អេហ្ស៊ីបស្ថិតក្នុងស្ថានភាពអាសន្ន៤ថ្ងៃមុនការរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញ
អំពើហិង្សានៅទីលានសន្តិភាព Tahrir កំពុងបន្តមាននៅក្នុងប្រទេសអេហ្ស៊ីប ៤ថ្ងៃ មុនការរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញ។ មានការបាញ់គ្រាប់កំាភ្លើងពិតទៅលើហ្វូងបាតុករដែលបានបោះជំរំនៅលើទីលានសន្តិភាព Tahrir ដោយបណ្តាលឲ្យរងរបួស ៩នាក់។ ខណៈនេះ ទីលានសន្តិភាព Tahrir កំពុងឡោមព័ទ្ធដោយកម្លំាងប៉ូលិស ហើយលោកប្រធានាធិបតី Morsi បានស្នើកម្លំាងទាហានឲ្យធានាសន្តិសុខ។ ថ្ងៃអង្គារ ទី១១ ធ្នូនេះ ក្បួនបាតុកម្មប្រឈមមុខដាក់គ្នារវាងក្រុមអ្នកប្រឆំាងលោកប្រធានាធិបតីអេហ្ស៊ីប Morsi និងក្រុមអ្នកគំាទ្រលោកប្រធានាធិបតីត្រូវជួបជុំគ្នានៅទីលានសន្តិភាព Tahrir។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
តាមការគ្រោងទុក បាតុកម្មប្រឈមមុខដាក់គ្នានៅទីលានសេរីភាព Tahrir រវាងក្រុមអ្នកប្រឆំាងលោកប្រធានាធិបតីអេហ្ស៊ីប Morsi និងក្រុមអ្នកគំាទ្រលោកប្រធានាធិបតីត្រូវចាប់ផ្តើមនៅរសៀលថ្ងៃនេះ។ សម្រាប់ក្រុមគណបក្សប្រឆំាង ក្បួនបាតុកម្មនៅថ្ងៃនេះ គឺសំខាន់ខ្លំាងណាស់ ព្រោះថា ជាសំណាងចុងក្រោយដើម្បីបង្ខំលោកប្រធានាធិបតី Morsi ឲ្យលើកថ្ងៃ ឬមួយក៏បោះបង់ចោលទំាងស្រុងនូវការរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញដែលគ្រោងរៀបចំនៅថ្ងៃសៅរ៍ ទី១៥ ធ្នូចុងសប្តាហ៍នេះ។
តាមកម្មវិធី ក្បួនបាតុកម្មនឹងត្រូវដើរដង្ហែរជា ៣ខ្សែ ដោយណាត់ជួបជុំគ្នានៅពីមុខវិមានប្រធានាធិបតី និងដែលក្នុងនោះ មានមួយក្រុមត្រូវដង្ហែរក្បួនមានចម្ងាយ ២០០ម៉ែត្រកាត់តាមវិហារមួយដែលមានក្រុមអ្នកគំាទ្រលោក Morsi បានសម្រេចរៀបចំក្បួនបាតុកម្មនៅទីនោះ។ គឺក្បួនបាតុកម្មក្បែរគ្នារវាងក្រុមអ្នកគំាទ្រលោក Morsi និងក្រុមអ្នកប្រឆំាងលោក Morsi នេះហើយ ដែលនឹងអាចផ្ទុះឡើងនូវអំពើហិង្សាដោយចៀសមិនរួច។ កាលពីថ្ងៃពុធសប្តាហ៍កន្លងទៅ ការប៉ះទង្គិចគ្នារវាងក្រុមទំាងពីរនៅមុខវិមានប្រធានាធិបតីបានបណ្តាលឲ្យមានមនុស្សស្លាប់ ៨នាក់ និងរងរបួសជាង ៧០០នាក់ផ្សេងទៀត។
គឺដោយព្រួយបារម្ភពីផ្ទុះអំពើហិង្សាជាយថាហេតុជាថ្មីនៅពេលនេះហើយ បានជាចលនាអ៊ីស្លាមនិយមជ្រុល Salafistes បានបញ្ជាក់ថា ពួកគេនឹងមិនដង្ហែរក្បួនបាតុកម្មនៅក្បែរក្រុម Frère Musulmans ទេ។ យ៉ាងណាក៏ដោយ រដ្ឋាភិបាលបានចេញបញ្ជាឲ្យដាក់ពង្រាយកម្លំាងប៉ូលិស កម្លំាងទាហាន ព្រមទំាងរថក្រោះនៅទីតំាងសំខាន់ៗមួយចំនួនដើម្បីប្រឈមទប់នឹងការផ្ទុះគ្រប់អំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ