ប្រមុខដឹកនាំថ្មីនៃព្រះវិហារសាសនាកាតូលិកនៅវ៉ាទីកង់ឈ្មោះ FRANCOIS
ប្រមុខដឹកនាំថ្មីនៃព្រះវិហារសាសនាកាតូលិក មានឈ្មោះថា FRANCOIS អាយុ៧៦ឆ្នាំ និងមានសញ្ជាតិ អាហ្សង់ទីន កំពុងរៀបចំបា្ររព្ធពិធីបុណ្យ messe លើកទីមួយរបស់ព្រះអង្គក្នុងនាមជាសម្តេចប៉ាបកាតូលិក។ ពិធីបុណ្យនេះ ត្រូវធ្វើឡើងក្នុងពេលរសៀលថ្ងៃព្រហស្បតិ៍១៤មីនានេះនៅក្នុងវិហារតូច Sixtine នៅចំពោះមុខវត្តមាននៃក្រុមមន្ត្រីសង្ឃកាតូលិក ១១៤ អង្គដែលបានបោះឆ្នោតជ្រើសរើសកាលពីយប់មិញសម្តេចប៉ាបថ្មីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ពិភពលោកទាំងមូល-- -បានស្គាល់មុខសម្តេចប៉ាបថ្មីហើយ បន្ទាប់ពីការបោះឆ្នោតរបស់មន្ត្រីសង្ឃកាឌីណូកាលពីយប់មិញ ដើម្បី ធ្វើការបន្តស្នងតំណែងពី Benôit 16 ដែលបានលាលែងចេញពីមុខតំណែង ជាប្រវត្តិសាស្ត្រកាលពីថ្ងៃ២៨កុម្ភៈមុន។
គឺជាប៉ាបលើកទីមួយមកពីទ្វីបអាមេរិក សញ្ជាតិ Argentine ឈ្មោះ Jorge Mario Bergoglio ។ ការជ្រើសរើសកាឌីណូមកពីទ្វីបអាមេរិកនេះ-ក៏សរបញ្ជាក់ផងដែរអំពីឆន្ទៈរបស់ព្រះវិហារកាតូលិក ក្នុងការបើកចំហរទូលាយថែមទៀត ដល់ពិភពលោក។ មន្ត្រីសង្ឃកាតូលិកនៅទីក្រុង Buenos Aires នេះ បានសម្រេចចិត្ត ជ្រើសយកឈ្មោះ François ដែលជាឈ្មោះសម្តេចប៉ាបលើកទីមួយ។
មានអាយុ ៧៦ឆ្នាំ សម្តេចប៉ាបថ្មីក៏ ជាសមាជិក jésuite លើកទីមួយ ដែលបានឡើងគ្រប់គ្រងជាប្រមុខដឹកនាំសាសនាកាតូលិកនៃព្រះវិហារ Saint –Pierre នៅវ៉ាទីកង់ទីក្រុងរ៉ូម និងក្លាយជាសម្កេចប៉ាប ទី២៦៦ នៃប្រវត្តិសាស្ត្រ។ ការជាប់ឆ្នោតរបស់ archevêque Argentine Jorge Bergoglio ជា ប្រមុខដឹកនាំព្រះវិហារកាតូលិក ត្រូវបានទទួលការអបអរសាទរពីពិភពលោកទាំងមូល។ មុនគេគឺ លោកស្រី ប្រធានាធិបតី Argentine Cristina Kirchner ដែលបានថ្លែងសារ អបអរសាទរ ដោយជូនពរ សុំឲ្យភារកិច្ច របស់សម្តេចប៉ាបថ្មីប្រកបទៅដោយផលផ្លែបំផុត។
ចំណែកប្រធានាធិបតីអាមេរិក Barack Obama វិញ លោកបានផ្ញើសារជូនពរដ៏កក់ក្តៅចំពោះសម្តេចប៉ាប លើកទីមួយដែលមកពីទ្វីបអាមេរិក និង ក៏ជា ជើងឯកក្នុងការតស៊ូដើម្បីបុព្វហេតុនៃប្រជាជនក្រីក្រ។
នៅប្រទេសបារាំងវិញ លោកប្រធានាធិបតី François Hollande បានថ្លែងអះអាងថា« ប្រទេសបារាំង មានភក្តីជានិច្ចចំពោះ ប្រវត្តិសាស្ត្ររបស់ខ្លួននិងចំពោះគោលការណ៍សកលនានា ដូចជា សិទ្ធិសេរីភាព សមភាព និង ភាតរភាព ។ មិនតែប៉ុណ្ណោះ ប្រទេសបារាំង និងនៅតែបន្តការចរចា ប្រកបដោយទំនុកទុកចិត្តគ្នាជាមួយវិមានវ៉ាទីកង់ ដែរ"។ ចំណែក សហភាពអឺរ៉ុប វិញ ក៏មានចេតនា ចង់ឲ្យសម្តេចប៉ាបថ្មី អាចជួយលើកស្ទួយ ដល់ សន្តិភាព សាមគ្គីភាពនិងសេចក្តីថ្លៃថ្នូររបស់មនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ