អាមេរិកបញ្ជូនយន្តហោះចម្បាំងDrone ទៅលីប៊ី
ប្រធានាធិបតីអាមេរិកាំង លោកបារ៉ាក់ អូបាម៉ាបានបើកភ្លើងខៀវឲ្យគេប្រើយន្តហោះDrone ដែលគ្មានមនុស្សបើក ក្នុងប្រតិបត្តិការយោធារបស់អាមេរិក នៅក្នុងប្រទេសលីប៊ី។ រដ្ឋមន្រ្តីការពារជាតិអាមេរិក លោកRobert Gates បានបញ្ជាក់ព័ត៌មាននេះ នៅថ្ងៃព្រហស្បតិ៍ទី ២១ មេសា ២០១១ ដោយថា យន្តហោះDrone ពីរត្រូវបានបញ្ជូនទៅលីប៊ី ប៉ុន្តែវាបានត្រលប់មកវិញ ដោយសារបញ្ហាអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៥
អាមេរិកធ្លាប់បាននិយាយដកខ្លួនចេញពីសង្រ្គាមនៅលីប៊ី និងបានផ្ទេរភារកិច្ចយោធានៅលីប៊ីទៅ ឲ្យអង្គការអូតង់ទាំងស្រុង។ ប៉ុន្តែ រដ្ឋាភិបាលអាមេរិករបស់លោកបារ៉ាក់ អូបាម៉ា បានដូរចិត្ត និងបានត្រលប់មកចូលរួមជាមួយអង្គការអូតង់ ព្រោះឃើញថា អូតង់លែងមានសមត្ថភាពវាយប្រហារពីលើអាកាសទៅលើកម្លាំងទ័ពរបស់លោក កាដាហ្វ៊ីដែលកំពុងលាក់ខ្លួនក្នុងទីប្រជុំជនទៀតហើយ។
មួយវិញទៀត ការដែលលោកបារ៉ាក់ អូបាម៉ា បញ្ជាឲ្យមន្ទីរបញ្ចកោនអាមេរិកប្រើយន្តហោះDrone លើកនេះ ក៏ដោយសារលោកCameron រដ្ឋមន្រ្តីអង់គ្លេសបានស្នើសុំឲ្យអាមេរិកចូលរួមកាន់តែខ្លាំងដើម្បី ដាក់សម្ពាធទៅលើលោកកាដាហ្វ៊ី។ នៅក្នុងសប្តាហ៍នេះ អង់គ្លេស បារាំង និងអ៊ីតាលីបានប្រកាសបញ្ជូនមន្រ្តីជំនាញយោធាទៅជួយគាំទ្រផ្នែកបច្ចេកទេសដល់ ក្រុមប្រឆាំងលីប៊ី។
លោកRobert Gates រដ្ឋមន្រ្តីក្រសួងការពារជាតិវិញ អះអាងថា អាមេរិកបដិសេធមិនប្រើកម្លាំងទ័ពថ្មើរជើងក្នុងប្រទេសលីប៊ីទេ។ យន្តហោះ Droneគឺជាការចូលរួមពិសេសតែមួយគត់របស់អាមេរិក ក្នុងប្រតិបត្តិការយោធារបស់អូតង់។ យន្តហោះ Drone នឹងអាចកាត់បន្ថយកម្លាំងយោធារបស់លោកកាដាហ្វ៊ីបានច្រើន។ កន្លងមក យន្តហោះ ចម្បាំងគ្មានមនុស្សបើកបាន ត្រូវបានអាមេរិកប្រើច្រើនក្នុងសង្រ្គាមប្រយុទ្ធប្រឆាំងនឹង ពួកតាលីបង់ នៅអាហ្វហ្កានីស្ថាន និងពួកភេរវជនអ៊ីស្លាមជ្រុលនិយមរបស់បណ្តាញអាល់កៃដា។
យន្តហោះ Droneអាចហោះ ក្នុងកំពស់ទាប ជាងយន្តហោះចម្បាំងធម្មតា និងអាចចូលទៅដល់កន្លែងណាដែលយន្តហោះចម្បាំងធុនធំ មិនអាចចូលដល់បាន។ ក្នុងប្រទេសប៉ាគីស្ថាន ដោយសារយន្តហោះ Drone អាមេរិកអាចបំផ្លាញសម្បុករបស់ពួកឧទ្ទាម តាលីបង់ ដែលលាក់ខ្លួន ក្នុងតំបន់កុលសម្ព័ន្ធភ្នំ ដែលទាហានថ្មើរជើងអាមេរិកមិនអាចចូលទៅដល់។
នៅលីប៊ី អាមេរិកសង្ឃឹមថា យន្តហោះ Drone ដែលបញ្ជាចេញតាំងពីអាមេរិក នឹងអាចហោះចូលទៅបាញ់គ្រាប់មីស៊ីលំ បំផ្លាញទីតាំងលាក់ខ្លួនរបស់ទាហានកាដាហ្វ៊ី ក្នុងទីក្រុង ជាពិសេសទីក្រុងមីស្ត្រាតា។ យន្តហោះ Drone នេះនឹងបើកប្រតិបត្តិការ ២៤ម៉ោង លើ២៤ម៉ោងនៅលើទីតាំងដែលកំពុងមានការប្រយុទ្ធគ្នាខ្លាំងរវាងទ័ព កាដាហ្វ៊ីនឹងក្រុមប្រឆាំង។ ក្រុមប្រឆាំងលីប៊ីស្វាគមបេសកកម្មរបស់យន្តហោះ Drone ដែលគេជឿជាក់ថា នឹងអាចការពារជនស៊ីវិលពីការសម្លាប់របស់ទាហានកាដាហ្វ៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ