លីប៊ី៖ ការវាយប្រយុទ្ធគ្នានៅតែកើតមាននៅទីក្រុងមីស្រាតា ក្រោយពីរដ្ឋាភិបាលប្រកាសដកថយ
នៅព្រឹកថ្ងៃអាទិត្យនេះ ការវាយប្រយុទ្ធគ្នានៅតែបន្តកើតមាន នៅក្នុងទីក្រុងមីស្រាតា (Misrata) ក្រោយពីរដ្ឋាភិបាលលោកកាដាហ្វ៊ីប្រកាសដកថយ កាលពីយប់ថ្ងៃសុក្រ។ កាលពីយប់ថ្ងៃសៅរ៍នេះ យន្តហោះរបស់អូតង់បានធ្វើការវាយប្រហារជាថ្មីទៀត ទៅលើទីតាំងមួយចំនួន នៅក្នុងរដ្ឋធានីទ្រីប៉ូលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
កាលពីថ្ងៃសៅរ៍ ម្សិលមិញនេះ កងកម្លាំងបដិវត្តន៍លីប៊ីបានចូលកាន់កាប់ទីក្រុងមីស្រាតាទាំងស្រុង ក្រោយពីកងទ័ពរបស់លោកកាដាហ្វ៊ីបានដកថយ។ ក៏ប៉ុន្តែ រហូតមកទល់ពេលនេះ ទាហានរបស់លោកកាដាហ្វ៊ីនៅតែបន្តធ្វើការបាញ់ផ្លោងចូលក្នុងទីក្រុងមីស្រាតាដដែល។
កាលពីថ្ងៃសៅរ៍ ម្សិលមិញនេះ ការវាយប្រយុទ្ធគ្នានៅមីស្រាតាបានបណ្តាលឲ្យមនុស្ស ២៨នាក់បាត់បង់ជីវិត។ អ្នកកាសែតជនជាតិបារាំងម្នាក់បានរងរបួស។ នៅព្រឹកព្រលឹមថ្ងៃអាទិត្យនេះ ការវាយប្រយុទ្ធគ្នានៅតែបន្តកើតមាន នៅទីក្រុងមីស្រាតា។
នៅល្ងាចថ្ងៃសៅរ៍ យន្តហោះគ្មានមនុស្សបើករបស់អាមេរិក (ដែលគេហៅតាមភាសាអង់គ្លេសថា Drone) បានធ្វើការវាយប្រហារជាលើកដំបូងទៅលើកងទ័ពរបស់លោកកាដាហ្វ៊ី។ យោងតាមក្រសួងការពារជាតិអាមេរិក Drone របស់អាមេរិកបានកម្ទេចកាំជ្រួចហ្វូងមួយគ្រឿងរបស់លោកកាដាហ្វ៊ី ដែលដាក់នៅក្បែរទីក្រុងមីស្រាតា។ នៅឯរដ្ឋធានីទ្រីប៉ូលីឯណោះវិញ យន្តហោះរបស់អូតង់បានធ្វើការវាយប្រហារសាជាថ្មីទៀត បន្ទាប់ពីបានទម្លាក់គ្រាប់បែកលើទីបញ្ជាការរបស់លោកកាដាហ្វ៊ី កាលពីយប់ថ្ងៃសុក្រ។
គួរបញ្ជាក់ថា រដ្ឋាភិបាលរបស់លោកកាដាហ្វ៊ីបានប្រកាសដកថយចេញពីមីស្រាតា កាលពីថ្ងៃសុក្រ។ ក៏ប៉ុន្តែ នៅយប់ថ្ងៃសៅរ៍ម្សិលមិញនេះ អនុរដ្ឋមន្រ្តីការបរទេសលីប៊ីបានប្រកាសថា រដ្ឋាភិបាលមិនបានបោះបង់ចោលទីក្រុងមីស្រាតានោះទេ។ កងកម្លាំងរដ្ឋាភិបាលគ្រាន់តែផ្អាកប្រតិបត្តិការយោធាជាបណ្តោះអាសន្នប៉ុណ្ណោះ ដើម្បីទុកពេលឲ្យមេដឹកនាំកុលសម្ព័ន្ធ ធ្វើការចរចារកដំណោះស្រាយសន្តិភាព។ ប្រសិនបើក្នុងរយៈពេល ៤៨ម៉ោង ការចរចានេះមិនអាចរកដំណោះស្រាយបានទេ ប្រតិបត្តិការយោធានៅមីស្រាតានឹងចាប់ផ្តើមឡើងវិញ ហើយប្រតិបត្តិការថ្មីនេះ នឹងធ្វើឡើងដោយកងកម្លាំងកុលសម្ព័ន្ធ។
នៅថ្ងៃអាទិត្យនេះ កងកម្លាំងបដិវត្តន៍លីប៊ីបានឲ្យដឹងថា កងកម្លាំងប្រដាប់អាវុធនៃកុលសម្ព័ន្ធស្និទ្ធិនឹងលោកកាដាហ្វ៊ីត្រូវបានបញ្ជូនមកដល់មីស្រាតាហើយ។ កងកម្លាំងកុលសម្ព័ន្ធទាំងនោះមិនពាក់ឯកសណ្ឋានជាកងទ័ពលីប៊ីទេ គឺស្លៀកពាក់ជាជនស៊ីវិលធម្មតា។ នេះទំនងជាយុទ្ធសាស្រ្តថ្មីរបស់លោកកាដាហ្វ៊ី ដើម្បីគេចពីការវាយប្រហារពីសំណាក់យន្តហោះរបស់អូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ