ក្រុមប្រឆាំង​អេហ្ស៊ីប​ធ្វើ​បាតុកម្ម​ប្រឆាំង​នឹង​លទ្ឋផល​នៃ​ការ​បោះឆ្នោត​

លទ្ឋផលនៃការបោះឆ្នោតប្រជាមតិ លើកទីមួយ ដែលផ្តល់ជោគជ័យ ដល់គណបក្សកាន់អំណាចរបស់ ប្រធានាធិបតីមរស៊ី មិនអាចធ្វើអោយគណបក្សប្រឆាំង ចុះចេញពីរាជបល្ល័ង្ក របស់ខ្លួននោះឡើយ។ នៅរសៀលថ្ងៃអង្គារនេះ ក្រុមប្រឆាំងអេហ្ស៊ីបនឹងធ្វើបាតុកម្មជាថ្មីម្តងទៀត ដើម្បីប្រឆាំងនឹងលទ្ឋផលនៃការបោះឆ្នោតនេះ។

ជុំវិញរឿងនេះ គណបក្ស រណសិរ្សស្រោចស្រង់ជាតិ អេហ្ស៊ីប (FSN) ដែលប្រមូលផ្តុំទៅដោយ គណបក្សប្រឆាំងសំខាន់ៗ នៅអេហ្ស៊ីប បានធើ្វការឆ្លើយឆ្លងគ្នា ទៅវិញទៅមក យ៉ាងស្អិតរមួត ជាមួយនិងប្រធានាធិបតីមរស៊ី។

ក្រុមប្រឆាំងអេហ្ស៊ីប យល់ថា គំរោងធម្មនុញ្ញនឹងអាចអនុម័តទៅបាន លុះត្រាតែលទ្ឋផល ការបោះឆ្នោត លើកទីពីរនៅចុងសប្តាហ៍នេះ ផ្តល់នូវជោគជ័យច្រើនលើសលុប។ លោកមរស៊ីតបទៅវិញថា ត្រឹមតែ ៥០ភាគរយ គឺអាចអនុម័ត គំរោងធម្មនុញ្ញបានហើយ។

ក្រុមប្រឆាំងអេហ្ស៊ីប បានបន្តចោទថាដំណើរការបោះឆ្នោតប្រជាមតិ លើកទីមួយនេះ មានភាពមិនប្រក្រតី និងមានការបន្លំច្រើនអនេក ហើយបានទាមទារ អោយមានការស៊ើបអង្កេត លើអំពើរំលោភបំពាន របស់ក្រុមប្រធានាធិបតី មកលើអ្នកកាសែតនានា។ ក្រុមប្រធានាធិបតីតបថា អ្នកសារព័ត៌មានបាន ធ្វើការបង្ខូចកេរ្តិ៍ឈ្មោះលោកមរស៊ី។

នៅថ្ងៃបោះឆ្នោតប្រជាមតិលើកទីមួយកាលពីថ្ងៃសៅរ៍មុន អង្គការក្រៅរដ្ឋាភិបាល និងអ្នកសង្កេតការនានា បានរាយការណ៍ អំពីភាពមិនប្រក្រតីនៅតាមទីស្នាក់ការបោះឆ្នោតជាច្រើន។ លើសពីនេះ វត្តមាននៃក្រុមចៅក្រម ចូលរួមសង្កេតការបោះឆ្នោត នៅមិនទាន់មានភាពពេញលេញល្អ ។ គេឃើញមានការប្តឹងផ្តល់ រហូតដល់ទៅ ប្រាំពីរពាន់បណ្តឹង ប៉ុន្តែ អជ្ញាធរបោះឆ្នោត មិនព្រមធ្វើការពិនិត្យករណីបណ្តឹងទាំងអស់នេះឡើយ ព្រោះយល់ថា ដំណើរការបោះឆ្នោតកាលពីថ្ងៃសៅរ៍កន្លងទៅ មានលក្ខណៈគំរូល្អ៕