ខេត្តមួយចំនួននៃប្រទេសរុស្ស៊ីរងគ្រោះធ្ងន់នឹងធាតុអាកាសរាំងស្ងួត
តាមដែលកាសែតលេខថ្ងៃទី១សីហានេះ ចុះផ្សាយឧទ្ទិសដល់ការធ្វើដំណើរ ថ្ងៃ៣១កក្កដាម្សិលមិញរបស់លោកនាយករដ្ឋមន្ត្រីមេដវេដេវ ទៅសួរសុខទុក្ខប្រជាកសិករ រងគ្រោះនៅខេត្តVolgograd ប៉ែកខាងត្បូងប្រទេស រងគ្រោះធ្ងន់ជាងគេគឺខេត្ត៥នៃតំបន់ស៊ីបេរីប៉ែកខាងកើតប្រទេស។ ទោះយ៉ាងណាក្តីក៏រដ្ឋាភិបាលរំពឹងថា កសិផលឆ្នាំនេះ នឹងមានទំហំមិនអន់ជាង កសិផលមធ្យមប្រចាំឆ្នាំដែលរុស្ស៊ីតែងប្រមូលបានហើយរុស្ស៊ីនឹងនៅតែ ជាប់ចំណាត់ថ្នាក់ទី៣ដដែលក្នុងលោកខាងនាំធញ្ញជាតិចេញទៅក្រៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមកាសែត Niezavissimaya Gazeta នៅខេត្តVolgograd ដោយមកពីអាកាសធាតុ រាំងស្ងួតប៉ុន្មានសប្តាហ៍ចុងក្រោយ ដំណាំឡើងខ្លោចលើផ្ទៃដី អស់១៦.០០០ ហិកតា ពីក្នុងចំណោម៤០.០០០ ហិកតា។ ប៉ុន្តែអភ័ព្វមែនទែន គឺខេត្ត៥នៃតំបន់ស៊ីបេរីដែលដំណាំ ខូចអស់លើផ្ទៃក្រឡា រាប់លានហិកតានាំជាការខូចខាតដល់ទឹកប្រាក់ ៦ពាន់លានរូប្ល ឬប្រមាណ ២០០លានដុល្លារ។
ឧទាហរណ៍ ខេត្ត Altai រងគ្រោះគឺផ្ទៃដីសាបព្រោះ ជាង៣លានហិកតា ពីក្នុងនោះឡើងស្លោក ខូចទៅហើយ គឺអស់៥៧៦.០០០ ហិកតា។ ការខូចខាតត្រូវគេប៉ាន់ស្មានដល់ជាង៣លានរូប្ល។
ភាពអាសន្នត្រូវបានប្រកាសនៅតាម៣២ស្រុកពីក្នុងចំណោមស្រុកទាំង៦០នៃខេត្តនោះ។
ក្នុងខេត្ត Kemerovo ផ្ទៃដីសាបព្រោះដែលសន្មត់ថា “ងាប់” ទៅហើយ គឺ១១៦.០០០ ហិកតា រីឯការខូចខាតគឺក្នុងទំហំ១លាន៨សែនហិកតា។ ភាពអាសន្នត្រូវបានប្រកាស នៅតាមស្រុកទាំង១៣ នៃខេត្តនោះ។
លោកនាយករដ្ឋមន្ត្រី មេដេវេដេវ ថ្លែងក្នុងសម័យប្រជុំនៅទីរួមខេត្ត Volgograd លើកឡើងថា ដោយមកពីធាតុអាកាសរាំងស្ងួតខ្លាំង គ្មានភ្លៀងធ្លាក់មួយតំណក់សោះ អស់ប៉ុន្មានសប្តាហ៍ជាប់ មកហើយនៅតាមខេត្តមួយចំនួននៃប្រទេស ផលដំណាំដែលប្រទេសរុស្ស៊ី នឹងប្រមូលបានក្នុង ឆ្នាំនេះ នឹងមានទំហំ១/៣តិចជាងឆ្នាំមុន រួចទោះយ៉ាងណាក្តី ក៏វាមិនទាបជាងទំហំមធ្យមប្រចាំឆ្នាំ ពី៨០ទៅ៨៥លានតោនឡើយ។ មិនតែប៉ុណ្ណោះ រដ្ឋាភិបាលត្រៀមធញ្ញជាតិ បរិមាណ ៥លានតោន ទុកសម្រាប់ធ្វើអន្តរាគមន៍ដើម្បីទប់កុំឲ្យស្រូវសាលីឡើងថ្លៃតទៅទៀត។ ជា ការកត់សម្គាល់ តាំងពីដើមឆ្នាំនេះមកស្រូវសាលីនៅរុស្ស៊ីបានឡើងថ្លៃ២៥%ដល់៧.៥០០រូប្លឫ ២៣០ដុល្លារ ក្នុង១តោន។
ប្រមុខរដ្ឋាភិបាលក៏រំលឹកថា ក្នុងឆ្នាំ២០១២នេះ មានរំលែកទឹកប្រាក់ ១៤ពាន់លានរូប្ល ឫ ជាង៤៣០លានដុល្លារថែមទៀត សម្រាប់គាំទ្រដល់វិស័យ កសិ-ឧស្សាហកម្មនៃប្រទេស។
ទាក់ទងនឹងការនាំស្រូវសាលីចេញទៅក្រៅ រដ្ឋាភិបាលរុស្ស៊ី បានឲ្យដឹងថា មកទល់ឥឡូវ រុស្ស៊ីបាននាំចេញ ក្នុងបរិមាណ២២លានតោន ហើយទៅទល់ចុងឆ្នាំនេះ វានឹងឡើងដល់ ២៧លានតោន ដោយស្ថិតនៅតែពីក្រោយស.រ.អា. ដែលទំហំនាំចេញនេះ គឺ៣៦លានតោន និង កាណាដា ៣២លានតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ