ពិធីប្រគល់រង្វាន់ណូបែលសន្តិភាព ៖ ជម្លោះរវាងចិន និងគណៈកម្មាធិការណូបែល
ពីរថ្ងៃមុន ពិធីប្រគល់ពានរង្វាន់ណូបែលសន្តិភាព ជាផ្លូវការ នៅទីក្រុងអូស្លូ ប្រទេសន័រវេស ដល់លោក លីវ ស៊ាវប៉ូ ជ័យលាភីរង្វាន់ណូបែលសន្តិភាពឆ្នាំ ២០១០ គណៈកម្មាធិការណូបែល កំពុងតែប្រឈមមុខ តាំងពីថ្ងៃអង្គារម្សិលមិញ ជាមួយប្រទេសចិន ដែលបានអំពាវនាវឲ្យពិភពលោកធ្វើពហិការមិនចូលរួមក្នុងពិធីប្រគល់រង្វាន់ ថ្ងៃទី១០ធ្នូ។ សម្រាប់ចិន មានប្រទេសនិងអង្គការជាង១០០បានគាំទ្រខ្លួន ប៉ុន្តែគណៈកម្មាធិការណូបែលអះអាងផ្ទុយទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
អ្វីដែលច្បាស់ គឺ ទាំងលោក លីវ ស៊ាវប៉ូ ដែលកំពុងជាប់ឃុំឃាំងក្នុងពន្ធនាគារ និងទាំងសមាជិកក្រុមគ្រួសាររបស់លោកទាំងអស់ គ្មាននរណាម្នាក់អាចមានមុខនៅឱកាសពិធីប្រគល់ពានរង្វាន់ណូបែលសន្តិភាព ថ្ងៃទី១០ ធ្នូ ឆ្នាំ២០១០ នៅទីក្រុងអូស្លូឡើយ ! នេះជាមិនមែនជាលើកទីមួយទេ ចាប់ពីឆ្នាំ ១៩៣៥មក ដែលម្ចាស់ជ័យលាភីមិនអាចធ្វើដំណើរទៅទទួលរង្វាន់នៅទីក្រុងអូស្លូ។
ប្រទេសចិន ដែលបានចាត់ទុកការផ្តល់គោរមងារជាជ័យលាភីទៅឲ្យលោក លីវ ស៊ាវប៉ូ ថាជាសេចក្តីសម្រេចដ៏អាម៉ាស់មួយ បានបើកយុទ្ធនាការការទូត អំពាវនាវឲ្យប្រទេសនៅក្នុងលោកធ្វើពហិការមិនចូលរួមក្នុងពិធីប្រគល់ពានរង្វាន់ណូបែលសន្តិភាពនេះ។ សម្រាប់ក្រុងប៉េកាំង សហគមន៍អន្តរជាតិ បានច្រានចោលសេចក្តីសម្រេចរបស់គណៈកម្មាធិការណូបែលសន្តិភាពរួចទៅហើយ ព្រោះពេលនេះ មានប្រទេស និងអង្គការចំនួនជាង១០០ បានឆ្លើយតបជាវិជ្ជមាន និងបានសម្តែងការគាំទ្រចិនដោយជាក់លាក់។ នេះបើតាមអ្នកនាំពាក្យក្រសួងការបរទេសចិន។
ប៉ុន្តែ ការអះអាងរបស់ក្រុងប៉េកាំង បានធ្វើឲ្យគណៈកម្មាធិការណូបែលមានការភ្ញាក់ផ្អើលយ៉ាងខ្លាំង និងបញ្ចេញប្រតិកម្មភ្លាមមួយរំពេច។ តាមពិត គណៈកម្មាធិការ បានអញ្ជើញតំណាងការទូតចំនួនតែ៦៥ប្រទេស ដែលមានស្ថានទូតនៅទីក្រុងអូស្លូតែប៉ុណ្ណោះ។ ក្នុងចំណោមនោះ ៤៤ប្រទេសបានផ្តល់ចម្លើយវិជ្ជមាន ប្រទេសចិន និង១៨ប្រទេសផ្សេងទៀត (រុស្ស៊ី អៀរ៉ង់ គុយបា វេនេហ្ស៊ុយអេឡា កាហ្សាក់ស្តង់ កូឡុំប៊ី ទុយនេស៊ី អារ៉ាប៊ីសាអូឌីត ប៉ាគីស្តង់ អាហ្វហ្កានិស្តង់ សែប៊ី អៀរ៉ាក់ វៀតណាម ហ្វីលីព្វីន អេហ្ស៊ីប ស៊ូដង់ អ៊ុយក្រែន និងម៉ារ៉ុក) បដិសេធ និងប្រទេសចំនួនពីរ ៖ អាល់ហ្សេរី និងសេរីលង្កា គ្មានចម្លើយ។
សូមបញ្ជាក់ថា តាំងពីថ្ងៃប្រកាសផ្តល់រង្វាន់ណូបែលសន្តិភាពដល់ លោក លីវ ស៊ាវប៉ូ សកម្មជនសិទ្ធិមនុស្សប្រឆាំងនឹងរបបកុម្មុយនិស្តក្រុងប៉េកាំងមក ចិនតែងបានខិតខំឃោសនា និងព្រមានប្រទេសជាច្រើន ជាពិសេសសហភាពអឺរ៉ុប មិនឲ្យចូលរួមក្នុងពិធីប្រគល់ពានរង្វាន់ ព្រោះជាទង្វើប្រឆាំងនឹងតុលាការចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ