លោកហ៊ុន សែន ប្រកាសស្វាគមន៍បក្សនយោបាយដែលបានចុះបញ្ជីនៅ គ.ជ.ប
គិតត្រឹមថ្ងៃទី០១ ឧសភា ម្សិលមិញនេះ បក្សនយោបាយចំនួន៣ហើយដែលបានចុះបញ្ជីនៅ គ.ជ.ប ខណៈបក្សចំនួន១៦ទៀតកំពុងរៀបចំឯកសារនានា ដើម្បីចុះបញ្ជីចូលរួមការបោះឆ្នោតនាពេលខាងមុខ។ នៅព្រឹកនេះ លោកនាយករដ្ឋមន្ត្រីហ៊ុន សែន បានចេញមកប្រកាសស្វាគមន៍ដល់បក្សដែលបានចុះបញ្ជីរួចរាល់ទាំងនេះ។ ជាមួយការស្វាគមន៍ លោកហ៊ុន សែន ថែមទាំងចាត់ទុកថា ដំណើការនេះគឺឆ្លុះបញ្ជាំងពីការអនុវត្តលទ្ធិប្រជាធិបតេយ្យនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:១៦
តាមរយៈទំព័រហ្វេសប៊ុករបស់ខ្លួន លោកនាយករដ្ឋមន្ត្រីហ៊ុន សែន បានសរសេរសារស្វាគមន៍គណបក្សនយោបាយទាំងអស់ដែលបានចុះបញ្ជីគណបក្ស ព្រមទាំងបញ្ជីបេក្ខជនឈរឈ្មោះប្រកួតប្រជែងនៅក្នុងថ្ងៃបោះឆ្នោតថ្ងៃទី ២៩ ខែ កក្កដាខាងមុខនេះ។ សម្រាប់លោកនាយករដ្ឋមន្ត្រី ការចុះបញ្ជីរបស់គណបក្សនយោបាយនៅគណៈកម្មការធិការជាតិរៀបចំការបោះឆោ្នត (គ.ជ.ប) នេះ គឺបង្ហាញឲ្យឃើញច្បាស់ថា កម្ពុជា កំពុងគោរពនិងអនុវត្តនូវលទ្ធិប្រជាធិបតេយ្យដែលគណបក្សនយោបាយតូចធំទាំងអស់ក្នុងប្រទេស មានសិទ្ធិ និងឱកាសចូលរួមប្រកួតប្រជែងនៅក្នុងការបោះឆ្នោតដោយសេរី។
សារស្វាគមន៍របស់លោកនាយករដ្ឋមន្ត្រីនេះ ធ្វើឡើងបន្ទាប់ពីគណបក្សនយោបាយចំនួនបី គឺគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា បានចុះបញ្ជីនៅ គ.ជ.ប រួចរាល់ហើយគិតត្រឹមថ្ងៃទី០១ ឧសភា។ ចំណែកគណបក្សនយោបាយចំនួន១៦ទៀត បានទទួលពាក្យស្នើសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ចូលរួមការប្រកួតប្រជែងការបោះឆ្នោតនាពេលខាងមុខ។ យ៉ាងណាក៏ដោយ គណបក្សអំណាចខ្មែរបានប្រកាសមិនចូលរួមការបោះឆ្នោតនេះទេ ខណៈគណបក្សប្រជាធិបតេយ្យមូលដ្ឋាននៅស្រពិចស្រពិលនៅឡើយចំពោះការចូលរួមការបោះឆ្នោត។
ជាការកត់សម្គាល់ ខណៈដែលគណបក្សមួយចំនួនកំពុងរួសរាន់ទៅចុះបញ្ជីនៅ គ.ជ.ប នេះ លោកសម រង្ស៊ី ដែលជាអតីតប្រធានគណបក្សប្រឆាំងឯណោះវិញ នៅតែបន្តទទូចកុំឲ្យពលរដ្ឋទៅបោះឆ្នោត។ តាមរយៈទំព័រហ្វេសប៊ុកកាលពីថ្ងៃអង្គារ លោកសម រង្ស៊ី អំពាវនាវឲ្យប្រជាពលរដ្ឋធ្វើពហិការការបោះឆ្នោត បើសិនគ្មានវត្តមានអតីតគណបក្សសង្គ្រោះជាតិ។ សម្រាប់លោកសម រង្ស៊ី ការមិនទៅបោះឆ្នោត គឺមានន័យថា ពលរដ្ឋនៅតែគាំទ្រអតីតគណបក្សសង្គ្រោះជាតិក្នុងចិត្ត និងចង់ឲ្យអតីតបក្សនេះមកដឹកនាំប្រទេស។ ផ្ទុយទៅវិញ ប្រសិនបើពលរដ្ឋទៅបោះឆ្នោត ទោះបោះឲ្យគណបក្សណាក៏ដោយ ក៏ស្មើនឹងការគាំទ្រគណបក្សប្រជាជនកម្ពុជាហើយចង់ឲ្យគណបក្សនេះមកដឹកនាំប្រទេសតទៅទៀត។ នេះបើតាមលោក សម រង្ស៊ី។
ការអំពាវនាវរបស់លោកសម រង្ស៊ីនេះ ធ្លាប់ត្រូវបានអ្នកនាំពាក្យគណបក្សកាន់អំណាចអះអាងថា គ្មានប្រសិទ្ធភាព។ គ្មានប្រសិទ្ធភាព ព្រោះបើតាមលោកសុខ ឥសាន ប្រជាពលរដ្ឋខ្មែរនាពេលនេះកំពុងតែរស់នៅក្នុងសន្តិភាព និងការអភិវឌ្ឍ។ ដូច្នេះ គេលែងខ្វាយខ្វល់នឹងអតីតគណបក្សសង្គ្រោះជាតិទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ