន្ត្រីទូត បុគ្គលិករបស់អង្គការស្ថាប័នពាក់ព័ន្ធនឹងបុរីវ៉ាទីកង់ មិនថានៅក្នុងឬក្រៅដែនដីនេះទេ។
ច្បាប់ព្រហ្មទណ្ឌវ៉ាទីកង់ដែលមានចំណាស់តាំងពីឆ្នាំ១៩២៩ ឆ្នាំបង្កើតរដ្ឋឯករាជ្យដ៏តូចមួយនេះ បានកែប្រែសម្រួលឱ្យកាន់តែស្របទៅនឹងច្បាប់ព្រហ្មទណ្ឌអន្តរជាតិ។ ការដាក់ទោសអស់មួយជីវិត ត្រូវរំលាយចោល ដោយជំនួសមកវិញនូវការដាក់ទោសធ្ងន់បំផុតត្រឹមជាប់ពន្ធនាគារ ពី៣០ ទៅ៣៥ឆ្នាំ។ ជាងនេះទៅទៀត បទឧក្រិដ្ឋផ្សេងៗ ទទួលស្គាល់ដោយសន្ធិសញ្ញាអន្តរជាតិ មានជាអាទិ៍ ពាក្យ ទារុណកម្ម ប្រល័យពូជសាសន៍ ការរើងអើបពូជសាសន៍ ត្រូវបានដាក់បញ្ជូលក្នុងច្បាប់ព្រហ្មទណ្ឌថ្មីនេះដែរ។
ក្រិត្យថ្មី បានកំណត់យ៉ាងច្បាស់លាស់ និងដាក់ទោសកាន់តែធ្ងន់ដល់រាល់ទង្វើរំលោភបំពានលើក្មេងមិនទាន់ពេញវ័យ ៖ ការជួញដូរកុមារ ពេស្យាចារ ហិង្សាផ្លូវភេទ ថតរូបអាសអាភាសកុមារ មានវត្ថុបំរើប្រយោជន៍តណ្ហា រំលោភផ្លូវភេទលើកុមារ។ សម្តេច ប៉ាប មិនបញ្ឈប់ត្រឹមណេះទេ ព្រះអង្គបានបញ្ចូលលទ្ធភាពដល់វិហារកាតូលិក វ៉ាទីកង់ មានសិទ្ធិកាត់ទោស រាល់សកម្មភាពដែលនាំឱ្យប៉ះពាល់ដល់សន្តិសុខ ដល់មូលដ្ឋានគ្រឹះ សាសនា និងបេតិកភណ្ឌវ៉ាទីកង់ទៀតផង។
ក្នុងការប្រយុទ្ធប្រឆាំងនឹងភេរវកម្មហិរញ្ញវត្ថុ ការលាងសម្អាតលុយ ក្រិត្យបានចែងឱ្យមានការធ្វើបត្យាប័ន និងកាតព្វកិច្ចធ្វើសហប្រតិបត្តិការជាមួយប្រព័ន្ធតុលាការអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ