ធាត់ឡើងគីឡូបណ្តាលឲ្យមានគ្រោះថ្នាក់សុខភាពដល់ជនជាតិអាស៊ីជាងជនជាតិអឺរ៉ុប
ជនជាតិអាស៊ីដែលធាត់ខ្លាំង មានបញ្ហាសុខភាពច្រើនជាងមនុស្សធាត់ដែលមានដើមកំណើតជាអឺរ៉ុប។ នេះជាលទ្ធផលនៃការសិក្សាស្រាវជ្រាវរបស់មហាវិទ្យាល័យកាណាដាមួយ ចេញផ្សាយជាសាធារណៈ កាលពីថ្ងៃព្រហស្បតិ៍ទី២៨កក្កដាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០៦
ធាត់ឡើងគីឡូ បង្កគ្រោះថ្នាក់សុខភាព សម្រាប់ជនជាតិអាស៊ី ខ្លាំងជាងជនជាតិអឺរ៉ុប។ នេះជាលទ្ធផលនៃការសិក្សាស្រាវជ្រាវមួយ ចេញផ្សាយកាលពីថ្ងៃព្រហស្បតិ៍ទី២៨កក្កដាម្សិលមិញនៅប្រទេសកាណាដា។
យោងទៅតាមការសិក្សានេះ មូលហេតុគឺមកពីជនជាតិអាស៊ីស្តុកខ្លាញ់ទុកនៅក្នុងថ្លើម រីឯជនជាតិអឺរ៉ុបវិញស្តុកខ្លាញ់ទុកនៅក្រោមស្បែក។
លោកស្រី Sonia Anand អ្នកដឹកនាំការសិក្សានេះ និងជាសាស្រ្តាចារ្យខាងវេជ្ជសាស្រ្តនៃមហាវិទ្យាល័យ McMaster ពន្យល់ថា«ពួកជនជាតិអាស៊ីមានមាឌតូច ដងខ្លួនរបស់ពួកគេក៏តូចទៅតាមហ្នឹងដែរ មិនអាចស្រូបយកខ្លាញ់មកស្តុកទុកនៅក្រោមស្បែកបានច្រើនទេ ម្ល៉ោះហើយបានជាខ្លាញ់រត់ទៅនៅក្នុងថ្លើម»។ លោកស្រី Sonia Anand បន្ថែមថា អ៊ីចឹងហើយបានជាជនជាតិអាស៊ីដែលធាត់ខ្លាំងឬធាត់យូរ តែងតែមានជំងឺទឹកនោមផ្អែមនិងជំងឺបេះដូង។
ការសិក្សាស្រាវជ្រាវនេះ ត្រូវបានធ្វើទៅលើមនុស្ស១០៨នាក់។ មួយចំនួនជាជនជាតិអាស៊ីមកពីឥណ្ឌា ប៉ាគីស្ថាន ស្រីលង្កា និងបង់ក្លាដែស។ រីឯមួយចំនួនទៀត ជាជនជាតិកាណាដាដែលជីដូនជីតាមានដើមកំណើតចេញមកពីអ៊ឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ