របបទ្រីប៉ូលីស្នើលើកលែងទោសឱ្យពួកឩទ្ទាមនៅមីស្រាតា ប៉ុន្តែការប្រយុទ្ធចេះ តែបន្តទៅទៀត
របបទ្រីប៉ូលីនៅល្ងាចថ្ងៃសុក្រម្សិលមិញ២៩មេសាបានស្នើលើកលែងទោស ឱ្យពួកឩទ្ទាមនៅទីក្រុងកំពង់ផែមីស្រាតា ដោយសុំឱ្យពួកគេទម្លាក់អាវុធមុនថ្ងៃ៣ឩសភា។ ប៉ុន្តែ ការវាយលុកចេះតែបន្តទៅទៀត ហើយការកាន់កាប់មីស្រាតាជាទ្វារសំរាប់នាំចូលជំនួយមនុស្សធម៌ទៅឱ្យ បណ្តាជននិងកងកម្លាំងឩទ្ទាមមានសារៈសំខាន់ណាស់សំរាប់ភាគីបដិបក្ខ ក្នុងអធិករណ៍។ នៅព្រឹកថ្ងៃសៅរ៍នេះ នៅក្នុងសង្កថាតាមទូរទស្សន៍ មេដឹកនាំលីប៊ីបានអះអាងជាថ្មីថា គាត់នឹងពុំចាកចេញពីប្រទេសគាត់ទេ ហើយអំពាវនាវឱ្យចរចាជាមួយអូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ដើម្បីបានទទួលការលើកលែងទោសនេះ ពួកឧទ្ទាមនៅប៉ែកខាងលិចដែលប្រយុទ្ធតស៊ូនៅមីស្រាតា ជិតពីរខែមកហើយ ត្រូវតែចូលប្រគល់ខ្លួន និងទម្លាក់អាវុធ។ នេះគឺជាការអះអាងរបស់អ្នកនាំពាក្យនៃរដ្ឋាភិបាល លោក មូស្សា អ៊ីប្រាហ៊ីម ដែលចាត់ទុកជាការជូនដំណឹងរបស់ក្រសួងមហាផ្ទៃ។
សំណើនេះ មានរយៈពេលរហូតដល់ថ្ងៃទី ៣ឧសភា ហើយរបបលីប៊ីសន្យាថា ពួកអ្នកដែលស្តាយកំហុសខ្លួនអាចនឹងចាកចេញពីទីក្រុងទៅដោយសេរី នៅខណៈដដែលនេះ ការវាយតបតវិញរបស់កងទ័ពកំពុងតែប្រព្រឹត្តទៅ។
មុននេះបន្តិចអាជ្ញាធរលីប៊ីបានប្រកាសថា កងកម្លាំងភក្តីនឹងលោក កាដាហ្វី បានធ្វើឲ្យឋបនភណ្ឌនៅកំពង់ផែខូចប្រើប្រាស់លែងកើត និងបានព្រមានប្រាប់ថា គ្រប់តែនាវាដែលប៉ុនប៉ងបើកចូលកំពង់ផែនឹងត្រូវចាត់ទុកជានាវាខ្មាំងសត្រូវ និងត្រូវវាយប្រហារ។
លោក ឧត្តមសេនីយ Rob Weighill ដែលជានាយកប្រតិបត្តិការនៅលីប៊ី សម្រាប់អូតង់ បានប្រកាសនៅឱកាសសន្និសីទសារព័ត៌មាននៅទីក្រុង Naples ម្សិលមិញថា នាវារបស់គាត់បានកំចាត់គ្រាប់មីនដាក់ដោយកងកម្លាំងទ័ពរបស់លោក កាដាហ្វី នៅកំពង់ផែមីស្រាតា ថា ៖
“នាវារបស់យើងបានស្ទាក់ស្កាត់ចាប់បានកប៉ាល់តូចៗដែលដាក់គ្រាប់មីនអណ្តែតនៅច្រកចេញពីកំពង់ផែ ហើយយើងបានបំផ្លាញចោល គ្រាប់មីនដែលយើងបានរកឃើញ។ ការនេះជាតឹកតាងថ្មីបង្ហាញថារបបមេដឹកនាំ កាដាហ្វីធ្វើពុំដឹងពុំឮនីតិអន្តរជាតិ និងប៉ុនប៉ងធ្វើឲ្យរាំងស្ទះដល់ការបញ្ជូនជំនួយមនុស្សធម៌។”
របបទ្រីប៉ូលី ប្រាថ្នាចង់ឲ្យជំនួយត្រូវដឹកតាមជើងគោក ប៉ុន្តែជាការពិបាកជាង ដោយហេតុគ្មានការឈប់បាញ់គ្នា។ នៅទីបំផុតទៅរដ្ឋាភិបាលលីប៊ីទំនងជាប៉ុនប៉ងធ្វើរាល់អ្វីៗ ដើម្បីក្តាប់សភាពការណ៍បានតែសំបកក្រៅ នៅពេលដែលកងកម្លាំងរបស់លោកកាដាហ្វីទំនងជាបាត់បង់ភាពមានប្រៀប តាំងពីយូរមកហើយ នៅមីស្រាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ