ជំនួបកំពូលអឺរ៉ុបនៅទីក្រុងព្រុចសែលចាប់ផ្តើមនៅថ្ងៃនេះនិងថ្ងៃស្អែក
វិបត្តិប្រាក់បំណុលនៅតំបន់អឺរ៉ូ គឺជាសំណុំរឿងដ៏សំខាន់នៃជំនួបកំពូលអឺរ៉ុបថ្មីដែលចាប់ផ្តើមនៅថ្ងៃព្រហស្បតិ៍២៨មិថុនានេះនិងថ្ងៃសុក្រស្អែក។ក្នុងជំនួបលើកនេះ ប្រមុខដឹកនាំសហភាពអឺរ៉ុប ប៉ុនប៉ងរកដំណោះស្រាយដើម្បីជំរុញសេដ្ឋកិច្ចអឺរ៉ុបនិងសង្គ្រោះលុយអឺរ៉ូ ដែលជារូបិយវត្ថុតែមួយគត់របស់អឺរ៉ុប។ ជំនួបកំពូលនៅព្រុចសែលត្រូវបានគេចាត់ទុកថា “ជាតេស(Test)មួយសំរាប់ប្រមុខដឹកនាំប្រទេសបារាំងនិងអាល្លឺម៉ង់”ដែរ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ជំនួបកំពូលអឺរ៉ុបនៅទីក្រុងព្រុចសែល ចាប់ផ្តើមធ្វើនៅថ្ងៃព្រហស្បតិ៍និងថ្ងៃសុក្រស្អែក បន្ទាប់ពីមានជំនួបប្រាស្រ័យគ្នាជាច្រើនរួចមក។ កាលពីយប់មិញ មានការជួបសន្ទនាគ្នារវាងលោកស្រីនាយករដ្ឋមន្ត្រីអាល្លឺម៉ង់ Angela Merkel និងលោកប្រធានាធិបតីបារាំង François Hollande ហើយនៅថ្ងៃនេះ ប្រមុខដឹកនាំទាំងពីរប្រទេស ជួបគ្នាជាថ្មីនៅទីក្រុងព្រុយសែល។
កាលពីយប់មិញ លោកស្រី Merkel និងលោក Hollande បានជួបគ្នានៅវិមាន L’Elysée ក្នុងឱកាសទទួលទានអាហារល្ងាចមួយ ដើម្បីរៀបចំ ជំនួបកំពូលអឺរ៉ុបដែលត្រូវធ្វើឡើងនៅថ្ងៃព្រហស្បតិ៍នេះនិងថ្ងៃសុក្រស្អែក។ ជាជំនួបកំពូលថ្មីមួយ ដែលបារាំងនិងអាល្លឺម៉់ង ចង់បញ្ជាក់ប្រាប់ដែរ ថា"គ្រឿងចលករបារាំងនិងអាល្លឺម៉ង់"មានដំណើរការទៅមុខ បើទោះបីជាតំបន់អឺរ៉ុប កំពុងជួបប្រទះវិបត្តិហិរញ្ញវត្ថុយ៉ាងធ្ងន់ធ្ងរក្តី សឹងតែដាច់ខ្យល់នៅក្នុងប្រទេសចាយលុយអឺរ៉ូមួយចំនួន ដូចជាប្រទេសក្រិក អេស្ប៉ាញឬ ក៏ប្រទេស Chypreជាដើមនាពេលថ្មីៗនេះ។
ប៉ុន្តែ ប្រមុខដឹកនាំបារាំងនិងអាល្លឺម៉ង់ ក៏មានការពិបាកដែរក្នុងការសំដែងតួនាទីមួយដែលអ្នកដឹកនាំអឺរ៉ុបទាំងពីរ ត្រូវមានជំហរស្របគ្នាឥតខ្ចោះនោះ។ ដោយហេតុថា ជាច្រើនសប្តាហ៍មកហើយ ប្រមុខដឹកនាំទាំងពីរប្រទេសនេះ មានការខ្វែងគំនិតគ្នាស្តីពីបញ្ហាមួយចំនួនដែលអឺរ៉ុបកំពុងប្រឈមមុខ។ ប៉ុន្តែ ម្សិលមិញ លោក François Hollande បានសំដែងសេចក្តីសោមនស្សនៅលើចំណុចស្របគ្នាមួយ ដោយលោកបានថ្លែងបញ្ជាក់ថា “មានការរីកចំរើនច្រើននៅក្នុងការពិភាក្សាគ្នាជាអាទិ៍នៅជុំវិញ “ការជំរុញកំណើនសេដ្ឋកិច្ចអឺរ៉ុប” ដែលជាកម្មវត្ថុចម្បងមួយនៃការពិភាក្សាគ្នាជាច្រើនលើកមកហើយ។
លោកស្រី Merkel វិញ បានបញ្ជាក់ពីការគាំទ្ររបស់លោកស្រី ចំពោះកិច្ចព្រមព្រៀងដើម្បីផ្តល់សន្ទុះថ្មីឲ្យដល់ម៉ាស៊ីនសេដ្ឋកិច្ចអឺរ៉ុប ជាពិសេសការកេណ្ឌប្រមូលមូលនិធិឲ្យបាន១២ម៉ឺនលានអឺរ៉ូ ឬស្មើនឹង១% នៃផលិតផលដុលសរុបអឺរ៉ុប ។ ត្រង់នេះ លោកស្រីនាយករដ្ឋមន្ត្រីអាល្លឺម៉ង់ ចង់គូសបញ្ជាក់ដែរថា ទោះបីជាគាត់មានជំហរតឹងរ៉ឹងខ្លាំងស្តីពីចំណុចសំខាន់ៗខ្លះ ដែលទីក្រុងប៉ារីសនិងអាល្លឺម៉ង់ មិនទាន់ត្រូវគ្នាក្តី ក៏លោកស្រី ចេះធ្វើសម្បទានដែរ។
ចំណុចសំខាន់មួយទៀត នៃ ជំនួបកំពូលអឺរ៉ុបនៅថ្ងៃនេះ គឺពាក់ព័ន្ធនឹងបញ្ហាកំណែទម្រង់ដែលតំបន់អឺរ៉ូ សន្យាថានឹងត្រូវរៀបចំធ្វើឡើងវិញនៅក្នុងប៉ុន្មានឆ្នាំខាងមុខ។ ចំណុចនេះហើយ ដែលបារាំងនិងអាល្លឺម៉ង់ មានការខ្វែងយោបល់គ្នា។ ដោយហេតុថា បារាំង មានបំណង ចង់ឲ្យអឺរ៉ុប សម្តែងសាមគ្គីធម៌ឲ្យបានច្រើនជាងមុនថែមទៀតក្នុងវិស័យហិរញ្ញវត្ថុ ចំណែកអាល្លឺម៉ង់វិញ ទាមទារឲ្យប្រទេសសមាជិកតំបន់អឺរ៉ូ ប្រកាន់ខ្ជាប់វិន័យរបស់ខ្លួននិងការរៀបចំនយោបាយសមាហរ័ណកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ