ក្រុមអ្នកបះបោរទទួលជំនួយហិរញ្ញវត្ថុពីអន្តរជាតិ
តំណាងប្រទេសអារ៉ាប អាហ្វ្រិក និងអង្គការអូតង់ ដែលបានបើកជំនួបកំពូល នៅទីក្រុង ដូហា ប្រទេសកាតា ស្តីពីប្រទេសលីប៊ី នាថ្ងៃពុធទី ១៣មេសា ម្សិលមិញ បានយល់ព្រមព្រៀងគ្នា ផ្តល់ជំនួយមនុស្សធម៌ និងហិរញ្ញវត្ថុដល់ពួកអ្នកបះបោរលីប៊ី។ យន្តការបណ្តោះអាសន្នមួយនឹងត្រូវរៀបចំឡើង។ ក្រុមប្រឹក្សាជាតិអន្តរកាល បានស្វាគមយ៉ាងខ្លាំងចំពោះសេចក្តីសម្រេចចិត្តនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ជំនួបកំពូលនៅទីក្រុង ដូហា ប្រទេសកាតា បានផ្តល់កម្លាំងឡើងវិញដល់ក្រុមអ្នកបះបោរប្រឆាំងនឹងរបបលោកកាដាហ្វ៊ី។ នេះបើយោងតាមអ្នកនាំពាក្យក្រុមប្រឹក្សាជាតិអន្តរកាលលីប៊ី ដែលម្សិលមិញ ស្នើសុំឲ្យអន្តរជាតិបន្ថែមអន្តរាគមន៍យោធា។
ជាមួយនឹងការទាមទារឲ្យលោក កាដាហ្វ៊ី ចុះចេញពីតំណែង ក្រុមប្រទេសដែលចូលរួមដោះស្រាយវិបត្តិនៅលីប៊ី បានថែមទាំងយល់ព្រមឆ្លើយតបជាវិជ្ជមាននឹងសេចក្តីត្រូវការដ៏ទទូចរបស់ក្រុមប្រឹក្សាជាតិបណ្តោះអាសន្ន បង្កើតឡើងដោយក្រុមអ្នកបះបោរ នៅប៊ិនហ្កាហ្ស៊ី (Benghazi)។ ដោយហេតុផលនេះ ទើបក្រុមអ្នកបះបោរបដិសេធមិនទទួលយកផែនទីចង្អុលផ្លូវរបស់សហភាពអាហ្វ្រិក។
ជំនួយហិរញ្ញវត្ថុ តាមរយៈការបង្កើតឲ្យមានយន្តការហិរញ្ញវត្ថុបណ្តោះអាសន្នមួយ នឹងត្រូវផ្តល់ជូនក្រុមអ្នកបះបោរធ្វើបដិវត្តប្រឆាំងនឹងរបបផ្តាច់ការ លោក កាដាហ្វ៊ី ដែលមានក្រុមប្រឹក្សាជាតិអន្តរកាលជាតំណាង។ តែគេនៅមិនទាន់ដឹងច្បាស់ អំពីបែបបទនៃមូលនិធិនោះនៅឡើយទេ។
ក្រុមប្រឹក្សាជាតិអន្តរកាល សង្ឃឹមថានឹងអាចទទួលបានកញ្ចប់ប្រាក់ (១០០ពាន់លានដុល្លារ) ដែលសហគមន៍អន្តរជាតិផ្អាប់ទុក ជាងមួយខែមកហើយ ក្នុងក្របខ័ណ្ឌដាក់ទណ្ឌកម្មប្រឆាំងនឹងរដ្ឋាភិបាលលោកកាដាហ្វ៊ី មកចាត់ចែងប្រើប្រាស់។
ក្រុមប្រទេសអ្នកចូលរួមដោះស្រាយវិបត្តិនៅលីប៊ី យល់ច្បាស់ណាស់អំពីភាពចាំបាច់ ដែលក្រុមអ្នកបះបោរត្រូវមានលទ្ធភាពការពារខ្លួន ប៉ុន្តែគំនិតផ្តួចផ្តើមចង់ផ្តល់ ឬបំពាក់អាវុធ ឲ្យក្រុមប្រឆាំងនេះ មិនទទួលបានការគាំទ្រជាឯកច្ឆ័ន្ទទេ។ សហរដ្ឋអាមេរិក និងអង់គ្លេស ក៏មិនបានទទួលស្គាល់ក្រុមប្រឹក្សាជាតិអន្តរកាលជាផ្លូវការដែរ។
ប៉ុន្តែទោះជាយ៉ាងដូច្នេះក្តី ក៏គេអាចចាត់ទុកថាជំនួបប្រជុំនៅទីក្រុងដូហា ម្សិលមិញ បានបិទបញ្ចប់ទៅជាមួយនឹងការគាំទ្រច្បាស់លាស់ និងបានបណ្តុះសេចក្តីសង្ឃឹមឡើងវិញថាសហគមន៍អន្តរជាតិមិនបោះបង់ក្រុមអ្នកបះបោរនៅលីប៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ