ឥណទានធនាគារកណ្តាលអឺរ៉ុបទំនងជាមិនអាចជួយបន្ធូរបន្ថយវិបត្តិបំណុលបានទេ
កាលពីថ្ងៃពុធ ម្សិលមិញនេះ ធនាគារកណ្តាលអឺរ៉ុបបានបញ្ចេញទឹកប្រាក់រហូតដល់ទៅជិត ៥០០ពាន់លានអឺរ៉ូ ដើម្បីផ្តល់ជាឥណទានដល់ធនាគារឯកជននៅអឺរ៉ុប។ នេះគឺជាចំនួនទឹកប្រាក់ដ៏ច្រើនសន្ធឹកសន្ធាប់ ដែលគេមិនធ្លាប់ឃើញធនាគារកណ្តាលអឺរ៉ុបឲ្យធនាគារឯកជនខ្ចី។ ចំនួនទឹកប្រាក់ គឺច្រើនសន្ធឹកសន្ធាប់មែន ក៏ប៉ុន្តែ វាទំនងជាមិនអាចជួយបន្ធូរបន្ថយវិបត្តិបំណុលអឺរ៉ុបបាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
គិតជាសរុប មានធនាគារឯកជនរហូតដល់ទៅជាង ៥០០ ដែលបាននាំគ្នាពពាក់ពពូនទៅខ្ចីលុយធនាគារកណ្តាលអឺរ៉ុប កាលពីម្សិលមិញ។ ប្រាក់កម្ចីដែលមានចំនួនរហូតដល់ទៅជាង ៤៨៩ពាន់លានអឺរ៉ូ ហើយដែលមានអត្រាការប្រាក់ទាបបំផុត ពោលគឺ តែ ១% ប៉ុណ្ណោះ សម្រាប់រយៈពេល ៣ឆ្នាំ។
ជាផ្លូវការ គោលដៅរបស់ធនាគារកណ្តាលអឺរ៉ុប គឺដើម្បីទប់ស្កាត់ការជាប់គាំងនៃចរន្តឥណទានឯកជន ព្រោះថា ក្នុងពេលដែលអឺរ៉ុបកំពុងជាប់ផុងក្នុងវិបត្តិបំណុល ធនាគារឯកជននាំគ្នាត្បិតត្បៀតឥណទាន។ ត្បិតត្បៀតទាំងកម្ចីទៅឲ្យធនាគារឯកជនគ្នាឯង និងទាំងកម្ចីទៅឲ្យក្រុមហ៊ុន។
អ្នកដែលមានសុទិដ្ឋិនិយមយល់ថា វិធានការរបស់ធនាគារកណ្តាលអឺរ៉ុប កាលពីថ្ងៃពុធ ម្សិលមិញនេះ ក៏អាចនឹងជួយបន្ធូរបន្ថយវិបត្តិបំណុលរបស់អឺរ៉ុបបានដែរ ពីព្រោះ គេរំពឹងថា ធនាគារឯកជននឹងយកប្រាក់កម្ចីរបស់ធនាគារកណ្តាលអឺរ៉ុបមួយផ្នែក ទៅទិញមូលបត្របំណុលរបស់ប្រទេសដែលកំពុងជួបនឹងវិបត្តិបំណុល។
គួរបញ្ជាក់ថា ជាយូរណាស់មកហើយ ដែលគេទទូចចង់ឃើញធនាគារកណ្តាលអឺរ៉ុបបញ្ចេញលុយមកទិញមូលបត្របំណុលរបស់រដ្ឋជាសមាជិក ដើម្បីទប់កុំឲ្យអត្រាការប្រាក់បំណុលរបស់ប្រទេសទាំងនេះកើនឡើងខ្ពស់ហួសហេតុពេក។ ក៏ប៉ុន្តែ ធនាគារកណ្តាលអឺរ៉ុបតែងតែបដិសេធមិនព្រមធ្វើ ដោយសារតែមានប្រទេសមួយចំនួនជំទាស់ ជាពិសេស អាល្លឺម៉ង់។
ទីបំផុតទៅ ធនាគារកណ្តាលអឺរ៉ុបសុខចិត្តបញ្ចេញលុយមកទិញមូលបត្របំណុលរបស់រដ្ឋជាសមាជិក គ្រាន់តែមិនធ្វើដោយខ្លួនឯង គឺឲ្យធនាគារឯកជនទិញជំនួស។ ធនាគារឯកជនខ្ចីលុយពីធនាគារកណ្តាលអឺរ៉ុប ក្នុងអត្រាការប្រាក់ ១%។ ពួកគេអាចយកលុយនេះទៅឲ្យអ៊ីតាលី អេស្ប៉ាញ ឬព័រទុយហ្កាល់ខ្ចីបន្ត ដើម្បីយកចំណេញ ព្រោះអត្រាការប្រាក់បំណុលរបស់ប្រទេសទាំងនេះមានរហូតដល់ទៅ ៥% ឬ៦%។
ក៏ប៉ុន្តែ បើគេពិនិត្យឲ្យបានហ្មត់ចត់ទៅ គេមិនរំពឹងថា ធនាគារឯកជននឹងយកប្រាក់កម្ចីពីធនាគារកណ្តាលអឺរ៉ុប ទៅវិនិយោគបន្តលើមូលបត្របំណុលរបស់ប្រទេសកំពុងជាប់វិបត្តិបំណុលនោះទេ ពីព្រោះថា ម្យ៉ាង ពួកគេកំពុងតែត្រូវការសាច់ប្រាក់ច្រើន។ ដូច្នេះ ប្រាក់កម្ចីដែលបានមកពីធនាគារកណ្តាលអឺរ៉ុប ពួកគេនឹងយកមួយផ្នែកធំ ដើម្បីទុកប្រើប្រាស់ខ្លួនឯង។
ម្យ៉ាងទៀត ការវិនិយោគលើមូលបត្របំណុលរបស់ប្រទេស ដែលកំពុងជួបនឹងវិបត្តិបំណុល ដូចជា អ៊ីតាលី អេស្ប៉ាញ និងព័រទុយហ្កាល់ ជាដើម ថ្វីដ្បិតតែអាចទទួលបានផលចំណេញច្រើន ក៏ប៉ុន្តែ ជាការវិនិយោគដែលមានហានិភ័យខ្ពស់ ដែលធនាគារឯកជនកំពុងតែនាំគ្នាចៀសវាងគ្រប់ៗគ្នា។ ក្រោយពីមានការខាតបង់យ៉ាងច្រើនលើបំណុលក្រិក ដោយសារតែត្រូវកាត់បន្ថយបំណុលមួយផ្នែកធំនោះ តើមានធនាគារឯកជនប៉ុន្មាន ដែលហ៊ានប្រថុយប្រថានវិនិយោគលើបំណុលរបស់អ៊ីតាលី អេស្ប៉ាញ ឬព័រទុយហ្កាល់?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ