ការបោះឆ្នោតប្រជាមតិៈ គណបក្ស សេរីភាពនិងយុត្តិធម៌របស់ប្រធានាធិបតីមរស៊ីទទួលជោគជ័យ
នៅប្រទេសអេហ្ស៊ីប កាលពីថ្ងៃអាទិត្យម្សិលមិញ គណបក្ស សេរីភាពនិងយុត្តិធម៌របស់ប្រធានាធិបតីអ៊ីស្លាម មរស៊ី បានទទួលជោគជ័យ ក្នុងការបោះឆ្នោតប្រជាមតិលើកទីមួយ ដោយទទួលសម្លេងឆ្នោត បានជាង 56 ភាគរយ។ ប៉ុន្តែ លោកមរស៊ី ត្រូវរង់ចាំលទ្ឋផលនៃការបោះឆ្នោត លើកទីពីរ នៅថ្ងៃសៅរ៍ចុងសបា្តហ៏នេះ ដើម្បីសំរេចអនុម័ត គំរោងធម្មនុញ្ញថ្មី របស់ខ្លួន។ ដោយឡែក គណបក្សប្រឆាំង មិនទទួលស្គាល់ លទ្ឋផលបោះ ឆ្នោតកាលពីម្សិលមិញនេះទេ ហើយបានអំពាវនាវអោយ ប្រជាជនធ្វើបាតុកម្ម សារជាថ្មីទូទាំងប្រទេស នៅថ្ងៃអង្គារស្អែកនេះ ដើម្បីប្រឆាំងនឹងគំរោងធម្មនុញ្ញរបស់គណបក្សកាន់អំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
កាលពីថ្ងៃអាទិត្យម្សិលមិញ ការបោះឆ្នោតប្រជាមតិលើកទីមួយនៅអេហ្ស៊ីប បានផ្តល់ជោគជ័យដល់ គណបក្សកាន់អំណាច របស់ប្រធានាធិបតី មរស៊ី ជាមួយនឹងសម្លេងឆ្នោត 56,5ភាគរយ។ លទ្ឋផល នេះ ទទួលបានមកពី ទីស្នាក់ការបោះឆ្នោត 99 ភាគរយ ក្នុងតំបន់ចំនួន ១០ នៅក្នុងប្រទេស ក្នុងនោះ ក៏មានរាប់បញ្ចូលទីក្រុងគែរផងដែរ។
ការបោះឆ្នោតកាលពីម្សិលមិញ បានប្រព្រិត្តទៅ ក្នុងភាពស្ងប់ស្ងាត់ ប៉ុន្តែយោងតាមតួលេខមិនផ្លូវការមួយ អ្នកដែលមកបោះឆ្នោត មានតែមួយភាគបីប៉ុណ្ណោះនៃចំនួនប្រជាជនសរុប 26លាននាក់ ដែលត្រូវទៅបោះឆ្នោតជាលើកទីពីរ នៅថ្ងៃសៅរ៍ខាងមុខ។
ទោះយ៉ាងណា គណបក្សប្រឆាំង មិនទទួលស្គាល់ លទ្ឋផលបោះឆ្នោតនេះទេ ដោយចោទថា ការបោះឆ្នោតគ្មានភាពប្រក្រតី ហើយបានអំពាវនាវអោយ ប្រជាជនធ្វើបាតុកម្ម សារជាថ្មីនៅថ្ងៃអង្គារស្អែកនេះ ដើម្បីប្រឆាំងនឹងគំរោងធម្មនុញ្ញរបស់គណបក្សកាន់អំណាច។ គណបក្ស រណសិរ្សស្រោចស្រង់ជាតិ អេហ្ស៊ីប (FSN) បានដាក់ល័ក្ខខ័ណ្ឌថា ខ្លួននឹងមានវត្តមាន ក្នុងការបោះឆ្នោតប្រជាមតិលើកទីពីរ លុះត្រាតែមានមានចៅក្រមចូលរួមសង្កេតការបោះឆ្នោត អោយបានពេញលេញ ១០០ភាគរយ។
អ្នកសង្កេតការនានា បានបរិហារថាមិនឃើញមាន ចៅក្រមសង្កេតការ នៅក្នុងទីស្នាក់ការបោះឆ្នោតច្រើនកន្លែង។ លើសពីនេះ អង្គការសិទ្ឋិមនុស្សនានា សង្កេតឃើញភាពមិនប្រក្រតីក្នុងដំណើរការបោះឆ្នោតកាលពីចុងសប្តាហ៍កន្លងមក ដូចជា ការបើកទ្វារទីស្នាក់ការបោះឆ្នោត មានភាពយឺតយ៉ាវ មានការរំលោភបំពានច្រើនលើបទបញ្ជាក្នុងដំណើរការបោះឆ្នោត ព្រមទាំងមានការស៊ីសំណូកកើតឡើងទៀតផង។
ទោះបីជា គណបក្សកាន់អំណាចអេហ្ស៊ីប ទទួលបានជ័យជំនះនៅលើកទីមួយ សម្លេងឆ្នោត មានត្រឹមតែ ជាង 56ភាគរយ គឺនៅមានភាពប្រកិតគ្នា ជាមួយសម្លេងគាំទ្ររបស់ គណបក្សប្រឆាំង។ គណបក្សប្រឆាំងអេហ្ស៊ីប នៅតែសង្ឃឹមដណ្តើមបានជោគជ័យមកវិញ នៅក្នុងការបោះឆ្នោតលើកទីពីរ នៅចុងសប្តាហ៏នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ