ប្រធានគណបក្សហ្វ៊ុនស៊ិនប៉ិចថ្មី សន្យាអនុវត្តមនោគមវិជ្ជា«សីហនុនិយម»
ព្រះអង្គម្ចាស់នរោត្តម អរុណរស្មី ព្រះបុត្រីពៅសម្តេចព្រះបាទនរោត្តម សីហនុ ដែលទើបជ្រើសតាំងអោយធ្វើជាព្រះប្រធានគណបក្សហ្វ៊ុនស៊ិនប៉ិច កាលពីព្រឹកមិញ បានសន្យាអនុវត្តមនោគមវិជ្ជា«សីហនុនិយម»។ គណបក្សហ្វ៊ុនស៊ិនប៉ិច មិនមែនគ្រាន់តែងតាំងព្រះអង្គជាប្រធានគណបក្សប៉ុណ្ណោះទេ។ ប៉ុន្តែគណបក្សបានសម្រេចថ្វាយជូនព្រះអង្គ អោយឈរឈ្មោះជាបេក្ខភាពនាយករដ្ឋមន្ត្រីបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
«ជយោ គណបក្សហ៊្វុនស៊ិនប៉ិច ជយោ រាជានិយម ជយោ សីហនុនិយម ជយោ មនោគមវិជ្ជា សីហនុនិយម!»។ ទាំងអស់នេះគឺជាពាក្យពេចន៍និងខ្លឹមសាររួមដែលថ្លែងចេញពីថ្នាក់ដឹកនាំជាន់ខ្ពស់នៃគណបក្សហ្វ៊ុនស៊ិនប៉ិច នៅក្នុងអង្គសមាជកាលពីព្រឹកមិញនេះ។
ភ្លាមៗបន្ទាប់ពីជ្រើសតាំងអោយធ្វើជាប្រធានគណបក្សហ្វ៊ុនស៊ិនប៉ិច ព្រះអង្គម្ចាស់ក្សត្រី នរោត្តម អរុណរស្មី ព្រះបុត្រីសម្តេចព្រះបាទនរោត្តម សីហនុ បានប្រកាសសន្យាដង្ហែតាមគោលការណ៍«សីហនុនិយម»។ គោលការណ៍សីហនុនិយមមានន័យថា ការផ្សះផ្សាជាតិ ការបង្រួមបង្រួមជាតិ ស្ថិរភាពនយោបាយ និងសន្តិភាពដើម្បីអភិវឌ្ឍប្រទេសជាតិ។
គណបក្សហ៊្វុនស៊ិនប៉ិចបានប្រកាសនៅថ្ងៃសៅរ៍នេះថា គណបក្សមិនគ្រាន់តែមានរចនាសម្ព័ន្ធដឹកនាំថ្មីដែលឆ្លុះបញ្ចាំងនូវឯកភាពជាតិនិងសាមគ្គីភាព ជាគណបក្សអ្នករាជានិយម និងសីហនុនិយមប៉ុណ្ណោះទេ។ ប៉ុន្តែ គណបក្សហ៊្វុនស៊ិនប៉ិចមានកិត្តិយសទទួលស្វាគមន៍ព្រះអង្គម្ចាស់ នរោត្តម អរុណរស្មី មកដឹកនាំគណបក្សតាមផ្លូវសីហនុនិយម ដើម្បីឆ្ពោះតម្រង់ទៅរកវឌ្ឍនភាពទៀតផង។
វត្តមានរបស់ព្រះអង្គម្ចាស់ក្សត្រីជាប្រធានគណបក្សហ៊្វុនស៊ិនប៉ិច គឺជាការបង្ហាញអត្តសញ្ញាណដើមរបស់គណបក្ស មានន័យថា ជាគណបក្សតែមួយដូចដើម ជាគណបក្សមានភាពស្របច្បាប់ដូចដើម និងជាគណបក្សរាជានិយម និងសីហនុនិយម ១០០%។
ក្នុងចំណោមសេចក្តីសម្រេចចិត្តផ្សេងៗ អង្គសមាជវិសាមញ្ញកាលពីព្រឹកមិញបានសម្រេចដង្ហែតាមព្រះរាជតម្រិះប្រកបដោយព្រះរាជគតិបណ្ឌិត នៃព្រះករុណាព្រះបាទសម្តេចព្រះ នរោត្តម សីហនុដែលជាស្ថាបនិកនៃគណបក្សហ៊្វុនស៊ិនប៉ិច កាលពីឆ្នាំ១៩៨១។
សូមបញ្ជាក់ថា ផ្អែកតាមគោលការណ៍របស់គណបក្សហ្វ៊ុនស៊ិនប៉ិច គណបក្សមិនមែនគ្រាន់តែងតាំងព្រះអង្គម្ចាស់ក្សត្រីនរោត្តម អរុណរស្មី ជាប្រធានគណបក្សប៉ុណ្ណោះទេ។ ប៉ុន្តែគណបក្សបានសម្រេចថ្វាយជូនព្រះអង្គ អោយឈរឈ្មោះជាបេក្ខភាពនាយករដ្ឋមន្ត្រីបន្ថែមទៀត។
លោក លឺ ឡាយស្រេង ត្រូវបានជ្រើសតាំងជាប្រធានក្រុមប្រឹក្សាជាតិ លោក កែវ ពុទ្ធរស្មី ជាប្រធានឧត្តមក្រុមប្រឹក្សាគណបក្ស លោក យូ ហុកគ្រី ជាព្រឹទ្ធបុរសគណបក្ស លោក ញឹក ប៊ុនឆៃ ជាអគ្គលេខាធិការគណបក្ស និង លោក សៅ រ៉ានី ជាអគ្គលេខាធិការរងគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ