ដោយសាររឿងរង្វាន់ណូបែលសន្តិភាព ចិនលុបចោលកម្មវិធីជំនួបជាច្រើនជាមួយន័រវែស
កំហឹងរបស់ចិន នៅតែមិនទាន់ បាត់ ប៉ុន្មានថ្ងៃមកហើយបន្ទាប់ពី គណៈកម្មាធិការណូបែលន័រវែស បានសម្រេចផ្តល់រង្វាន់ណូបែលសន្តិភាពដល់លោក លីវ ស៊ាវប៊ូ(Liu Xiaobo)សកម្មជនការពារសិទ្ធមនុស្សដ៏សំខាន់នៅក្នុងប្រទេសចិន។ កាលពីថ្ងៃអង្គារម្សិលមិញ ចិន បានលុបចោលជំនួបថ្នាក់រដ្ឋមន្រ្តីមួយរវាងបណ្តាអ្នកទទួលខុសត្រូវចិននិងន័រវែស ដែលគ្រោងធ្វើនៅថ្ងៃពុធនេះ ក៏ព្រមទាំងសកម្មភាពវប្បធម៌មួយដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៊ែរណាដែត នុយ
ជំនួបគ្រោងទុកនៅថ្ងៃពុធទី ១៣ តុលានេះ-រវាងរដ្ឋមន្ត្រីក្រសួង នេសាទ ន័រវែសលោកស្រី Lisbeth Berg-Hansen ដែលកំពុងបំពេញទស្សនកិច្ចនៅប្រទេសចិន និងអនុរដ្ឋមន្រ្តីក្រសួងនេសាទចិននៅទីក្រុងប៉េកាំង ត្រូវបានអាជ្ញាធរចិនលុបចោលភ្លាមៗនៅក្នុងរយៈពេលតែប៉ុន្មាននាទីចុងក្រោយប៉ុណ្ណោះ។ វិធានការនេះ ក៏ជាប្រតិកម្មលើកទីមួយរបស់ចិនប្រឆាំង នឹងន័រវែសក្នុងការសំរេចផ្តល់រង្វាន់ណូបែលសន្តិភាពដល់សកម្មជនចិនដ៏ស្វិតស្វាញម្នាក់ដែលហ៊ានប្រឆាំងនឹងអាជ្ញាធរចិន។
មិនតែប៉ុណ្ណោះ អាជ្ញាធរចិន ក៏បានលុបចោលការសំដែងទស្សនិយភាពល្ខោនចំរៀងមួយដែររបស់ន័រវែស ដែលត្រូវរៀបចំឆាកដោយជ័យលាភីនៃការប្រឡងចំរៀងអឺរ៉ុប L’Eurovision ឆ្នាំ ២០០៩គឺលោក Alexander Rybak។ ម្យ៉ាងទៀត កាលពីថ្ងៃអង្គារម្សិលមិញនេះ អ្នកការទូតន័រវែសពីររូប ដែលប៉ុនប៉ងចង់ចូលទៅសួរសុខទុក្ខ ភរិយារបស់លោក លីវស៊ាវប៉ូ Lui Xiaobo ក៏ត្រូវបានអាជ្ញាធរចិន ដាក់របាំងពីមុខផ្ទះ មិនឲ្យចូលទៅជួបលោកស្រី Liu Xia ដែលត្រូវជាប់ឃុំឃាំងក្នុងលំនៅឋាននៅទីក្រុង ប៉េកាំង។
គួររំលឹកថា នៅថ្ងៃសុក្រមុននេះ គ្រាន់តែ គណៈកម្មាធិការណូបែលន័រវែសនេះ ប្រកាសជូនរង្វាន់ណូបែលសន្តិភាពនេះភ្លាម-អាជ្ញាធរចិន បានព្រមានន័រវែសភ្លាមៗដែរថា ជម្រើសនេះ អាចនឹងបំផ្លាញដល់ទំនាក់ទំនងរវាងចិននិងន័រវែស។ គួរបញ្ជាក់ថា ការដោះដូរសេដ្ឋកិច្ចរវាងចិននិងន័រវែស បានកើនឡើងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ យោងតាមតួលេខផ្លូវការន័រវែស -ការនាំទំនិញចេញរបស់ន័រវែសទៅកាន់ប្រទេសចិន ក្នុងរវាងឆ្នាំ២០០០និង២០០៩ បានកើនជិត ២០០០លានអឺរ៉ូ ចំណែកការនាំទំនិញចិនចូលមកកាន់ន័រវែសវិញ បានកើនរហូតដល់ ៣ ម៉ឺន២៦០០លានអឺរ៉ូ ក្នុងរយៈពេលដូចគ្នានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ