ប្រធានាធិបតីអេហ្ស៊ីបសុខចិត្តលុបចោលនូវ ក្រិត្យធម្មនុញ្ញដែលពង្រឹងអំណាចរបស់ខ្លួន
នៅប្រទេសអេហ្ស៊ីប កាលពីល្ងាចថ្ងៃសៅរ៍ ម្សិលមិញ ប្រធានាធិបតី មរស៊ី បានលុបចោលនូវក្រិត្យធម្មនុញ្ញដែលពង្រឹងអំណាចរបស់ខ្លួន តាមការទាមទាររបស់គណបក្សប្រឆាំង។ នេះ ជាដំណឹងល្អសំរាប់ប្រជាជនអេហ្ស៊ីប ដែលមានការមិនពេញចិត្ត ចំពោះក្រិត្យនេះ។ ក្រិត្យ ធម្មនុញ្ញ របស់ក្រុងគែរ ធ្វើអោយអេហ្ស៊ីប ធ្លាក់ក្នុងវិបត្តិនយោបាយធ្ងន់ធ្ងរ ចាប់តាំងពី ចុងខែវិច្ឆិកាមក ដែលអំពើហឹង្សា រវាងក្រុមប្រឆាំង និងក្រុមគាំទ្រលោកមរស៊ី បានបង្កអោយមានមនុស្សស្លាប់ ៧នាក់។ ប៉ុន្តែ លោកមរស៊ី នៅតែប្រកាន់ជំហរ ក្នុងការរៀបចំ ការបោះឆ្នោតប្រជាមតិ សំរាប់គំរោងវិសោធនកម្មធម្មនុញ្ញ នៅថ្ងៃ ១៥ធ្នូ ខាងមុខ ដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ដើម្បី ដោះស្រាយវិបត្តិនយោបាយ និង បន្ថយនូវស្ថានភាពតានតឹងក្នុងប្រទេស ប្រធានាធិបតី មរស៊ី គ្មានជំរើសច្រើននោះឡើយ។ ជាពិសេសនៅចំពោះមុខ មហាបាតុកម្មដែលមានលក្ខណៈ ស្រដៀងគ្នានឹង ការបះបោរទំលាក់ អតីតប្រធានាធិបតី មូបារ៉ាក់ កាលពីឆ្នាំ ២០១១។ កាលពីល្ងាចថ្ងៃសៅរ៍ ម្សិលមិញ លោកមរស៊ី បានលុបចោលនូវក្រិត្យធម្មនុញ្ញដែលពង្រឹងអំណាចរបស់ខ្លួន។
ការប្រកាសលុបចោលក្រិត្យនេះ បានធ្វើឡើង ក្នុងជំនួបរបស់លោកមរស៊ី ជាមួយអ្នកនយោបាយសំខាន់ៗ។ ប៉ុន្តែ ប្រធានាធិបតី នៅតែប្រកាន់ជំហរ ក្នុងការរៀបចំ ការបោះឆ្នោតប្រជាមតិ សំរាប់គំរោងវិសោធនកម្មធម្មនុញ្ញ នៅថ្ងៃ ១៥ធ្នូ ខាងមុខនេះ ដដែល ព្រោះបើយោងតាម ទីប្រឹក្សារបស់លោកមរស៊ី ការកែប្រែការបោះឆ្នោតប្រជាមតិ គឺជាបញ្ហាដែលពិបាកនឹងធើ្វ ទៅតាមផ្លូវច្បាប់ ។
គណបក្សប្រឆាំង នៅតែគ្មានទំនុកចិត្ត ចំពោះ វិធានការថ្មីរបស់ប្រធានាធិបតី។ គណបក្ស រណសិរ្សស្រោចស្រង់ជាតិ អេហ្ស៊ីប (FSN) បានអោយនិយមន័យ លើ ការលុបចោលនូវក្រិត្យ របស់លោកមរស៊ីនេះ ថាជា កលល្បិចនយោបាយបោកប្រាស់ ប្រជាជន។ FSN បានសុំអោយប្រជាជនអេហ្ស៊ីប បន្តធ្វើបាតុកម្មប្រឆាំង រហូតដល់សំរេចអោយបាន នូវការលុបចោលនូវ ការបោះឆ្នោតប្រជាមតិ លើគំរោងវិសោធកម្មធម្មនុញ្ញ។ នៅថ្ងៃអាទិត្យនេះ សម្ព័ន្ឋភាពប្រឆាំងអេហ្ស៊ីប គណបក្ស រណសិរ្សស្រោចស្រង់ជាតិ ក្រោមអធិបតីភាពរបស់ លោក Mohamed ElBaradei ដែលជា ម្ចាស់ពានរង្វាន់សន្តិភាពលើពិភពលោក នឹងធ្វើការពិភាក្សាគ្នា ដើម្បី សំរេចអំពី គោលជំហររបស់ខ្លួន ចំពោះ វិធានការថ្មីរបស់ ប្រធានាធិបតី មរស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ