Amnesty international៖ កងទ័ពលោកOuattara ប្រព្រឹត្តឧក្រិដ្ឋកម្មសង្រ្គាម
ចុះផ្សាយនៅថ្ងៃ៖
ស្តាប់ - ០៧:៣០
នៅថ្ងៃសៅរ៍នេះ ទីក្រុងAbidjan របស់ប្រទេសកូតឌីវ័រ កងទ័ពរបស់លោកប្រធានាធិបតីឈ្នះឆ្នោត Alassanne Ouattara នៅតែមិនទាន់អាចវាយបំបែក យកបានសង្កាត់ និងវិមានប្រធានាធិបតី ដែលនៅការពារមាំទាំដោយទាហានរបស់លោក Laurent Gbagbo។ កម្លាំងលោក Alassanne Ouattara អំពាវនាវឲ្យគ្នីគ្នាផ្សេងទៀតរបស់ខ្លួនចេញដំណើរពីខាងជើងប្រទេស។ អង្គការកាកបាទក្រហមបានរាយការណ៍ថា គេរកឃើញសាកសពមនុស្សជាង ៨០០នាក់ ដែលត្រូវគេសម្លាប់នៅក្នុងទីក្រុងDuéKoué ដែលបោសសម្អាតដោយកងទ័ពគាំទ្រលោក Alassanne Ouattara។
អំណាចរបស់លោក Laurent Gbagbo កាន់តែរួមតូច និងឈានទៅដល់ចំណុចទ័លច្រកមួយ ប៉ុន្តែ លោក Gbagbo នៅតែមិនព្រមចុះចាញ់ ប្រគល់អំណាចទៅឲ្យលោកប្រធានាធិបតី Ouattara ដែលទទួលស្គាល់ដោយអន្តរជាតិ។ ប៉ុន្តែ រហូតមកដល់ពេលនេះ គេមិនដឹងថា លោកLaurent Gbagbo ដែលបានបាត់មុខពី សាធារណៈ ក្នុងរយៈពេលប៉ុន្មានសប្តាហ៍ចុងក្រោយនេះ កំពុងស្ថិតនៅកន្លែងណាទេ។
ប៉ុន្តែ បើតាមមន្រ្តីស្និទ្ធនឹងលោក Gbagbo លោក កំពុងស្ថិតនៅក្នុងវិមានប្រធានាធិបតី ដែលយាមការពារខ្លាំងដោយទ័ពស្ម័គ្រនឹងលោក។ មន្រ្តីជំនិតនឹងរូបលោក Gbagboម្នាក់និយាយថា លោក Gbagboកំពុងស្ថិតនៅកន្លែងសុវត្តិភាពមួយ ដើម្បីបញ្ជាទាហាន។ Gbagboនៅតែបញ្ជាក់ថា លោកនៅតស៊ូ មិនព្រមចុះចាញ់ ប្រគល់អំណាចឲ្យលោក Ouattara ដាច់ខាត។
អង្គការសហប្រជាជាតិបានដាក់ទណ្ឌកម្មសេដ្ឋកិច្ច លើលោក Gbagbo និងហាមឃាត់ មិនឲ្យធ្វើដំណើរទៅបរទេស។ ប៉ុន្តែ ប្រភពផ្សេងទៀត បាននិយាយថា លោកGbagboអាចរត់គេចខ្លួន ទៅបរទេស។ គេសង្ស័យថា លោកនឹងអាចគេចខ្លួន ទៅនៅប្រទេស Angola ដែលមេដឹកនាំ ប្រទេសនោះជាមិត្តជិតស្និទ្ធនឹងលោក។
តុលាការព្រហ្មទណ្ឌអន្តរជាតិ កំពុងចាប់ផ្តើមនិយាយពីការស៊ើបអង្កេតលើបទឧក្រិដ្ឋប្រឆាំងមនុស្សជាតិ ដែលបានបង្កដោយលោកGbagbo។ ចាប់តាំងពីបានឡើងកាន់អំណាច ឆ្នាំ ២០០០ លោកGbagboបានធ្វើការបង្រ្កាបហិង្សា ទៅលើក្រុមអ្នកប្រឆាំង និងប្រជាជននៅខាងជើងប្រទេស។
បើទោះបីជាលោកGbagboសង្ឃឹម អាចលាក់ខ្លួនដោយសុវត្ថិភាព នៅAngola ប៉ុន្តែ គេប្រហែលមិនភ្លេចពីករណីរបស់អតីតប្រធានាធិបតីLibéria លោកCharles Taylor ដែលត្រូវតុលាការអន្តរជាតិចោទពីបទសម្លាប់រង្គាលក្នុងសង្រ្គាមស៊ីវិល ឆ្នាំ ២០០៣។ លោក Charles Taylorដែលក្រោយមកគេចលាក់ខ្លួន នៅNigéria នៅតែត្រូវគេចាប់បញ្ជូនទៅឲ្យតុលាការអន្តរជាតិផ្តន្ទាទោស។ ដូច្នេះ បើលោក Gbagbo ចង់គេចខ្លួនទៅបរទេស វាសនារបស់លោកក៏នឹងអាចដូចអតីតប្រធានាធិបតី Libéria។
កាកបាទក្រហមរកឃើញសាកសពជនស៊ីវិល៨០០នាក់
ការប្រយុទ្ធគ្នានៅកូតឌីវ័រ បើទោះបីជាមិនមានទ្រង់ទ្រាយធំ គឺទ័ពរដ្ឋាភិបាលបានរត់ចោលជួរ និងទុកឲ្យកម្លាំងលោកOuattara សម្រុកចូលបានដោយស្រួល ប៉ុន្តែ ការបាត់បង់ជីវិតមនុស្សឯណោះវិញ មានទំហំធំធេង។ អង្គការកាកបាទក្រហមអន្តរជាតិបានរកឃើញ សាកសពមនុស្សជាង ៨០០នាក់ នៅក្នុងទីក្រុងមួយដែលត្រូវបានចូលលុកលុយដោយកងទ័ពលោកOuattara។ បើតាមបុគ្គលិករបស់កាកបាទក្រហម អ្នកត្រូវគេសម្លាប់ភាគច្រើនជាអ្នកកាន់គ្រិស្តសាសនា។ គេវាយតម្លៃថា នេះអាចជាការសម្លាប់រង្គាល រើសអើងជាតិសាសន៍។ គេដឹងហើយថា កងទ័ពគាំទ្រលោកOuattara មកពីខាងជើងប្រទេស ហើយពួកគេភាគច្រើនកាន់សាសនាអ៊ីស្លាម និងដែល កន្លងមក ទទួលការរើសអើងពីពួកប្រជាជននៅខាងត្បូងដែលកាន់គ្រិស្តសាសនា។
អំពើហិង្សាអាចឆ្លុះបញ្ចាំងពីសង្រ្គាមសងសឹកគ្នាទៅវិញ ទៅមក។ លោកអគ្គលេខាធិការអង្គការសហប្រជាជាតិ និងអង្គការសិទ្ធិមនុស្សHuman rights Watch បានប្រាប់លោក Alassann Ouattara ឲ្យត្រួតពិនិត្យមើល ឡើងវិញ សកម្មភាពទាហានរបស់លោក និងកុំឲ្យសម្លាប់ជនស៊ីវិល។ ចំណែក អង្គការAmnesty International បានអំពាវនាវលោកOuattara រក្សាសន្តិសុខដល់ប្រជាជន កុំឲ្យប្រកាន់បក្សពួក នៅពេលខ្លួនវាយឈ្នះលើលោក Gbagbo។
នៅថ្ងៃសៅរ៍នេះ ក្រុមលោកAlassanne Ouattara វិញបានបង្ហាញថា គេបានរកឃើញរណ្តៅសាកសពជនស៊ីវិលនៅភាគខាងលិចប្រទេស។ លោក Alassanne Ouattara បានចោទក្រុមលោកGbagbo ថា ជាអ្នកសម្លាប់ប្រជាជនស៊ីវិលដែលគេសង្ស័យថា ជាជនបរទេស គាំទ្រក្រុមលោក Alassanne Ouattara៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ