គណបក្សប្រឆាំងអេហ្ស៊ីប បដិសេធការចរចាជាមួយ ប្រធានាធិបតី មរស៊ី
នយោបាយប្រទេសអេហ្ស៊ីប កំពុងតែធ្លាក់ក្នុង ភាពដុនដាបពីមួយថ្ងៃ ទៅមួយថ្ងៃ ពិបាកនឹងរកច្រកចេញ។ នៅថ្ងៃសុក្រម្សិលមិញ គណបក្សប្រឆាំងអេហ្ស៊ីប បដិសេធ មិនព្រម ធ្វើការចរចា ដែលនឹងគ្រោងធ្វើ នៅថ្ងៃសៅរ៍ នេះ ជាមួយ ប្រធានាធិបតី មរស៊ី។ ក្រុមប្រឆាំង នៅតែបន្តបាតុកម្ម ប្រឆាំងនឹង គំរោងធម្មនុញ្ញថ្មី របស់ ប្រធានាធិបតីអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
កាលពីថ្ងៃសុក្រម្សិលមិញ ក្រុមបាតុករប្រឆាំង ប្រធានាធិបតី មរស៊ី បានផ្តុំគ្នា នៅទីលាន តាហៀ ហើយ ដណ្តើមកាន់កាប់ ផ្លូវចូល ទៅកាន់វិមានប្រធានាធិបតី បានមកវិញ។ ក្រុមទាហាន បានបណ្តោយអោយពួកគេ ឆ្លងកាត់របាំងការពារ ដោយគ្មានការហាមឃាត់អ្វីឡើយ។ គេឃើញ ខ្សែលួសបន្លាការពារ វិមានប្រធានាធិបតី ត្រូវបានដកចេញ ហើយក្រុមបាតុករខ្លះ បានចូលទៅ និយាយសំដែងភាព ស្និទ្ឋស្នាល ជាមួយ ក្រុមទាហានអេហ្ស៊ីប។
ខុសពីសព្វដង ស្ថានភាពនៃបាតុកម្ម កាលពីម្សិលមិញ មានលក្ខណៈ ស្ងប់ស្ងៀម និងគ្មានអំពើហឹង្សា អ្វីឡើយ។ ក្រុមបាតុករនាំក្រុមគ្រួសារ រឺក៏ មិត្តភក្តិ របស់ខ្លួន មកចូលរួម ធ្វើបាតុកម្ម។ ពួកគេ មានការខឹងសម្បារ នឹងខ្លោចផ្សាចិត្ត ចំពោះអំពើ ហិង្សា ដែលកើតឡើងក្នុងសប្តាហ៍នេះ។ ពួកគេ យល់ថា ប្រធានាធិបតី ធ្វើសន្ទរកថា ម្សិលមិញ គ្រាន់តែដើម្បី អោយស្ថានភាពបាន ស្ងប់ស្ងៀមតែប៉ុណ្ណោះគ្មានអ្វីខុសប្លែកពី សន្ទរកថាចាស់ របស់ អតីតប្រធានាធិបតីផ្តាច់ការ មូបារ៉ាក់ឡើយ។ ក្រុមបាតុករបន្ថែមថា លោកមរស៊ី គ្រាន់តែបញ្ចេញបញ្ចូលឃ្លា ដែលមានលក្ខណៈជា សាសានាដើម្បី បញ្ចុះបញ្ចូល ពួកគេ អោយប្តូរទស្សនៈរបស់ខ្លួន។
ក្រុមអ្នកសង្កេតការនានា បានប្រៀបធៀប ស្ថានភាពអេហ្ស៊ីបបច្ចុប្បន្ន ទៅនឹង ស្ថានភាពនយោបាយកាលពីឆ្នាំ ២០១១ នៅពេលដែល ប្រជាជនអេហ្ស៊ីប រួបរួមគ្នាធ្វើចលនា បះបោរ ទំលាក់អតីតប្រធានាធិបតី មូបារ៉ាក់។ តាំងពីលោកមរស៊ី ឡើងកាន់អំណាចមក ស្ថានភាពក្នុងប្រទេស ហាក់គ្មានបានផ្លាស់ប្តូរអ្វីឡើយ។ ក្រុមបាតុករប្រកាស បន្តសកម្មភាព ប្រឆាំងនឹង គំរោងធម្មនុញ្ញថ្មី របស់ប្រធានាធិបតីអេហ្ស៊ីប។ គណបក្ស ប្រឆាំង បដិសេធ មិនចរចាដាច់ខាត ជាមួយ លោកមរស៊ី នៅថ្ងៃសោរ៍នេះ។
កាលពីថ្ងៃសុក្រម្សិលមិញ លោកមរស៊ីបាន អំពាវនាវអោយ គណបក្សប្រឆាំង ចូលរួមពិភាក្សា រកដំណោះស្រាយវិបត្តិនយោបាយ។ រីឯ អនុប្រធានាធិបតី លោក មេគគី បានប្រកាសថា ការបោះឆ្នោតប្រជាមតិ នឹងអាចលើកធ្វើ ទៅថ្ងៃក្រោយបាន។
វិបត្តិនយោបាយអេហ្ស៊ីប បានចាប់ផ្តើមកើតឡើង តាំងពីចុងខែវិច្ឆិកា បន្ទាប់ពី មានចេញក្រិត្យ ប្រធានាធិបតី ផ្តល់អំណាច យ៉ាងទូលំទូលាយ ដល់ ប្រធានាធិបតីអេហ្ស៊ីប។ កាលពីថ្ងៃពុធកន្លងមក អំពើហិង្សារវាងក្រុមបាតុករប្រឆាំង និង ក្រុមគាំទ្រលោក មរស៊ី បានបង្កមនុស្សស្លាប់ ៧នាក់ និងបាត់ខ្លួន ជាច្រើននាក់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ