ប្រមុខរដ្ឋបារាំងនិងអាល្លឺម៉ង់ជួបគ្នាមុនជំនួបវិសាមញ្ញស្តីពីប្រទេសក្រិក
លោកប្រធានាធិបតីបារាំង ត្រូវជួបពិភាក្សាជាមួយនឹងលោកស្រីប្រមុខរដ្ឋាភិបាលអាល្លឺម៉ង់ នៅថ្ងៃនេះ ពោលគឺមួយថ្ងៃមុនការបើកជំនួបកំពូលវិសាមញ្ញ ស្តីពីវិបត្តិក្រិក នៅប្រទេសបែលហ្សិក។ ជំនួបរវាងប្រមុខរដ្ឋធំកំពូលទាំងពីរនៃតំបន់អឺរ៉ូនេះ គឺដើម្បី រៀបចំផែនការទីពីរសម្រាប់ជួយប្រទេសក្រិកផង និងដើម្បីធានារ៉ាប់រង ផ្តល់ទំនុកចិត្តដល់ទីផ្សារប្រាក់អឺរ៉ូផង។ ព្រោះបន្ទាប់ពីសហរដ្ឋអាមេរិក គឺដល់វេនមូលនិធិរូបិយវត្ថុអន្តរជាតិFMI ម្តងដែលដាក់សម្ពាធលើតំបន់អឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
សល់តែ២៤ម៉ោងទៀតប៉ុណ្ណោះ ជំនួបកំពូលវិសាមញ្ញស្តីពីប្រទេសក្រិកនឹងចាប់បើកទ្វារ ប៉ុន្តែគ្មានដំណោះស្រាយច្បាស់លាស់ណាមួយត្រូវបានបង្ហើបបង្ហាញ ដើម្បីឆ្លើយតបទៅនឹងវិបត្តិរបស់ក្រិក ដូចការទាមទាររបស់អង្គការមូលនិធិរូបិយវត្ថុអន្តរជាតិឡើយ។ ភាពចម្រូងចម្រាសនៅមានច្រើន មានជាអាទិ៍ ការចូលរួមរបស់ក្រុមហ៊ុនឯកជន ការយកពន្ធធនាគារ ឬការបង្វែរប្រាក់បំណុល ។ល។ និង។ល។
ក្រុមអ្នកជំនាញការ ធនាគារកណ្តាលអឺរ៉ុប កំពុងតែបន្តការចរចា យ៉ាងសស្រាក់សស្រាំ ដោយសង្ឃឹមថានឹងអាចរកដំណោះស្រាយ សមស្រប មានសមភាព និងស្ថិតស្ថេរយូរអង្វែង ឲ្យប្រទេសក្រិកចេញផុតពីវិបត្តិជំពាក់បំណុលគេវ័ណ្ឌ-ក និងដើម្បីកុំឲ្យវិបត្តិនេះឆ្លងរាលដាលដល់បណ្តាប្រទេសប្រើប្រាក់អឺរ៉ូផ្សេងទៀត និងដែលគ្រប់គ្នាអាចទទួលយកបាន។
ការចរចាមួយទៀតក៏នឹងត្រូវចាប់ផ្តើមដែរ តែមានលក្ខណៈនយោបាយច្រើន នោះគឺជំនួបរវាងលោកប្រធានាធិបតីបារាំង នីកូឡា សាកូហ្ស៊ី និងលោកស្រីប្រមុខរដ្ឋាភិបាលអាល្លឺម៉ង់ អង់ហ្គឺឡា មែកែល នៅថ្ងៃនេះ នាទីក្រុងប៊ែរឡាំង។ ប្រមុខដឹកនាំប្រទេសទាំងពីរនេះ ត្រូវខិតខំសម្រេចរកឲ្យឃើញនូវ “បែបបទនៃដំណើរការ” ផែនការថ្មីជួយស្រោចស្រង់ប្រទេសក្រិកពីវិបត្តិធនក្ស័យ មុនជំនួបក្រុងប្រ៊ុចសែល។
អង្គការមូលនិធិរូបិយវត្ថុអន្តរជាតិ លោកប្រធានាធិបតីអាមេរិកអូបាម៉ា បានជំរុញឲ្យអឺរ៉ុបរួបរួមគ្នា ដោយបង្កើតឲ្យមានអភិបាលកិច្ចសេដ្ឋកិច្ចអឺរ៉ុបមួយ ស៊ីចង្វាក់គ្នា ប៉ុន្តែតាំងពីម្សិលមិញ តាមរយៈសន្និសីទកាសែត លោកស្រីប្រមុខរដ្ឋាភិបាលអាល្លឺម៉ង់បានព្រមានថា មិនត្រូវរង់ចាំលទ្ធផលអស្ចារ្យណាមួយពីជំនួបកំពូលនៅទីក្រុងប្រ៊ុចសែលស្អែកនេះទេ។ វាអាចជាផែនការសម្រាប់ករណីប្រទេសក្រិកតែមួយ តែមិនមែនសម្រាប់អឺរ៉ុបទាំងមូល ឬសម្រាប់តំបន់អឺរ៉ូទាំងស្រុងទេ។ ក្តីស្រមៃចង់បានអភិបាលកិច្ចសេដ្ឋកិច្ចអឺរ៉ុបតែមួយ សូមរក្សាទុកនៅពេលក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ