អូតង់ បាញ់ច្រឡំ នៅលីប៊ី
ក្រុមអ្នកបះបោរលីប៊ី ៩នាក់ និងជនស៊ីវិល៤នាក់ បានស្លាប់ ក្នុងការវាយប្រហារតាមផ្លូវអាកាសរបស់កងកម្លាំងសម្ព័ន្ធមិត្ត អូតង់ នៅល្ងាចថ្ងៃសៅរ៍ទី ២មេសា ម្សិលមិញ។ អូតង់ ដែលបានបើកយុទ្ធនាការទម្លាក់គ្រាប់បែក ជួយក្រុមបះបោរលីប៊ី នៅតំបន់ជិតមជ្ឈមណ្ឌលប្រេងកាត ប្រេហ្កា តែបែរជាខុស មកសម្លាប់គ្នាឯងទៅវិញ។ បើសិនពិតជាកំហុសរបស់កងកម្លាំងអូតង់មែន គេអាចនឹងត្រូវសើរើឡើងវិញអំពីយុទ្ធសាស្ត្របច្ចុប្បន្ន របស់អូតង់ នៅលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
នៅទីបញ្ជាការអង្គការអូតង់ គេកំពុងតែសាកល្បង ផ្តុំបង្កបង្កើតឡើងវិញ ឲ្យបានលម្អិតនិងប្រាកដប្រជា អំពីយុទ្ធនាការទម្លាក់គ្រាប់បែកលើតំបន់ភាគខាងកើតក្រុងប្រេហ្កា ដែលមានការប្រយុទ្ធគ្នាយ៉ាងពុះកញ្ជ្រោលខ្លាំង រវាងកងកម្លាំងទ័ពរបស់លោក កាដាហ្វ៊ី និងកងកម្លាំងអ្នកបះបោរ នៅថ្ងៃសៅរ៍ម្សិលមិញ។ មានសម្មតិកម្មពីរ ដែលជំរុញឲ្យមានការបាញ់ខុស មកសម្លាប់អ្នកដែលខ្លួនត្រូវការពារនោះ។
ទីមួយ គឺអាចបណ្តាលមកពីក្រុមទ័ពស្ម័គ្រនឹងបុរសខ្លាំងលីប៊ី លោក កាដាហ្វ៊ី ជ្រៀតចូលបន្លំក្នុងក្បួនរបស់កងកម្លាំងអ្នកបះបោរ ហើយធ្វើការបាញ់រះ និងបាញ់កាំភ្លើងធុនធ្ងន់ សម្លាប់មនុស្ស ទើបអូតង់ទម្លាក់គ្រាប់បែកជួយ។ ក្នុងករណីនេះ អូតង់មិនខុសទេ ហើយក៏មិនអាចធ្វើអ្វីបានលើសពីនេះដែរ។
សម្មតិកម្មទីពីរ ដែលទំនងជាសមស្របជាងនោះ គឺបណ្តាលមកពីក្រុមអ្នកបះបោរខ្លួនឯងតែម្តង។ ពួកអ្នកបះបោរដែលរីករាយនឹងជ័យជំនះរបស់ខ្លួន នាំគ្នាបាញ់កាំភ្លើងឡើងលើ ជាហេតុធ្វើឲ្យកងទ័ពសម្ព័ន្ធមិត្តដែលកំពុងបំពេញការងារល្បាតហោះហើរលើអាកាស យល់ច្រឡំថាខ្លួនជាផ្ទាំងស៊ីបរបស់ពួកទាហានកាដាហ្វ៊ី ទើបចុចទម្លាក់គ្រាប់បែក។ ពេលយប់ដូច្នេះ ងាយនឹងនាំដល់ការភ័ន្តច្រឡំណាស់។ ប្រសិនបើសេចក្តីសន្និដ្ឋាននេះ បានទទួលការផ្ទៀងផ្ទាត់ត្រឹមត្រូវ នេះជាកំហុសនៃការដែលគ្មានបទពិសោធន៍ក្នុងសមរភូមិរបស់ក្រុមអ្នកបះបោរ។
ពេលនេះ អូតង់ កំពុងតែត្រួតពិនិត្យឡើងវិញ ធ្វើសេចក្តីរាយការណ៍អំពីចំនួនយន្តហោះចម្បាំង ដែលទទួលខុសត្រូវទម្លាក់គ្រាប់បែកលើជំរំ និងក្រុមទាហានស្ម័គ្រនឹងលោក កាដាហ្វ៊ី។ ហើយគេក៏នឹងអាចចាក់មើលខ្សែអាត់វីដេអូ ដែលយន្តហោះនីមួយៗថតបាន ពេលខ្លួនហោះហើរធ្វើល្បាត និងយុទ្ធនាការលើផ្ទៃអាកាសលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ