ភេរវកម្មមិនបានសម្រេច ៖ កញ្ចប់បញ្ញើទៅសហរដ្ឋអាមេរិកមានផ្ទុកជាតិផ្ទុះប្រភេទខ្លាំង
មិនមែនជាការប៉ុនប៉ងធ្វើភេរវកម្មមិនបានសម្រេចដដែលៗ ដូចការសន្និដ្ឋានដំបូងទេ ! គ្រាប់បែកបង្កប់ ដែលផ្ញើពីប្រទេសយេមែន ទៅសហរដ្ឋអាមេរិក តាមយន្តហោះដឹកអីវ៉ាន់ អាចផ្ទុះបានគ្រប់ពេលវេលាទាំងអស់ ! ពេលនេះការស៊ើបអង្កេតទំនងជាកំពុងផ្តោតលើអ្នកឯកទេសផលិតកាំជ្រួច ឲ្យពួកអាល់កៃដានៅយេមែន។ ម្សិលមិញ អាជ្ញាធរយេមែន ចាប់បានស្ត្រី ដែលជាអ្នកផ្ញើកញ្ចប់បង្កប់ជាតិផ្ទុះនេះហើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
កញ្ចប់បញ្ញើសង្ស័យទាំងពីរ ដែលគេរកឃើញនៅក្នុងយន្តហោះដឹកទំនិញអាមេរិកពីរគ្រឿង មួយនៅឌូបៃ និងមួយគ្រឿងទៀតនៅប្រទេសអង់គ្លេស បង្កប់ទៅដោយសារជាតិផ្ទុះខ្លាំងបំផុត (Penthrite)និងតាមបែបបច្ចេកវិទ្យាទំនើបក្រៃលែង ជាហេតុធ្វើឲ្យប្រព័ន្ធការពារសុវត្ថិភាពចាប់មិនបាន ថាមានសារជាតិអាចផ្ទុះ និងសារជាតិអាចបង្កជាអគ្គិភ័យ។
គ្រាប់បែក ដែលចាប់បាននៅឌូបៃ ត្រូវបានគេយកទៅបង្កប់ក្នុងប្រអប់ម៉ាស៊ីនបោះពុម្ព (ម៉ាស៊ីនព្រីនអក្សរ) ដែលមានប្រអប់ទឹកខ្មៅជាជាតិផ្ទុះ និងទំនងជាភ្ជាប់ជាមួយនឹងទូរស័ព្ទដៃ សម្រាប់ចុចបំផ្ទុះ។ ចំណែកគ្រាប់បែកទីពីរ ដែលរកឃើញនៅអង់គ្លេស មានលក្ខណៈដូចគ្រាប់បែកទីមួយដែរ តែមានគ្រឿងយន្តកំណត់ម៉ោងសម្រាប់ផ្ទុះ កំពុងតែដំណើរការរួចទៅហើយ។
ភស្តុតាងទាំងនេះ បញ្ជាក់ថាមនុស្សរបស់ក្រុមអាល់កៃដា នៅយេមែន មានសមត្ថភាពកាន់តែខ្លាំងឡើងៗ ក្នុងការប៉ុនប៉ងវាយប្រហារអាមេរិក។
យោងតាមកាសែត វ៉ាស៊ីនតោនប៉ុស្តិ៍ ការស៊ើបអង្កេតទំនងជាកំពុងផ្តោតយ៉ាងខ្លាំងទៅលើបុរស Ibrahim Hassan Al-Asiri អាយុ២៨ឆ្នាំដែលជាអ្នកឯកទេសខាងផលិតកាំជ្រួចឲ្យពួកអាល់កៃដា នៅយេមែន។ ម្យ៉ាងអ៊ីប្រាហ៊ីម ជាមនុស្សដែលគេស្វែងតាមរកបំផុតម្នាក់ ធ្លាប់បានប្រើសារធាតុផ្ទុះប្រភេទ Penthriteនេះ កាលពីឆ្នាំទៅមិញ ដោយដាក់បញ្ចូលក្នុងពោះវៀនធំរបស់ប្អូនប្រុសខ្លួន ដើម្បីបំផ្ទុះធ្វើឃាតអ្នកទទួលខុសត្រូវប្រយុទ្ធប្រឆាំងនឹងអំពើភេរវកម្ម នៅអារ៉ាប៊ីសាអ៊ូឌីត។
តាមរយៈលេខទូរស័ព្ទលើកញ្ចប់បញ្ញើ ម្សិលមិញ អាជ្ញាធរយេមែន បានចាប់ខ្លួនស្ត្រីម្នាក់ ដែលជាអ្នកយកកញ្ចប់គ្រាប់បែកទៅដាក់នៅប៉ុស្តិ៍ដើម្បីផ្ញើទៅសហរដ្ឋអាមេរិក។
ប្រទេសបារាំង និងអាល្លឺម៉ង់ បានសម្រេចផ្អាករាល់ការដឹកជញ្ជូនតាមយន្តហោះមកពីប្រទេសយេមែន ចំណែកប្រទេសបែលហ្សិកវិញ ក៏កំពុងចាត់វិធានការការពារយ៉ាងហ្មត់ចត់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ